ಕ್ರಾಂತಿವೀರ ಸಂಗೋಳ್ಳಿ ರಾಯಣ್ಣ ಅವರಿಗೆ ಬಿಬಿಎಂಪಿ ಆಡಳಿತಾಧಿಕಾರಿ ಗೌರವ್‌ ಗುಪ್ತಾ ಅಗೌರವ

ಕ್ರಾಂತಿವೀರ ಸಂಗೋಳ್ಳಿ ರಾಯಣ್ಣ ಅವರಿಗೆ ಬಿಬಿಎಂಪಿ ಆಡಳಿತಾಧಿಕಾರಿ ಗೌರವ್‌ ಗುಪ್ತಾ ಅಗೌರವ – ಕ್ರಮ ಕೈಗೊಳ್ಳುವಂತೆ ಕರ್ನಾಟಕ ದಲಿತ ಸಂಘರ್ಷ ಸಮಿತಿ ಆಗ್ರಹ

(Kannada News) : ಬೆಂಗಳೂರು : ಸ್ವಾತಂತ್ರ್ಯ ಹೋರಾಟಗಾರ ಕ್ರಾಂತಿವೀರ ಸಂಗೊಳ್ಳಿ ರಾಯಣ್ಣ ಅವರಿಗೆ ಜನವರಿ 26 ರಂದು ಗೌರವ ಸಮರ್ಪಣೆ ಮಾಡುವ ಸಂಧರ್ಭದಲ್ಲಿ ಚಪ್ಪಲಿ ಧರಿಸಿಕೊಂಡಿದ್ದ ಬಿಬಿಎಂಪಿ ಆಡಳಿತಾಧಿಕಾರಿ ಗೌರವ್‌ ಗುಪ್ತಾ ಅವರು ಸಾರ್ವಜನಿಕವಾಗಿ ಕ್ಷಮೆ ಕೇಳಬೇಕು ಹಾಗೂ ಅವರ ಮೇಲೆ ಕ್ರಮ ಕೈಗೊಳ್ಳಬೇಕು ಎಂದು ಕರ್ನಾಟಕ ದಲಿತ ಸಂಘರ್ಷ ಸಮಿತಿ ರಾಜ್ಯಾಧ್ಯಕ್ಷ ಡಾ.ಸಿ.ಎಸ್‌ ರಘು ಆಗ್ರಹಿಸಿದ್ದಾರೆ.

ಸಂಗೊಳ್ಳಿ ರಾಯಣ್ಣ ಇಡೀ ದೇಶದ ಹೆಮ್ಮೆ ಪಡುವಂಥ ಧೀಮಂತ ವ್ಯಕ್ತಿ. ಸ್ವತಂತ್ರ್ಯಕ್ಕಾಗಿ ಹೋರಾಡಿ ಜೀವ ಬಿಟ್ಟ ಸಂಗೊಳ್ಳಿ ರಾಯಣ್ಣನನ್ನು ಪ್ರತಿಯೊಬ್ಬ ಭಾರತೀಯನೂ ಕೂಡ ಗೌರವ, ಅಭಿಮಾನದಿಂದ ಆದರಿಸುವುದು ಹೆಮ್ಮೆಯ ವಿಷಯ.

ಆದಾಗ್ಯೂ ಇಲ್ಲಿ ಬಿಬಿಎಂಪಿ ಆಡಳಿತಾಧಿಕಾರಿ ಗೌರವ್ ಗುಪ್ತಾ ಸಂಗೊಳ್ಳಿ ರಾಯಣ್ಣನಿಗೆ ಅಗೌರವ ಸೂಚಿಸುವಂತಹ ಕುಕೃತ್ಯ ಮಾಡಿದ್ದಾರೆ. ಈ ಅಧಿಕಾರಿಯು ಪ್ರಜ್ಞಾವಂತರಾಗಿದ್ದು, ಬಿಬಿಎಂಪಿಯ ಆಡಳಿತಾಧಿಕಾರಿಯಾಗಿದ್ದರೂ ಸಹ ಒಬ್ಬ ಸ್ವತಂತ್ರ ಹೋರಾಟಗಾರನ ಪ್ರತಿಮೆ ಮುಂದೆ ಪಾದರಕ್ಷೆ ಹಾಕಿಕೊಂಡು ನಿಲ್ಲುವುದು ರಾಯಣ್ಣನಿಗೆ ಅಗೌರವ ಸೂಚಿಸುವುದೇ ಆಗಿದೆ ಎಂದಿದ್ದಾರೆ.

BBMP Administrator Gaurav Gupta disrespected Sangolli Rayanna
BBMP Administrator Gaurav Gupta disrespected Sangolli Rayanna

ಏಕೆಂದರೆ ಎಲ್ಲಿ ಭಕ್ತಿ, ಹೆಮ್ಮೆ, ಗೌರವವಿರುವುದೋ ಅಲ್ಲಿ ಇಂಥ ಕೃತ್ಯಗಳನ್ನು ಮಾಡಲು ಮನಸ್ಸು ಬರುವುದಿಲ್ಲ. ಪ್ರತಿಯೊಬ್ಬರೂ ಪಾದರಕ್ಷೆಗಳನ್ನು ಕಳಚಿ ಸಂಗೊಳ್ಳಿ ರಾಯಣ್ಣನ ಪ್ರತಿಮೆ ಮುಂದೆ ನಿಂತಿದ್ದರೂ ಸಹ ಅವರೊಂದಿಗೆ ಇರುವ ಗೌರವ್ ಗುಪ್ತಾ ಅವರು ಯಾವುದೇ ಪರಿಜ್ಞಾನವಿಲ್ಲದೆ ಪಾದರಕ್ಷೆಯನ್ನು ಧರಿಸಿ ನಿಂತಿದ್ದು ಅಹಂಕಾರದ ಪರಮಾವಧಿ ಎಂದೇ ಭಾವಿಸಬೇಕಾಗುತ್ತದೆ.

ಅಧಿಕಾರದ ಮದವೋ, ಅಥವಾ ಇತಿಹಾಸ ಜ್ಞಾನದ ಕೊರತೆಯೋ ಗೊತ್ತಿಲ್ಲ. ಆದರೆ ಕನ್ನಡಿಗರ ಹೆಮ್ಮೆಯ ಸ್ವತಂತ್ರ ಹೋರಾಟಗಾರ ಸಂಗೊಳ್ಳಿ ರಾಯಣ್ಣನಿಗೆ ಈ ರೀತಿಯ ಅಗೌರವ ತೋರಿದ ಗೌರವ ಗುಪ್ತಾ ನಡೆ ನಿಜಕ್ಕೂ ಖಂಡನೀಯ. ಗೌರವ್‌ ಗುಪ್ತಾ ಅವರು ಈ ಕೂಡಲೇ ಸಾರ್ವಜನಿಕವಾಗಿ ಕ್ಷಮೇ ಯಾಚಿಸಬೇಕು ಎಂದು ಆಗ್ರಹಿಸಿದ್ದಾರೆ.

Web Title: BBMP Administrator Gaurav Gupta disrespected Sangolli Rayanna

Scroll Down To More News Today