ಬೆಂಗಳೂರು ರಸ್ತೆಗಳು ಜಲಾವೃತ, ಇನ್ನೂ 4 ದಿನ ಭಾರೀ ಮಳೆ
ಬೆಂಗಳೂರು ನಗರದಲ್ಲಿ ಎರಡು ದಿನಗಳ ಭಾರಿ ಮಳೆಗೆ ರಸ್ತೆಗಳು ಜಲಾವೃತಗೊಂಡಿದ್ದು, ಮರಗಳು ಬಿದ್ದು ಸಂಚಾರಕ್ಕೆ ತೊಂದರೆ ಉಂಟಾಗಿದೆ. ಮನೆಗಳಿಗೆ ನೀರು ನುಗ್ಗಿ ಜನಜೀವನ ಅಸ್ತವ್ಯಸ್ತವಾಗಿದೆ.
- ಮಹದೇವಪುರ, ಸಾಯಿ ಲೇಔಟ್ ನಲ್ಲಿ 4-5 ಅಡಿ ನೀರು
- ಮರಗಳು ಬಿದ್ದು ಕಾರು-ಜೀಪುಗಳ ಜಖಂ
- ಸಿಲ್ಕ್ ಬೋರ್ಡ್‌ನಲ್ಲಿ 10 ಕಿ.ಮೀ. ಟ್ರಾಫಿಕ್ ಜಾಮ್
ಬೆಂಗಳೂರು (Bengaluru) ನಗರದಾದ್ಯಂತ ಭಾನುವಾರ ಸುರಿದ ಭಾರಿ ಮಳೆಯ ಪರಿಣಾಮವಾಗಿ ಜನಜೀವನ ಸಂಪೂರ್ಣ ಅಸ್ತವ್ಯಸ್ತವಾಗಿದೆ. ಶನಿವಾರ ರಾತ್ರಿ ಆರಂಭವಾದ ಮಳೆಯು (Bengaluru Rain) ಭಾನುವಾರದವರೆಗೆ ನಿಂತಿಲ್ಲ. ನಗರದಲ್ಲಿರುವ ಪ್ರಮುಖ ರಸ್ತೆಗಳಲ್ಲಿ ನೀರು ತುಂಬಿ ನಿಂತಿರುವ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ (viral) ಆಗಿವೆ.
ವಾಹನ ಸಂಚಾರ ತೀವ್ರವಾಗಿ ಅಡಚಣೆಗೆ ಒಳಗಾಗಿದ್ದು, ಸಿಲ್ಕ್ ಬೋರ್ಡ್‌ ರಸ್ತೆಯಲ್ಲಿ ಸೋಮವಾರ ಮುಂಜಾನೆ 7.20ರ ಹೊತ್ತಿಗೆ 10 ಕಿಲೋಮೀಟರ್‌ನಷ್ಟು ಉದ್ದದ ಟ್ರಾಫಿಕ್ ಜಾಮ್ ಕಂಡುಬಂದಿತು. ಈ ದೃಶ್ಯವನ್ನು ಬೆಂಗಳೂರು ಕಾರ್ಪೋರೇಟ್ ಕ್ಲಬ್‌ ‘ಎಕ್ಸ್’ನಲ್ಲಿ ಹಂಚಿಕೊಂಡಿದೆ. ವಾಹನ ಸವಾರರು (commuters) ಕಿಲೋಮೀಟರ್‌ಗಳಷ್ಟು ದೂರ ತಳ್ಳಿಕೊಂಡು ಸಾಗಬೇಕಾದ ಪರಿಸ್ಥಿತಿ ನಿರ್ಮಾಣವಾಯಿತು.
ಮಹದೇವಪುರ ವಲಯದಲ್ಲಿರುವ ಸಾಯಿ ಲೇಔಟ್ ಪ್ರದೇಶದ ಪರಿಸ್ಥಿತಿ ಮತ್ತಷ್ಟು ಗಂಭೀರವಾಗಿದೆ. ಅಲ್ಲಿನ ನಿವಾಸಿಗಳ ಪ್ರಕಾರ, ರಸ್ತೆಗಳಲ್ಲಿಯೇ 4-5 ಅಡಿ ನೀರು ತುಂಬಿ ಜಲಾವೃತವಾಗಿದೆ. ‘ಚರಂಡಿಗಳು ಮುಚ್ಚಿ ಹೋಗಿರುವ ಕಾರಣ ನೀರು ಹರಿಯುತ್ತಿಲ್ಲ. ಅಧಿಕಾರಿಗಳಿಗೆ ಪದೇಪದೇ ದೂರು ನೀಡಿದರೂ ಪ್ರತಿಕ್ರಿಯೆ ಇಲ್ಲ’ ಎಂದು ಸ್ಥಳೀಯರು ಗಂಭೀರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಜಯನಗರದಲ್ಲಿ ನಿಲ್ಲಿಸಿದ್ದ ಕಾರು ಹಾಗೂ ಜೀಪ್‌ಗಳ ಮೇಲೆ ಮರ ಬಿದ್ದು ಅಪಾಯಕಾರಿ ಪರಿಸ್ಥಿತಿ ನಿರ್ಮಾಣವಾಯಿತು. ಅದೃಷ್ಟವಶಾತ್ ಯಾವುದೇ ಪ್ರಾಣಹಾನಿ ಸಂಭವಿಸಿಲ್ಲ. ಇದೇ ರೀತಿಯಲ್ಲಿ ಮೌಂಟ್ ಕಾರ್ಮೆಲ್ ಸ್ಕೂಲ್ ರಸ್ತೆಯ ಬಳಿಯ ಈಸ್ಟ್ ಎಂಡ್ ರಸ್ತೆಯಲ್ಲಿ ಉರುಳಿದ ಮತ್ತೊಂದು ಮರ, ಪರಿಣಾಮ ವಾಹನ ಸಂಚಾರ ತಾತ್ಕಾಲಿಕವಾಗಿ ಸ್ಥಗಿತಗೊಂಡಿದೆ.
ಪಣತ್ತೂರು ಎಸ್ ಕ್ರಾಸ್, ದೊಮ್ಮಲೂರು ಫ್ಲೈಓವರ್ ಹಾಗೂ ಕೋರಮಂಗಲ ಪ್ರದೇಶಗಳಲ್ಲಿ ಜಲಾವೃತವಾಗಿದೆ. ಜನರು ತಮ್ಮ ಕಾರುಗಳನ್ನು ತಳ್ಳುತ್ತಾ ಹೋಗುತ್ತಿರುವ ದೃಶ್ಯಗಳು ಎಲ್ಲೆಡೆ ಕಂಡುಬರುತ್ತಿತ್ತು. ಮಾನ್ಯತಾ ಟೆಕ್ ಪಾರ್ಕ್ ಹತ್ತಿರವೂ ಸಂಚಾರ ನಿಧಾನವಾಗಿದೆ.
Silk board today at 7:20 AM.
Monday morning traffic due to heavy rains at Bengaluru yesterday night #bengalururains #mondaytraffic #silkboard pic.twitter.com/ZWJYn1Kpxj
— Bengaluru Corporate Club (@blr_corp_club) May 19, 2025
ಕಳೆದ 24 ಗಂಟೆಗಳಲ್ಲಿ ಬೆಂಗಳೂರಿನಲ್ಲಿ 103 ಮಿ.ಮೀ ಮಳೆಯಾಗಿದೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ. ಮುಂಗಾರು ಪೂರ್ವ ಮಳೆಯ ಹಿನ್ನೆಲೆಯಲ್ಲಿ ಈ ಪರಿಸ್ಥಿತಿ ಸಾಮಾನ್ಯವೆನ್ನಲಾಗಿದೆ. ಆದರೆ, ನಗರ ದೋಷಪೂರ್ಣ ಚರಂಡಿ ವ್ಯವಸ್ಥೆ ಹಾಗೂ ನಿರ್ವಹಣಾ ಕೊರತೆಯಿಂದ ಪ್ರತೀ ವರ್ಷ ಈ ಸ್ಥಿತಿ ಮರುಕಳಿಸುತ್ತಿದೆ.
ಬಿಬಿಎಂಪಿ ಅಧಿಕಾರಿಗಳು ತೆರವು ಕಾರ್ಯಾಚರಣೆ ನಡೆಸುತ್ತಿರುವುದಾಗಿ ಗೃಹ ಸಚಿವ ಜಿ ಪರಮೇಶ್ವರ್ ಹೇಳಿದ್ದಾರೆ. ಮಳೆಯ ಪರಿಣಾಮ ತಕ್ಷಣಕ್ಕೆ ತಲೆ ಎತ್ತಿದ ಸಮಸ್ಯೆಗಳಿಗೆ ತಾತ್ಕಾಲಿಕ ಪರಿಹಾರ ನೀಡಲಾಗುತ್ತಿದೆ. ಇದೇ ವೇಳೆ, ರಾಜ್ಯದ (Karnataka Rain Update) 23 ಜಿಲ್ಲೆಗಳಲ್ಲಿ ಮುಂದಿನ ನಾಲ್ಕು ದಿನ ಭಾರಿ ಮಳೆ ಸುರಿಯುವ ಸಾಧ್ಯತೆ ಇದೆ ಎಂದು ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ.
Heavy Rain Throws Bengaluru Off Track
