Bengaluru: ಕರ್ನಾಟಕ ಶಕ್ತಿ ಯೋಜನೆ, ಬೆಂಗಳೂರು ಬಿಎಂಟಿಸಿ ಬಸ್ ದಟ್ಟಣೆಗೆ ಪರಿಹಾರ! 1750 ಇ-ಬಸ್ ಸೇರ್ಪಡೆ

• ಶಕ್ತಿ ಯೋಜನೆ ಬಳಿಕ ಬಿಎಂಟಿಸಿ ಬಸ್ ದಟ್ಟಣೆಗೆ ಪರಿಹಾರ
• PM-E-DRIVE ಯೋಜನೆಯಡಿ ಎಸಿ, ನಾನ್ ಎಸಿ ಬಸ್
• ಪ್ರಯಾಣಿಕರಿಗೆ ಹೆಚ್ಚು ಸೀಟ್, ಸುಲಭ ಪ್ರಯಾಣದ ಭರವಸೆ

ಬೆಂಗಳೂರು (Bengaluru): ಕರ್ನಾಟಕ ಶಕ್ತಿ ಯೋಜನೆ (Karnataka Shakti Yojane) ಜಾರಿಗೆ ಬಂದ ನಂತರ ಬಿಎಂಟಿಸಿ ಬಸ್‌ಗಳಲ್ಲಿ ಜನಸಂದಣಿ ಸಾಮಾನ್ಯ ದೃಶ್ಯವಾಗಿತ್ತು. ಬೆಳಗ್ಗೆ, ಸಂಜೆ ಪೀಕ್ ಅವಧಿಯಲ್ಲಿ ಕಾಲಿಡಲು ಜಾಗವಿಲ್ಲದ ಪರಿಸ್ಥಿತಿ ಕಂಡುಬಂದಿತ್ತು.

ವಿದ್ಯಾರ್ಥಿಗಳು, ಉದ್ಯೋಗಿಗಳು, ಹಿರಿಯರು, ಎಲ್ಲರೂ ಸೀಟ್ ಸಿಗದೇ ಪರದಾಡುತ್ತಿದ್ದರು. ಈಗ ಈ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳಲು ಕೇಂದ್ರ ಸರ್ಕಾರದಿಂದ ದೊಡ್ಡ ನೆರವು ಬರಲಿದೆ.

1750 ಹೊಸ ಎಲೆಕ್ಟ್ರಿಕ್ ಬಸ್‌ಗಳ ಸೇರ್ಪಡೆ

PM-E-DRIVE ಯೋಜನೆಯಡಿ ಮೊದಲ ಹಂತದಲ್ಲಿ 1750 ಎಸಿ ಮತ್ತು ನಾನ್ ಎಸಿ ಎಲೆಕ್ಟ್ರಿಕ್ ಬಸ್‌ಗಳು ಬೆಂಗಳೂರಿಗೆ ಬರುತ್ತಿವೆ. ಒಪ್ಪಂದ ಆಧಾರದಲ್ಲಿ ಈ ಬಸ್‌ಗಳು 12 ವರ್ಷಗಳ ಕಾಲ ಸಂಚರಿಸಲಿದ್ದು, ನಿರ್ವಹಣೆಯನ್ನು ಗುತ್ತಿಗೆದಾರ ಕಂಪನಿ ನೋಡಿಕೊಳ್ಳಲಿದೆ. ಚಾಲಕರು ಕಂಪನಿ ಮೂಲಕ, ಕಂಡಕ್ಟರ್‌ಗಳು ಬಿಎಂಟಿಸಿ ಮೂಲಕ ಕಾರ್ಯನಿರ್ವಹಿಸಲಿದ್ದಾರೆ.

ಸಿಇಎಸ್ಎಲ್ ಸಂಸ್ಥೆ ಟೆಂಡರ್ ಪ್ರಕ್ರಿಯೆ ಪೂರ್ಣಗೊಳಿಸಿ ಏಕಾ ಮೊಬಿಲಿಟಿಗೆ ಬಸ್ ಪೂರೈಕೆಯ ಜವಾಬ್ದಾರಿ ನೀಡಿದೆ. ಪ್ರತಿ ಕಿಲೋಮೀಟರ್‌ಗೆ ಬಿಎಂಟಿಸಿ 45–50 ರೂಪಾಯಿ ವೆಚ್ಚದಲ್ಲಿ ಸೇವೆ ಪಡೆಯಲಿದೆ ಎಂದು ತಿಳಿದುಬಂದಿದೆ.

ಹಳೆಯ ಬಸ್‌ಗಳಿಗೆ ನಿವೃತ್ತಿ, ಪ್ರಯಾಣಿಕರಿಗೆ ಲಾಭ

ಪ್ರಸ್ತುತ ಬಿಎಂಟಿಸಿಯಲ್ಲಿರುವ 6,800ಕ್ಕೂ ಹೆಚ್ಚು ಬಸ್‌ಗಳು ಹೆಚ್ಚಿದ ಬೇಡಿಕೆಗೆ ಸಾಲುತ್ತಿಲ್ಲ. ಹೊಸ ಎಲೆಕ್ಟ್ರಿಕ್ ಬಸ್‌ಗಳು ಸೇರ್ಪಡೆಯಾದರೆ ಹಳೆಯ ವಾಹನಗಳಿಗೆ ಹಂತ ಹಂತವಾಗಿ ನಿವೃತ್ತಿ ಸಿಗಲಿದೆ. ಜೊತೆಗೆ, ಇಂಧನ ವೆಚ್ಚ ಕಡಿಮೆಯಾಗಿದ್ದು, ಪರಿಸರ ಸ್ನೇಹಿ ಸಾರಿಗೆ ವ್ಯವಸ್ಥೆಗೆ ಸಹಕಾರಿ ಆಗಲಿದೆ.