ಬೆಂಗಳೂರು ಮಾರುಕಟ್ಟೆಯಲ್ಲಿ ತರಕಾರಿ ಬೆಲೆ ಗಗನಕ್ಕೆ! ಗ್ರಾಹಕರ ಜೇಬಿಗೆ ಭಾರೀ ಹೊರೆ

ಬೆಂಗಳೂರು, ಜೂನ್ 26: ರಾಜಧಾನಿ ಬೆಂಗಳೂರಿನಲ್ಲಿ ದಿನನಿತ್ಯದ ಅಡುಗೆಗೆ ಬಳಸುವ ತರಕಾರಿಗಳ ಬೆಲೆ ಮತ್ತೆ ಭಾರೀ ಏರಿಕೆ ಕಂಡಿದ್ದು, ಸಾಮಾನ್ಯ ಜನರ ಬಜೆಟ್ ಅಸ್ತವ್ಯಸ್ತವಾಗಿದೆ. ವಿಶೇಷವಾಗಿ ಬದನೆಕಾಯಿ, ಬೀನ್ಸ್, ಬೆಳ್ಳುಳ್ಳಿ ಹಾಗೂ ಶುಂಠಿಯ ದರಗಳು ದಾಖಲೆ ಮಟ್ಟ ತಲುಪಿದ್ದು, ಗ್ರಾಹಕರು ಮಾರುಕಟ್ಟೆಯಲ್ಲಿ ಬೆಲೆ ಕೇಳಿ ಬೆಚ್ಚಿಬೀಳುವಂತಾಗಿದೆ.

ರಾಜ್ಯದಲ್ಲಿ ಮುಂಗಾರು ಮಳೆಯ ಅಸ್ಥಿರತೆ ತರಕಾರಿ ಉತ್ಪಾದನೆ ಮೇಲೆ ಪರಿಣಾಮ ಬೀರಿದೆ. ಕೆಲವು ಪ್ರದೇಶಗಳಲ್ಲಿ ಅತಿವೃಷ್ಟಿಯಿಂದ ಬೆಳೆ ಹಾನಿಯಾಗಿದ್ದರೆ, ಇನ್ನೂ ಕೆಲವು ಕಡೆ ಸಮರ್ಪಕ ಮಳೆಯ ಕೊರತೆಯಿಂದ ಇಳುವರಿ ಕುಸಿದಿದೆ. ಪರಿಣಾಮವಾಗಿ ಮಾರುಕಟ್ಟೆಗೆ ತರಕಾರಿ ಪೂರೈಕೆ ಕಡಿಮೆಯಾಗಿದ್ದು, ಬೆಲೆಗಳು ಒಂದೇ ಸಮನೆ ಏರಿಕೆಯಾಗಿವೆ.

ಇತಿಹಾಸದಲ್ಲೇ ಮೊದಲ ಬಾರಿಗೆ ಬಿಳಿ ಬದನೆಕಾಯಿ ಬೆಲೆ ಕೆಜಿಗೆ ₹100ರಿಂದ ₹140ರವರೆಗೆ ಏರಿಕೆಯಾಗಿದೆ. ಬೀನ್ಸ್, ಶುಂಠಿ, ಬೆಳ್ಳುಳ್ಳಿ ಹಾಗೂ ಬಟಾಣಿ ಬೆಲೆಗಳು ಸುಮಾರು ₹200ರ ಗಡಿ ತಲುಪಿವೆ. ಹಸಿಮೆಣಸಿನಕಾಯಿ ₹120ಕ್ಕೆ ಏರಿಕೆಯಾಗಿದ್ದರೆ, ನುಗ್ಗೆಕಾಯಿ ಮತ್ತು ಕ್ಯಾಪ್ಸಿಕಂ ದರಗಳು ಕೂಡ ₹100ರ ಆಸುಪಾಸಿನಲ್ಲಿವೆ.

ಮಾರುಕಟ್ಟೆಗೆ ಬಂದ ಗ್ರಾಹಕರು ಬೆಲೆ ಏರಿಕೆ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. “ಸಂಬಳ ಅದೇ ಇದೆ, ಆದರೆ ಪ್ರತಿದಿನ ತರಕಾರಿ ದರ ಮಾತ್ರ ಏರುತ್ತಲೇ ಇದೆ. ಈಗ ಸಾಮಾನ್ಯ ಅಡುಗೆ ಮಾಡಲೂ ಎರಡು ಬಾರಿ ಯೋಚಿಸಬೇಕಾದ ಪರಿಸ್ಥಿತಿ ಬಂದಿದೆ” ಎಂದು ಹಲವರು ತಮ್ಮ ಅಳಲು ಹಂಚಿಕೊಂಡಿದ್ದಾರೆ. ವ್ಯಾಪಾರಿಗಳೂ ಸಹ ಪೂರೈಕೆ ಕೊರತೆಯಿಂದ ವ್ಯಾಪಾರ ಕುಂಠಿತಗೊಂಡಿದೆ ಎಂದು ಹೇಳಿದ್ದಾರೆ.

ಇದರ ನಡುವೆ ಗ್ರಾಹಕರಿಗೆ ಕೊಂಚ ಸಮಾಧಾನ ತಂದಿರುವುದು ಟೊಮೇಟೊ ಬೆಲೆ. ಕಳೆದ ವಾರ ₹60ರಿಂದ ₹70ರವರೆಗೆ ಏರಿಕೆಯಾಗಿದ್ದ ಟೊಮೇಟೊ ದರ ಈಗ ಮಾರುಕಟ್ಟೆಗೆ ಹೆಚ್ಚಿನ ಪ್ರಮಾಣದಲ್ಲಿ ಪೂರೈಕೆಯಾಗುತ್ತಿರುವ ಕಾರಣ ₹20ರಿಂದ ₹30ಕ್ಕೆ ಇಳಿದಿದೆ. ಆದರೆ ಉಳಿದ ಬಹುತೇಕ ತರಕಾರಿಗಳ ಬೆಲೆ ಏರಿಕೆಯಿಂದ ಮನೆ ಖರ್ಚಿನ ಲೆಕ್ಕಾಚಾರವೇ ಬದಲಾಗಿದೆ.