ಬೆಂಗಳೂರು ಫ್ರೀಡಂ ಪಾರ್ಕ್ ಬಾಡಿಗೆ ನೀಡಲು ಯೋಜನೆ! ಜಿಬಿಎ ವಿರುದ್ಧ ಆಕ್ರೋಶ
ಪ್ರತಿಭಟನೆಗಳಿಗೆ ಮೀಸಲಾದ ಬೆಂಗಳೂರು ಫ್ರೀಡಂ ಪಾರ್ಕ್ ಆವರಣವನ್ನು ವಾಣಿಜ್ಯ ಬಳಕೆಗೆ ಬಾಡಿಗೆ ನೀಡಲು ಜಿಬಿಎ ಚಿಂತನೆ ನಡೆಸಿದೆ. ಆದಾಯ ಕೊರತೆ ನೆಪದ ಈ ನಿರ್ಧಾರಕ್ಕೆ ಹೋರಾಟ ಸಮಿತಿ ಹಾಗೂ ನಾಗರಿಕರಿಂದ ತೀವ್ರ ವಿರೋಧ ವ್ಯಕ್ತವಾಗಿದೆ.
- ಫ್ರೀಡಂ ಪಾರ್ಕ್ ಬಾಡಿಗೆ ಯೋಜನೆ
- ಜಿಬಿಎ ಆದಾಯ ಕೊರತೆ ಕಾರಣ
- ಪ್ರತಿಭಟನೆ ಸ್ಥಳದ ವಾಣಿಜ್ಯೀಕರಣ
ಬೆಂಗಳೂರು (Bengaluru): ನಗರದ ಹೃದಯ ಭಾಗದಲ್ಲಿರುವ ಫ್ರೀಡಂ ಪಾರ್ಕ್ ಮತ್ತೆ ಚರ್ಚೆಯ ಕೇಂದ್ರವಾಗಿದೆ. ಪ್ರತಿಭಟನೆಗಳಿಗಾಗಿ ಮೀಸಲಾದ ಈ ಐತಿಹಾಸಿಕ ಸ್ಥಳವನ್ನು ಇದೀಗ ಬಾಡಿಗೆಗೆ ನೀಡುವ ವಿಚಾರ ಮುನ್ನೆಲೆಗೆ ಬಂದಿದ್ದು, ಸಾರ್ವಜನಿಕ ವಲಯದಲ್ಲಿ ಅಸಮಾಧಾನ ಹೆಚ್ಚಾಗಿದೆ.
ನಗರದಲ್ಲಿ ಯಾವುದೇ ಸಂಘಟನೆ ಅಥವಾ ರಾಜಕೀಯ ಪಕ್ಷ ಪ್ರತಿಭಟನೆ ನಡೆಸಬೇಕಾದರೆ ಮೊದಲಿಗೆ ನೆನಪಾಗುವ ಸ್ಥಳವೇ ಫ್ರೀಡಂ ಪಾರ್ಕ್. ಸಾವಿರಾರು ಜನ ಸೇರಬಹುದಾದ ಸಭಾಂಗಣ, ತೆರೆಯಾದ ಆವರಣ, ಇವೆಲ್ಲವೂ ಜನರ ಧ್ವನಿಗೆ ವೇದಿಕೆ ಒದಗಿಸುತ್ತಿವೆ. ಆದರೆ ಇದೇ ಜಾಗವನ್ನು ವಾಣಿಜ್ಯ ಕಾರ್ಯಕ್ರಮಗಳಿಗೆ ಬಳಸುವ ಚಿಂತನೆ ಜಿಬಿಎ (GBA) ಮಟ್ಟದಲ್ಲಿ ನಡೆದಿದೆ ಎನ್ನಲಾಗಿದೆ.
ಆದಾಯ ಕೊರತೆ ನೆಪ?
ಜಿಬಿಎ ಅಡಿಯಲ್ಲಿ ಇರುವ ಐದು ನಗರ ಪಾಲಿಕೆಗಳಿಗೆ ಎದುರಾಗಿರುವ ಆದಾಯ ಕೊರತೆಯನ್ನು ನೀಗಿಸಲು ಪರ್ಯಾಯ ಮಾರ್ಗಗಳನ್ನು ಹುಡುಕಲಾಗುತ್ತಿದೆ. ಅದರ ಭಾಗವಾಗಿ ಫ್ರೀಡಂ ಪಾರ್ಕ್ ಆವರಣದ ಪಾರ್ಕಿಂಗ್ ಮೇಲ್ಭಾಗದ ಜಾಗವನ್ನು ಬಾಡಿಗೆಗೆ ನೀಡುವ ಯೋಚನೆ ಮುಂದಾಗಿದೆ ಎಂದು ಮೂಲಗಳು ತಿಳಿಸಿವೆ.
ಆದರೆ ಮಲ್ಟಿ ಲೆವೆಲ್ ಪಾರ್ಕಿಂಗ್ ನಿರ್ಮಾಣಕ್ಕೂ ಮುನ್ನ ಈ ಪ್ರದೇಶವನ್ನು ಪ್ರತಿಭಟನೆಗಳಿಗೆ ಮಾತ್ರ ಮೀಸಲಿಡಬೇಕು ಎಂಬ ನಿರ್ಧಾರ ಕೈಗೊಳ್ಳಲಾಗಿತ್ತು. ಅದಕ್ಕಾಗಿ ಸುಮಾರು 10 ಸಾವಿರ ಮಂದಿ ಕುಳಿತುಕೊಳ್ಳುವ ಸಭಾಂಗಣವೂ ನಿರ್ಮಿಸಲಾಗಿದೆ. ಇದೀಗ ಅದೇ ಜಾಗವನ್ನು ವಾಣಿಜ್ಯ ಬಳಕೆಗೆ ಒಪ್ಪಿಸುವುದು ಜನರಲ್ಲಿ ಅನುಮಾನ ಹುಟ್ಟಿಸಿದೆ.
ಹೋರಾಟ ಸಮಿತಿ ಎಚ್ಚರಿಕೆ
ಇದೀಗಲೇ ಫ್ರೀಡಂ ಪಾರ್ಕ್‌ನಲ್ಲಿ ಕುಡಿಯುವ ನೀರು, ಶೌಚಾಲಯ ಸೇರಿದಂತೆ ಮೂಲ ಸೌಕರ್ಯಗಳ ಕೊರತೆ ಇದೆ ಎಂಬ ಆರೋಪ ಕೇಳಿಬರುತ್ತಿದೆ. ಹಲವಾರು ಬಾರಿ ಸ್ಥಳಾವಕಾಶದ ಅಭಾವದಿಂದ ಪ್ರತಿಭಟನಾಕಾರರು ಸಂಕಷ್ಟ ಅನುಭವಿಸಿದ್ದಾರೆ. ಹೀಗಿರುವಾಗ ಆದಾಯದ ಕೊರತೆ ನೆಪವೊಡ್ಡಿ ಸ್ಥಳವನ್ನು ಬಾಡಿಗೆಗೆ ನೀಡುವುದು ಸರಿಯಲ್ಲ ಎಂದು ಫ್ರೀಡಂ ಪಾರ್ಕ್ ಹೋರಾಟ ಸಮಿತಿ ಆಕ್ರೋಶ ವ್ಯಕ್ತಪಡಿಸಿದೆ.
“ಪ್ರತಿಭಟನೆಯ ಧ್ವನಿಯನ್ನು ಕುಗ್ಗಿಸುವ ಯಾವುದೇ ಕ್ರಮವನ್ನು ನಾವು ಒಪ್ಪುವುದಿಲ್ಲ,” ಎಂದು ಸಮಿತಿ ಅಧ್ಯಕ್ಷ ಗಂಡಸಿ ಸದಾನಂದಸ್ವಾಮಿ ಸ್ಪಷ್ಟಪಡಿಸಿದ್ದಾರೆ. ನಗರದಲ್ಲಿನ ಏಕೈಕ ಅಧಿಕೃತ ಪ್ರತಿಭಟನೆ ವೇದಿಕೆಯನ್ನು ವಾಣಿಜ್ಯೀಕರಣಗೊಳಿಸುವ ನಿರ್ಧಾರ ಮರುಪರಿಶೀಲಿಸಬೇಕು ಎಂಬುದು ಅವರ ಒತ್ತಾಯವಾಗಿದೆ.
ನಗರದ ನಾಗರಿಕ ವಲಯದಲ್ಲಿಯೂ ಈ ವಿಚಾರ ಚರ್ಚೆಗೆ ಗ್ರಾಸವಾಗಿದ್ದು, ಮುಂದಿನ ದಿನಗಳಲ್ಲಿ ಈ ನಿರ್ಧಾರ ರಾಜಕೀಯ ಚರ್ಚೆಗೂ ಕಾರಣವಾಗುವ ಸಾಧ್ಯತೆ ಇದೆ.
