ಲೋನ್‌ ತೆಗೆದುಕೊಳ್ಳುವ ಮುನ್ನ ತಿಳಿಯಲೇಬೇಕಾದ ಮುಖ್ಯ ವಿಚಾರಗಳು ಇವು!

ಬ್ಯಾಂಕಿನಿಂದ ಲೋನ್‌ ತೆಗೆದುಕೊಳ್ಳುವ ಮೊದಲು ಬಹುತೇಕ ಜನರು ಬಡ್ಡಿದರದ ಮಾದರಿ ಕುರಿತು ಸರಿಯಾಗಿ ಅರಿತುಕೊಳ್ಳುವುದಿಲ್ಲ. ಲೋನ್‌ ಎಂದರೆ ಕೇವಲ ಹಣ ಸಾಲವಲ್ಲ; ಅದು ನಿಮ್ಮ ಆರ್ಥಿಕ ಸ್ಥಿತಿಯ ನಿರ್ವಹಣೆಯ ಹಾದಿಯೂ ಆಗಿದೆ. ಆದ್ದರಿಂದ ಸ್ಥಿರ (Fixed) ಮತ್ತು ತೇಲುವ (Floating) ಬಡ್ಡಿದರಗಳ ವ್ಯತ್ಯಾಸ ತಿಳಿದುಕೊಳ್ಳುವುದು ಬಹುಮುಖ್ಯ.

ಸ್ಥಿರ ಬಡ್ಡಿದರವನ್ನು ಆಯ್ಕೆ ಮಾಡಿದರೆ ನಿಮ್ಮ EMI (ಮಾಸಿಕ ಪಾವತಿ) ಸಂಪೂರ್ಣ ಅವಧಿಯವರೆಗೂ ಒಂದೇ ರೀತಿಯಾಗಿ ಇರುತ್ತದೆ. RBI ಅಥವಾ ಮಾರುಕಟ್ಟೆ ಬದಲಾವಣೆಗಳು ನಿಮ್ಮ ಬಡ್ಡಿದರವನ್ನು ಪ್ರಭಾವಿತಗೊಳಿಸುವುದಿಲ್ಲ. ಹೀಗಾಗಿ ನಿಗದಿತ ಆದಾಯ ಹೊಂದಿರುವವರು ಅಥವಾ ಸ್ಥಿರತೆಯನ್ನು ಬಯಸುವವರು ಈ ಮಾದರಿಯನ್ನು ಆರಿಸಿಕೊಳ್ಳಬಹುದು.

ಇನ್ನೊಂದೆಡೆ, ತೇಲುವ ಬಡ್ಡಿದರದಲ್ಲಿ ನಿಮ್ಮ EMI ಬದಲಾಗುವ ಸಾಧ್ಯತೆ ಇರುತ್ತದೆ. RBI ತನ್ನ ರೆಪೋ ದರವನ್ನು ಹೆಚ್ಚಿಸಿದರೆ ನಿಮ್ಮ ಬಡ್ಡಿದರ ಕೂಡ ಹೆಚ್ಚಬಹುದು; ಕಡಿಮೆ ಮಾಡಿದರೆ EMI ಕೂಡ ಕಡಿಮೆಯಾಗಬಹುದು. ಹೀಗಾಗಿ ಮಾರುಕಟ್ಟೆ ಅಲೆಯ ಬದಲಾವಣೆಗಳನ್ನು ಸಹಿಸಲು ಸಾದ್ಯವಿದ್ದರೆ ಫ್ಲೋಟಿಂಗ್‌ ಬಡ್ಡಿದರ ಆಯ್ಕೆ ಲಾಭದಾಯಕ.

ಸಾಮಾನ್ಯವಾಗಿ ಸ್ಥಿರ ಬಡ್ಡಿದರವು ಫ್ಲೋಟಿಂಗ್‌ ಬಡ್ಡಿದರಕ್ಕಿಂತ ಸ್ವಲ್ಪ ಹೆಚ್ಚು ಇರುತ್ತದೆ. ಆದರೆ ಅದರ ಬದಲಿಗೆ ನಿಮಗೆ ನಿರ್ದಿಷ್ಟತೆ ಹಾಗೂ ಭದ್ರತೆ ದೊರೆಯುತ್ತದೆ. ಫ್ಲೋಟಿಂಗ್‌ ದರವು ಆರಂಭದಲ್ಲಿ ಕಡಿಮೆಯಾದರೂ, RBI ನೀತಿಗಳ ಪ್ರಕಾರ ಅದು ಮುಂದಿನ ದಿನಗಳಲ್ಲಿ ಏರಿಕೆಯಾಗಬಹುದು.

ಹೀಗಾಗಿ ಯಾವ ಬಡ್ಡಿದರ ಆಯ್ಕೆ ನಿಮ್ಮ ಅಗತ್ಯಗಳಿಗೆ ಸೂಕ್ತ ಎಂಬುದು ನಿಮ್ಮ ಆದಾಯ, ಖರ್ಚು, ಹಾಗೂ ಆರ್ಥಿಕ ಯೋಜನೆಗಳ ಮೇಲೆ ಅವಲಂಬಿತವಾಗಿರುತ್ತದೆ. ನಿರ್ಧಾರ ಕೈಗೊಳ್ಳುವ ಮೊದಲು ಬ್ಯಾಂಕ್‌ ಸಲಹೆಗಾರರ ಜೊತೆ ಮಾತುಕತೆ ನಡೆಸುವುದು ಒಳಿತು.

Before taking a loan, know this