Credit Card: ಕ್ರೆಡಿಟ್ ಕಾರ್ಡ್ ಈ ರೀತಿ ತಪ್ಪು ಬಳಕೆ ಮಾಡಿದ್ರೆ ಭವಿಷ್ಯದಲ್ಲಿ ಯಾವುದೇ ಸಾಲಗಳೂ ಸಿಗಲ್ಲ
ಆಫರ್‌ಗಳ ಮೋಜಿನಲ್ಲಿ ಅನಗತ್ಯ ಖರ್ಚು ಮಾಡಿದರೆ ಕ್ರೆಡಿಟ್ ಕಾರ್ಡ್ ಬಿಲ್ ಮಿತಿಮೀರಬಹುದು. 7 ರೀತಿಯ ಖರ್ಚುಗಳಿಗೆ ಕ್ರೆಡಿಟ್ ಕಾರ್ಡ್ ಬಳಸಬಾರದು ಎಂದು ತಜ್ಞರು ಎಚ್ಚರಿಕೆ ನೀಡುತ್ತಿದ್ದಾರೆ. ಈ ತಪ್ಪುಗಳು ಭಾರೀ ನಷ್ಟಕ್ಕೆ ದಾರಿ ತೋರಿಸುತ್ತವೆ.
Costly Credit: ಇಂದಿನ ಕಾಲದಲ್ಲಿ ಆಫರ್‌, ಡಿಸ್ಕೌಂಟ್‌, ಕ್ಯಾಶ್‌ಬ್ಯಾಕ್‌ಗಳ ಆಕರ್ಷಣೆ ಯಾರನ್ನಾದರೂ ಸೆಳೆಯುತ್ತದೆ. ಆದರೆ ಈ ಮೋಜು ಕೆಲವೊಮ್ಮೆ ಹಣಕಾಸಿನ ಒತ್ತಡಕ್ಕೆ ದಾರಿ ಮಾಡಿಕೊಡಬಹುದು. ತಜ್ಞರ ಪ್ರಕಾರ, ಏಳು ವಿಧದ ಖರ್ಚುಗಳಿಗೆ ಕ್ರೆಡಿಟ್ ಕಾರ್ಡ್ ಬಳಸದೇ ಇರುವುದು ಭವಿಷ್ಯದ ಹೊಣೆಗಾರಿಕೆಯನ್ನು ಕಡಿಮೆ ಮಾಡುತ್ತದೆ.
ಕ್ರೆಡಿಟ್ ಕಾರ್ಡ್ ಲಿಮಿಟ್ ಹೆಚ್ಚು ಇದೆ ಎಂದರೆ ಅದನ್ನೇ ಸಂಪೂರ್ಣವಾಗಿ ಬಳಕೆ ಮಾಡಬೇಕೆಂದಲ್ಲ. ಉದಾಹರಣೆಗೆ, 5 ಲಕ್ಷ ಲಿಮಿಟ್ ಇದ್ದಾಗ 4.5 ಲಕ್ಷ ಖರ್ಚು ಮಾಡಿದರೆ 90% ಉಪಯೋಗದಂತೆ ಕಾಣುತ್ತದೆ. ಇದು ಸಿಬಿಲ್ ಸ್ಕೋರ್, ಭವಿಷ್ಯದ ಸಾಲ, ಹಾಗೂ ಕಾರ್ಡ್ ಲಿಮಿಟ್ ಹೆಚ್ಚಳದ ಮೇಲೆ ನೇರ ಪರಿಣಾಮ ಬೀರುತ್ತದೆ. ಆದ್ದರಿಂದ 30% ಕ್ಕಿಂತ ಕಡಿಮೆ ಯೂಟಿಲೈಸೇಶನ್‌ ಇರಬೇಕು ಎಂದು ಹಣಕಾಸು ಪರಿಣಿತರು ಸೂಚಿಸುತ್ತಾರೆ.
ಅನಗತ್ಯ ಖರೀದಿಗಳು ಮತ್ತು ಎಟಿಎಂ ಕ್ಯಾಶ್ ವಿತ್‌ಡ್ರಾ
ಗ್ಯಾಡ್ಜೆಟ್‌, ಎಲೆಕ್ಟ್ರಾನಿಕ್ ಸಾಧನಗಳು ಅಥವಾ ಭಾರೀ ಗೃಹೋಪಯೋಗಿ ವಸ್ತುಗಳನ್ನು ಕ್ರೆಡಿಟ್ ಕಾರ್ಡ್ ಮೂಲಕ ಸಂಪೂರ್ಣವಾಗಿ ಕಂತಿನಲ್ಲಿ ತೆಗೆಯುವುದು ತಜ್ಞರು ಶಿಫಾರಸು ಮಾಡುವುದಿಲ್ಲ. ಕೆಲವು ಮೊತ್ತವನ್ನು ನೇರವಾಗಿ ಪಾವತಿಸಿ, ಉಳಿದರ ಮೇಲೆ ಮಾತ್ರ ಕಾರ್ಡ್ ಬಳಸುವುದು ಹಣಕಾಸು ವ್ಯವಸ್ಥೆಯನ್ನು ಆರೋಗ್ಯಕರವಾಗಿಡುತ್ತದೆ.
ಅದೇ ರೀತಿ, ಎಟಿಎಂ ನಲ್ಲಿ ಕ್ರೆಡಿಟ್ ಕಾರ್ಡ್ ಮೂಲಕ ನಗದು ತೆಗೆಯುವುದು ದೊಡ್ಡ ತಪ್ಪು. 2.5% ರಿಂದ 3% ರಷ್ಟು ಕ್ಯಾಶ್ ಅಡ್ವಾನ್ಸ್ ಚಾರ್ಜ್‌ ವಿಧಿಸಲಾಗುತ್ತದೆ. 10,000 ತೆಗಿದರೆ ಒಂದೇ ತಿಂಗಳಲ್ಲಿ 400 ರೂಪಾಯಿ ಹೆಚ್ಚುವರಿ ವೆಚ್ಚ ಬರುತ್ತದೆ. ಇದು ದೀರ್ಘಾವಧಿಯಲ್ಲಿ ಭಾರೀ ಬಾಧೆಯಾಗಿ ಪರಿಣಮಿಸುತ್ತದೆ.
ಮಿನಿಮಮ್ ಡ್ಯೂ ಪಾವತಿ
ಬಿಲ್ ಸಂಪೂರ್ಣ ಪಾವತಿಸಲು ಸಾಧ್ಯವಾಗದಾಗ ಕೆಲವರು ಮಿನಿಮಮ್ ಡ್ಯೂ ಮಾತ್ರ ಕಟ್ಟುತ್ತಾರೆ. ಆದರೆ ಉಳಿದ ಮೊತ್ತದ ಮೇಲೆ ಬಡ್ಡಿ ಸೇರಿ ದೊಡ್ಡ ಮೊತ್ತದ ಹೊಣೆಗಾರಿಕೆಯನ್ನು ಸೃಷ್ಟಿಸುತ್ತದೆ. 50 ಸಾವಿರ ಬಿಲ್‌ಗೆ 5 ಸಾವಿರ ಮಾತ್ರ ನೀಡಿದರೆ, ಉಳಿದ 45 ಸಾವಿರದ ಮೇಲೆ ಬಡ್ಡಿ ದಿನದಿಂದ ದಿನಕ್ಕೆ ಜಾಸ್ತಿಯಾಗುತ್ತದೆ.
ಆನ್‌ಲೈನ್ ಪೇಮೆಂಟ್‌ಗಳಲ್ಲಿ ಜಾಗ್ರತೆ ಅಗತ್ಯ
URL ಅನುಮಾನಾಸ್ಪದವಾಗಿ ಕಂಡರೂ, HTTPS ಲಾಕ್‌ ಚಿಹ್ನೆ ಇರದಿದ್ದರೂ ಪೇಮೆಂಟ್‌ ಮುಂದುವರಿಸಿದರೆ ಸೈಬರ್ ಅಪಾಯ ಎದುರಾಗಬಹುದು. ಕಾರ್ಡ್ ವಿವರಗಳು ಬೇರೆ ಕೈಗೆ ಹೋಗಿ ಹ್ಯಾಕಿಂಗ್‌, ವಂಚನೆಗಳಿಗೆ ಅವಕಾಶ ಸೃಷ್ಟಿಸುತ್ತದೆ.
ಡ್ಯೂ ಡೇಟ್ ಮಿಸ್ ಮಾಡಿದರೆ ಭಾರೀ ಹಾನಿ
ಪ್ರತಿ ತಿಂಗಳು ಪಾವತಿ ತಡವಾದರೆ ಸಿಬಿಲ್ ಸ್ಕೋರ್ ಕುಸಿಯುತ್ತದೆ. ಆಟೋ-ಡೆಬಿಟ್, ರಿಮೈಂಡರ್‌ ಸೆಟ್‌ ಮಾಡಿಕೊಂಡರೆ ಈ ಸಮಸ್ಯೆ ತಪ್ಪಿಸಬಹುದು. ತಡ ಪಾವತಿಯು ಬಡ್ಡಿ ಮತ್ತು ಲೇಟ್ ಫೀಸುಗಳನ್ನು ಹೆಚ್ಚಿಸುತ್ತದೆ.
ಪರ್ಸನಲ್ ಲೋನ್‌, EMI, ಇತರ ಬಾಕಿ ಇದ್ದಾಗ ಕ್ರೆಡಿಟ್ ಕಾರ್ಡ್ ಬಳಸಿ ಹೆಚ್ಚುವರಿ ಖರ್ಚು ಮಾಡುವುದು ಹಣಕಾಸು ಅಪಾಯವನ್ನು ನಾಲ್ಕು ಪಟ್ಟು ಹೆಚ್ಚಿಸುತ್ತದೆ. ಅಂಥ ಸಂದರ್ಭಗಳಲ್ಲಿ UPI ಅಥವಾ ಡೆಬಿಟ್ ಕಾರ್ಡ್ ಬಳಸುವುದು ಹೆಚ್ಚು ಸುರಕ್ಷಿತ.
