Bengaluru Metro: ಬೆಂಗಳೂರು ಮೆಟ್ರೋ ದರ ಏರಿಕೆ; ಪ್ರಯಾಣಿಕರಿಗೆ ಮತ್ತೊಂದು ಹೊರೆ

• ಮೆಟ್ರೋ ದರ ಏರಿಕೆಗೆ ರಾಜ್ಯ ಸರ್ಕಾರ ಗ್ರೀನ್ ಸಿಗ್ನಲ್
• ಶೇ.5% ಟಿಕೆಟ್ ದರ ಹೆಚ್ಚಳ ಫೆಬ್ರವರಿ 9ರಿಂದ ಜಾರಿ
• ಬೆಂಗಳೂರು ಪ್ರಯಾಣಿಕರಿಗೆ ಹೆಚ್ಚುವರಿ ಹೊರೆ

Bengaluru Metro: ಬೆಂಗಳೂರು ಸಂಚಾರದ ಒತ್ತಡ ತಗ್ಗಿಸಲು ರೂಪುಗೊಂಡಿರುವ ಪಿಂಕ್ ಲೈನ್‌ಗೆ ಹೊಸ ರೈಲು ಬೋಗಿಗಳು ಆಗಮಿಸಿರುವುದು ಒಂದು ಕಡೆ ಸಂತಸದ ವಿಚಾರ. ಆದರೆ ಇದೇ ಸಮಯದಲ್ಲಿ ನಮ್ಮ ಮೆಟ್ರೋ ಪ್ರಯಾಣಿಕರಿಗೆ ದರ ಏರಿಕೆಯ ಶಾಕ್ ಕೂಡ ಎದುರಾಗಿದೆ.

ಬಿಎಂಆರ್‌ಸಿಎಲ್ ಸಲ್ಲಿಸಿದ್ದ ಪ್ರಸ್ತಾವನೆಯನ್ನು ಪರಿಶೀಲಿಸಿದ ರಾಜ್ಯ ಸರ್ಕಾರ (Karnataka Government), ಟಿಕೆಟ್ ದರವನ್ನು (Ticket Price) ಶೇಕಡಾ 5ರಷ್ಟು ಹೆಚ್ಚಿಸಲು ಅನುಮತಿ ನೀಡಿದೆ. ಇದರಿಂದ ಫೆಬ್ರವರಿ 9ರಿಂದಲೇ ಹೊಸ ದರ ಜಾರಿಯಾಗಲಿದೆ.

ಎಷ್ಟು ಹೆಚ್ಚಳವಾಗಲಿದೆ?

ಮೆಜೆಸ್ಟಿಕ್‌ನಿಂದ ವೈಟ್‌ಫೀಲ್ಡ್‌ವರೆಗೆ ಈಗಿರುವ 80 ರೂಪಾಯಿ ದರ 84 ರೂಪಾಯಿಗೆ ಏರಲಿದೆ. 10 ರೂಪಾಯಿ ಕನಿಷ್ಠ ದರ 11 ರೂಪಾಯಿಯಾಗಲಿದೆ. 90 ರೂಪಾಯಿ ಟಿಕೆಟ್ 95 ರೂಪಾಯಿಯಾಗಲಿದೆ. ಬೊಮ್ಮಸಂದ್ರ ಹಾಗೂ ಚಲ್ಲಘಟ್ಟ ಮಾರ್ಗಗಳಲ್ಲೂ ಇದೇ ಪ್ರಮಾಣದ ಏರಿಕೆ ಅನ್ವಯವಾಗಲಿದೆ.

ಪ್ರತಿದಿನ ಮೆಟ್ರೋ ಬಳಸುವ ಉದ್ಯೋಗಿಗಳು ಮತ್ತು ವಿದ್ಯಾರ್ಥಿಗಳು ಈ ಹೆಚ್ಚಳದಿಂದ ತಿಂಗಳಿಗೆ ಹೆಚ್ಚುವರಿ ವೆಚ್ಚ ಎದುರಿಸಬೇಕಾಗಿದೆ.

ರಾಜಕೀಯ ಚರ್ಚೆ ಮತ್ತೆ ಜೋರು

ಕಳೆದ ವರ್ಷ ದರ ಏರಿಕೆಗೆ ಸಂಬಂಧಿಸಿದಂತೆ ರಾಜ್ಯ ಮತ್ತು ಕೇಂದ್ರ ಸರ್ಕಾರಗಳ ನಡುವೆ ಆರೋಪ–ಪ್ರತ್ಯಾರೋಪ ನಡೆದಿತ್ತು. ಈ ಬಾರಿ ಮಾತ್ರ ರಾಜ್ಯ ಸರ್ಕಾರವೇ ನೇರವಾಗಿ ಒಪ್ಪಿಗೆ ನೀಡಿರುವುದು ಗಮನಾರ್ಹ.

ಈಗಾಗಲೇ ದೇಶದ ಅತ್ಯಂತ ದುಬಾರಿ ಮೆಟ್ರೋ ವ್ಯವಸ್ಥೆ ಎಂಬ ಟೀಕೆಗೆ ಗುರಿಯಾಗಿರುವ ನಮ್ಮ ಮೆಟ್ರೋ, ಮತ್ತೆ ದರ ಹೆಚ್ಚಳ ಮಾಡಿರುವುದು ಪ್ರಯಾಣಿಕರಲ್ಲಿ ಅಸಮಾಧಾನ ಮೂಡಿಸಿದೆ. ಆದರೂ, ಉತ್ತಮ ಸೇವೆ ಹಾಗೂ ಹೊಸ ಮಾರ್ಗಗಳ ಅಭಿವೃದ್ಧಿಗೆ ಇದು ಅಗತ್ಯ ಎಂದು ಅಧಿಕಾರಿಗಳು ಸಮರ್ಥಿಸುತ್ತಿದ್ದಾರೆ.