Bengaluru: ಬೆಂಗಳೂರು ಸಂಜಯ್ ನಗರದಲ್ಲಿ ದಾರುಣ ಘಟನೆ! ತಾಯಿ–ಮಗು ಬೆಂಕಿಗೆ ಆಹುತಿ
ಪತಿಯೊಂದಿಗೆ ನಡೆದ ಗಂಭೀರ ಕಲಹದ ಹಿನ್ನೆಲೆಯಲ್ಲಿ ಬೆಂಗಳೂರಿನ ಸಂಜಯ್ ನಗರದಲ್ಲಿ ತಾಯಿ ತನ್ನ ನಾಲ್ಕು ವರ್ಷದ ಮಗಳೊಂದಿಗೆ ಬೆಂಕಿ ಹಚ್ಚಿಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ
- ಸಂಜಯ್ ನಗರ ಘಟನೆ: ತಾಯಿ–ಮಗು ಬೆಂಕಿಗೆ ಆಹುತಿ
- ಕುಟುಂಬ ಕಲಹ: ಪತಿ–ಪತ್ನಿ ನಡುವಿನ ಜಗಳ ಹಿನ್ನೆಲೆ
- ಬೆಂಗಳೂರು ಅಪರಾಧ ಸುದ್ದಿ: ಪೊಲೀಸ್ ತನಿಖೆ ಆರಂಭ
ಬೆಂಗಳೂರು (Bengaluru) : ಬೆಂಗಳೂರು ಸಂಜಯ್ ನಗರ ಠಾಣಾ ವ್ಯಾಪ್ತಿಯ ಕೃಷ್ಣಪ್ಪ ಲೇಔಟ್‌ನಲ್ಲಿ ಗುರುವಾರ ಸಂಜೆ ಹೃದಯವಿದ್ರಾವಕ ಘಟನೆ ನಡೆದಿದೆ. ಪತಿಯೊಂದಿಗೆ ನಡೆದ ತೀವ್ರ ಮನಸ್ತಾಪದ ನಂತರ, 29 ವರ್ಷದ ಸೀತಾ ತನ್ನ ನಾಲ್ಕು ವರ್ಷದ ಮಗಳು ಸೃಷ್ಟಿಯೊಂದಿಗೆ ಬೆಂಕಿ ಹಚ್ಚಿಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.
ನೇಪಾಳ ಮೂಲದ ಗೋವಿಂದ್ ಬಹದ್ದೂರ್ ಹಾಗೂ ಸೀತಾ ದಂಪತಿ ಸಂಜಯ್ ನಗರದಲ್ಲಿನ ಮನೆಯೊಂದರಲ್ಲಿ ಕೆಲಸ ಮಾಡಿಕೊಂಡು, ಅದೇ ಮನೆಯ ಪಕ್ಕದಲ್ಲಿನ ಸಣ್ಣ ಮನೆಯಲ್ಲಿ ವಾಸಿಸುತ್ತಿದ್ದರು. ಗೋವಿಂದ್ ಬಹದ್ದೂರ್ ಕೆಲಸದ ನಿಮಿತ್ತ ನೇಪಾಳಕ್ಕೆ ಆಗಾಗ್ಗೆ ತೆರಳಿ ತಿಂಗಳುಗಟ್ಟಲೆ ಮರಳಿ ಬಾರದಿರುವುದು ದಂಪತಿಗಳ ನಡುವೆ ನಿರಂತರ ಜಗಳಕ್ಕೆ ಕಾರಣವಾಗುತ್ತಿತ್ತು ಎಂದು ಸ್ಥಳೀಯರು ಹೇಳಿದ್ದಾರೆ.
ಕೊನೆಯ ಫೋನ್ ಕರೆ
ಘಟನೆಗೆ ಮುನ್ನದಿನವೂ ಪತಿ–ಪತ್ನಿ ನಡುವೆ ದೂರವಾಣಿ ಮೂಲಕ ಗಂಭೀರ ವಾಗ್ವಾದ ನಡೆದಿತ್ತು ಎನ್ನಲಾಗಿದೆ. ಮಾನಸಿಕವಾಗಿ ಕುಗ್ಗಿಹೋಗಿದ್ದ ಸೀತಾ, ಬಳಿಕ ತನ್ನ ಮೇಲೆ ಮತ್ತು ಮಗಳ ಮೇಲೆ ಪೆಟ್ರೋಲ್ ಸುರಿದು ಬೆಂಕಿ ಹಚ್ಚಿಕೊಂಡಿದ್ದಾರೆ.
ಸೀತಾ ಸ್ಥಳದಲ್ಲೇ ಮೃತಪಟ್ಟರೆ, ಗಂಭೀರವಾಗಿ ಗಾಯಗೊಂಡಿದ್ದ ಸೃಷ್ಟಿಯನ್ನು ಆಸ್ಪತ್ರೆಗೆ ದಾಖಲಿಸಲಾಯಿತು. ಆದರೆ ಚಿಕಿತ್ಸೆ ಫಲಕಾರಿಯಾಗದೆ ಶುಕ್ರವಾರ ಬೆಳಗ್ಗೆ ಮಗಳು ಸಹ ಅಸುನೀಗಿದ್ದಾಳೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಸಂಜಯ್ ನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಆತ್ಮಹತ್ಯೆಗೆ ಕಾರಣವಾದ ಸನ್ನಿವೇಶಗಳ ಕುರಿತು ತನಿಖೆ ಮುಂದುವರಿದಿದೆ. ಇತ್ತೀಚಿನ ದಿನಗಳಲ್ಲಿ ನಗರದಲ್ಲಿ ಕುಟುಂಬ ಕಲಹದಿಂದ ಉಂಟಾಗುತ್ತಿರುವ ಇಂತಹ ದುರ್ಘಟನೆಗಳು ಸಾರ್ವಜನಿಕರಲ್ಲಿ ಆತಂಕ ಮೂಡಿಸುತ್ತಿವೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.
