ಬೆಂಗಳೂರು: ಆನ್ಲೈನ್ ಪರಿಚಯ, ಪ್ರೀತಿ ನಿರಾಕರಿಸಿದ್ದಕ್ಕಾಗಿ ಯುವತಿ ಮೇಲೆ ದಾಳಿ! ಆರೋಪಿ ಬಂಧನ
ಆನ್ಲೈನ್ ಪರಿಚಯದ ಬಳಿಕ ಪ್ರೀತಿಗೆ ಒತ್ತಡ ಹೇರಿದ ಯುವಕ ನಿರಾಕರಣೆ ಸಹಿಸದೆ ಪಿಜಿ ಹಾಸ್ಟಲ್ ಬಳಿ ಯುವತಿ ಮೇಲೆ ದಾಳಿ ನಡೆಸಿದ ಪ್ರಕರಣದಲ್ಲಿ ಪೊಲೀಸರು ಆರೋಪಿಯನ್ನು ಬಂಧಿಸಿದ್ದಾರೆ.
- ಪ್ರೀತಿ ನಿರಾಕರಣೆಯಿಂದ ಯುವತಿ ಮೇಲೆ ದಾಳಿ
- ಆನ್ಲೈನ್ ಪರಿಚಯವೇ ಕಾರಣವಾದ ಹಲ್ಲೆ
- ಬೆಂಗಳೂರು ಪೊಲೀಸರಿಂದ ಆರೋಪಿ ಬಂಧನ
ಬೆಂಗಳೂರು (ಡಿ.25): ಪ್ರೀತಿಗೆ ಒಪ್ಪದಿದ್ದಕ್ಕೆ ಕೋಪಗೊಂಡ ಯುವಕನೊಬ್ಬ ಯುವತಿ ಮೇಲೆ ದಾಳಿ ನಡೆಸಿದ ಘಟನೆ ಬೆಂಗಳೂರಿನ (Bengaluru) ಜ್ಞಾನಭಾರತಿ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ನಡೆದಿದೆ. ಆನ್ಲೈನ್ ಮೂಲಕ ಪರಿಚಯವಾದ ಬಳಿಕ ನಿರಂತರವಾಗಿ ಕಿರುಕುಳ ನೀಡುತ್ತಿದ್ದ ಆರೋಪಿಯನ್ನು ಪೊಲೀಸರು ಬಂಧಿಸಿದ್ದಾರೆ.
ಯುವತಿ ಟೆಲಿಕಾಲರ್ ಆಗಿ ಕೆಲಸ ಮಾಡುತ್ತಿದ್ದು, 2024ರಲ್ಲಿ ಇನ್ಸ್ಟಾಗ್ರಾಮ್ ಮೂಲಕ ನವೀನ್ಕುಮಾರ್ ಎಂಬ ಯುವಕನ ಪರಿಚಯವಾಗಿತ್ತು. ಆರಂಭದಲ್ಲಿ ಸ್ನೇಹದ ನೆಪದಲ್ಲಿ ಸಂಪರ್ಕದಲ್ಲಿದ್ದ ನವೀನ್ಕುಮಾರ್, ನಂತರ ಪ್ರೀತಿಸಬೇಕೆಂದು ಒತ್ತಡ ಹೇರುತ್ತಿದ್ದ ಎಂದು ಯುವತಿ ಪೊಲೀಸರಿಗೆ ದೂರು ನೀಡಿದ್ದಾಳೆ.
ದಾಳಿ ನಡೆದ ಕ್ಷಣ:
ಯುವತಿ ಪ್ರೇಮ ಪ್ರಸ್ತಾಪವನ್ನು ತಿರಸ್ಕರಿಸಿದ್ದರಿಂದ ಅಸಮಾಧಾನಗೊಂಡ ಆರೋಪಿ, ಕಳೆದ ಸೋಮವಾರ ಮಧ್ಯಾಹ್ನ ಪಿಜಿ ಹಾಸ್ಟಲ್ ಬಳಿ ಕಾರಿನಲ್ಲಿ ಬಂದು ಯುವತಿ ಜೊತೆ ಜಗಳವಾಡಿ ದಾಳಿ ನಡೆಸಿದ್ದಾನೆ. ಅಲ್ಲದೆ ಆಕೆಯ ಬ್ಯಾಗ್ ಅನ್ನು ಕಸಿದುಕೊಂಡು ಸ್ಥಳದಿಂದ ಪರಾರಿಯಾಗಿದ್ದಾನೆ.
ಸಿಸಿಟಿವಿಯಲ್ಲಿ ಸೆರೆಯಾದ ದೃಶ್ಯ:
ಘಟನೆಯ ಸಂಪೂರ್ಣ ದೃಶ್ಯ ಪಿಜಿ ಹಾಸ್ಟಲ್ನ ಸಿಸಿಟಿವಿ ಕ್ಯಾಮೆರಾದಲ್ಲಿ ದಾಖಲಾಗಿದ್ದು, ಅದನ್ನು ಆಧರಿಸಿ ಜ್ಞಾನಭಾರತಿ ಪೊಲೀಸರು ನವೀನ್ಕುಮಾರ್ನನ್ನು ಬುಧವಾರ ಬಂಧಿಸಿದ್ದಾರೆ. ಪ್ರಕರಣ ಸಂಬಂಧ ತನಿಖೆ ಮುಂದುವರಿದಿದೆ.
