ಬೆಂಗಳೂರು ಇಂದಿರಾನಗರದಲ್ಲಿ ಎಟಿಎಂ ದರೋಡೆಗೆ ಯತ್ನ! ವ್ಯಕ್ತಿ ಬಂಧನ
ಇಂದಿರಾನಗರದ ಬ್ಯಾಂಕ್ ಆಫ್ ಬರೋಡಾ ಎಟಿಎಂನಲ್ಲಿ ಮಧ್ಯರಾತ್ರಿ ದರೋಡೆ ಯತ್ನ ನಡೆಸಿದ ನೇಪಾಳಿ ಪ್ರಜೆ ರಾಜೇಂದ್ರ ಸಿಂಗ್ ಬಂಧನವಾಗಿದ್ದು, ಸಿಸಿಟಿವಿ ಮುಚ್ಚಿ ಕಟ್ಟಿಂಗ್ ಮಷೀನ್ ಬಳಸಿ ಕಳವು ಮಾಡಲು ಯತ್ನಿಸಿದ್ದಾನೆ.
- ಎಟಿಎಂ ದರೋಡೆ ಯತ್ನ
- ನೇಪಾಳಿ ಪ್ರಜೆ ಬಂಧನ
- ಸಿಸಿಟಿವಿ ಮುಚ್ಚಿ ಕಳವು ಯತ್ನ
ಬೆಂಗಳೂರು (Bengaluru): ಬೆಂಗಳೂರು ನಗರದಲ್ಲಿ ಇತ್ತೀಚೆಗೆ ನಡೆದ ಎಟಿಎಂ ದರೋಡೆ (ATM Robbery Attempt) ಪ್ರಕರಣದ ಬೆನ್ನಲ್ಲೇ ಮತ್ತೊಂದು ಯತ್ನ ಬೆಳಕಿಗೆ ಬಂದಿದೆ. ಇಂದಿರಾನಗರದ ಡಬಲ್ ರೋಡ್ ಸಮೀಪ ಇರುವ ಬ್ಯಾಂಕ್ ಆಫ್ ಬರೋಡಾ ಎಟಿಎಂನಲ್ಲಿ ಮಧ್ಯರಾತ್ರಿ ಕಳ್ಳತನಕ್ಕೆ ಪ್ರಯತ್ನಿಸಿದ ಆರೋಪಿಯನ್ನು ಪೊಲೀಸರು ಬಂಧಿಸಿದ್ದಾರೆ.
ಬಂಧಿತನನ್ನು ನೇಪಾಳ ಮೂಲದ 23 ವರ್ಷದ ರಾಜೇಂದ್ರ ಸಿಂಗ್ ಎಂದು ಗುರುತಿಸಲಾಗಿದೆ. ಫೆಬ್ರವರಿ 10ರಂದು ರಾತ್ರಿ ಎಟಿಎಂ ಶಟ್ಟರ್ ಮುಚ್ಚಿ ಒಳಗೆ ಪ್ರವೇಶಿಸಿದ್ದ ಆತ, ಕಟ್ಟಿಂಗ್ ಮಷೀನ್ ಸಹಾಯದಿಂದ ಯಂತ್ರ ಒಡೆದು ಹಣ ಕಳವು ಮಾಡಲು ಯತ್ನಿಸಿದ್ದಾನೆ. ಒಳಗಿದ್ದ ಸಿಸಿಟಿವಿ ಕ್ಯಾಮೆರಾಗಳನ್ನು ಬಟ್ಟೆ ಹಾಗೂ ಟೇಪ್ ಬಳಸಿ ಮುಚ್ಚಿರುವುದು ತನಿಖೆಯಲ್ಲಿ ಬಹಿರಂಗವಾಗಿದೆ.
ಆದರೆ ಯಂತ್ರವನ್ನು ಸಂಪೂರ್ಣವಾಗಿ ಒಡೆಯಲು ಸಾಧ್ಯವಾಗದೇ ಯಾವುದೇ ಹಣ ಸಿಗದೇ ಆರೋಪಿಯ ಯತ್ನ ವಿಫಲವಾಗಿದೆ. ಬಳಿಕ ಆತ ಸ್ಥಳದಿಂದ ಪರಾರಿಯಾಗಿದ್ದನು. ಪ್ರಕರಣ ದಾಖಲಿಸಿಕೊಂಡ ಇಂದಿರಾನಗರ ಪೊಲೀಸರು ಸಿಸಿಟಿವಿ ದೃಶ್ಯ ಹಾಗೂ ತಾಂತ್ರಿಕ ಮಾಹಿತಿಗಳ ಆಧಾರದ ಮೇಲೆ ಆರೋಪಿಯನ್ನು ಪತ್ತೆಹಚ್ಚಿ ಬಂಧಿಸಿದ್ದಾರೆ.
ಪೊಲೀಸರ ವಿಚಾರಣೆಯಲ್ಲಿ ಆತ ನಗರದಲ್ಲಿನ ನಾಗಾರ್ಜುನ ಹೋಟೆಲ್ ಕಿಚನ್‌ನಲ್ಲಿ ಕೆಲಸ ಮಾಡುತ್ತಿದ್ದುದಾಗಿ ತಿಳಿಸಿದ್ದಾನೆ. ನ್ಯಾಯಾಲಯಕ್ಕೆ ಹಾಜರುಪಡಿಸಿದ ಬಳಿಕ ಆರೋಪಿಯನ್ನು ನ್ಯಾಯಾಂಗ ಬಂಧನಕ್ಕೆ ಕಳುಹಿಸಲಾಗಿದೆ.
ಒಟ್ಟಿನಲ್ಲಿ ನಗರದಲ್ಲಿ ಎಟಿಎಂ ಭದ್ರತೆ ಕುರಿತಂತೆ ಮತ್ತೆ ಆತಂಕ ಮೂಡಿದ್ದು, ಪೊಲೀಸರು ಹೆಚ್ಚುವರಿ ನಿಗಾವಹಿಸಲು ಮುಂದಾಗಿದ್ದಾರೆ.
