ನಿಮ್ಮ ಆಧಾರ್‌ಗೆ ಯಾವ ಮೊಬೈಲ್ ನಂಬರ್ ಲಿಂಕ್ ಆಗಿದೆ? ಒಂದೇ ಕ್ಲಿಕ್‌ನಲ್ಲಿ ಈ ರೀತಿ ತಿಳಿದುಕೊಳ್ಳಿ!
UIDAI ನೀಡಿರುವ ಸರಳ ವಿಧಾನದ ಮೂಲಕ ನಿಮ್ಮ ಆಧಾರ್‌ಗೆ ಲಿಂಕ್ ಆಗಿರುವ ಮೊಬೈಲ್ ನಂಬರನ್ನು ಮನೆಯಲ್ಲೇ ಕೆಲ ಕ್ಷಣಗಳಲ್ಲಿ ಪರಿಶೀಲಿಸಲು ಸಾಧ್ಯವಾಗುತ್ತದೆ. OTP, e-KYC ಸೇರಿದಂತೆ ಅನೇಕ ಸೇವೆಗಳಿಗೆ ಇದು ಅತ್ಯಗತ್ಯ.
Image Source: Via Digit
Aadhaar Mobile Link: ಇಂದು ಬ್ಯಾಂಕ್ ವ್ಯವಹಾರಗಳಿಂದ PAN–Aadhaar ಲಿಂಕ್, ಮ್ಯೂಚುಯಲ್ ಫಂಡ್ಸ್, PPF, ವಿಮೆ, ಸಬ್ಸಿಡಿ ಪಡೆಯುವ ಪ್ರಕ್ರಿಯೆ, ಎಲ್ಲಕ್ಕೂ ಆಧಾರ್ OTP ಅಗತ್ಯ. ಆದ್ದರಿಂದ ನಿಮ್ಮ ಆಧಾರ್‌ಗೆ ಯಾವ ಮೊಬೈಲ್ ನಂಬರಿದೆ ಎಂಬುದು ತಿಳಿದುಕೊಳ್ಳುವುದು ತುಂಬಾ ಮುಖ್ಯ. ನಂಬರ್ ಡಿಯಾಕ್ಟಿವೇಟ್ ಆಗಿದ್ದರೆ ಅಥವಾ ನಿಮ್ಮ ಬಳಿ ಆ SIM ಇಲ್ಲದಿದ್ದರೆ ಹಲವು ಸೇವೆಗಳಿಗೆ ತೊಂದರೆ ಆಗಬಹುದು.
UIDAI ತನ್ನ ಅಧಿಕೃತ ಪೋರ್ಟಲ್‌ನಲ್ಲಿ ಬಳಕೆದಾರರಿಗೆ ಆಧಾರ್ ವಿವರಗಳನ್ನು ನೋಡಲು, ಅಪ್‌ಡೇಟ್ ಮಾಡಲು ಮತ್ತು ಲಿಂಕ್ ಮಾಡಲಾದ ನಂಬರನ್ನು ಪರಿಶೀಲಿಸಲು ವಿಶೇಷ ಸಾಧನ ಒದಗಿಸಿದೆ. ಕೆಲವರಿಗೆ ಅವರು ಯಾವ ನಂಬರನ್ನ ನೋಂದಾಯಿಸಿದ್ದಾರೆ ಅನ್ನುವುದೇ ನೆನಪಿರುವುದಿಲ್ಲ. ಇಂತಹವರಿಗಾಗಿ ಈ ಆನ್‌ಲೈನ್ ಸೇವೆ ಬಹಳ ಉಪಯುಕ್ತ.
ನೀವು ಆಧಾರ್‌ಗೆ ಲಿಂಕ್ ಆಗಿರುವ ನಂಬರ್ ಚೆಕ್ ಮಾಡಲು UIDAI Verification ಪುಟಕ್ಕೆ ಹೋಗಬೇಕು. ಅಲ್ಲಿ ನಿಮ್ಮ 12 ಅಂಕೆಯ ಆಧಾರ್ ನಂಬರ್ ಮತ್ತು ಪರಿಶೀಲಿಸಬೇಕಾದ ಮೊಬೈಲ್ ನಂಬರ್ ದಾಖಲಿಸಿ. ಕ್ಯಾಪ್ಚಾ ನಮೂದಿಸಿದ ನಂತರ ‘Proceed to Verify’ ಒತ್ತಿದರೆ ಕೆಲವು ಸೆಕೆಂಡ್‌ಗಳಲ್ಲಿ ಫಲಿತಾಂಶ ಸಿಗುತ್ತದೆ.
ನಂಬರ್ ಸರಿಯಾಗಿ ಲಿಂಕ್ ಆಗಿದ್ದರೆ ಸ್ಕ್ರೀನ್ ಮೇಲೆ ದೃಢೀಕರಣ ಸಂದೇಶ ಕಾಣುತ್ತದೆ. ಲಿಂಕ್ ಆಗಿರದಿದ್ದರೆ “Records do not match” ಎಂದು ತೋರಿಸಿ, ನಂಬರನ್ನು ಹೇಗೆ ಅಪ್‌ಡೇಟ್ ಮಾಡಬೇಕೆಂದು ಸೂಚನೆ ನೀಡುತ್ತದೆ.
ಒಂದಕ್ಕಿಂತ ಹೆಚ್ಚು ಮೊಬೈಲ್ ನಂಬರ್ ನಿಮ್ಮ ಹೆಸರಿಗೆ ಜಾರಿಯಾಗಿದ್ದರೆ TAFCOP ಪೋರ್ಟಲ್ ಸಹಾಯಕ್ಕೆ ಬರುತ್ತದೆ. ಅಲ್ಲಿ ನಿಮ್ಮ ಮೊಬೈಲ್ ನಂಬರನ್ನು ನಮೂದಿಸಿ OTP ಪರಿಶೀಲನೆ ಮಾಡಿದರೆ, ನಿಮ್ಮ ಹೆಸರಿನಲ್ಲಿ ಜಾರಿಯಾದ ಎಲ್ಲಾ SIM ಕಾರ್ಡ್‌ಗಳ ಪಟ್ಟಿ ಪ್ರದರ್ಶಿಸುತ್ತದೆ. ಅನಧಿಕೃತ ನಂಬರ್ ಇದ್ದರೆ ತಕ್ಷಣವೇ ರಿಪೋರ್ಟ್ ಮಾಡಲು ಅವಕಾಶವೂ ನೀಡುತ್ತದೆ.
ಈ ರೀತಿಯಾಗಿ UIDAI ಮತ್ತು TAFCOP ಮೂಲಕ ನಿಮ್ಮ ಆಧಾರ್‌ಗೆ ಲಿಂಕ್ ಆಗಿರುವ ನಂಬರನ್ನು ಪರಿಶೀಲಿಸುವುದು ಅತ್ಯಂತ ಸರಳ ಮತ್ತು ಸುರಕ್ಷಿತ. ತಪ್ಪಾದ ನಂಬರ್ ಬಳಕೆಯಲ್ಲಿದ್ದರೆ ಅದನ್ನು ಸರಿಪಡಿಸುವುದು ನಿಮ್ಮ ಸೇವೆಗಳು ನಿಲ್ಲದಂತೆ ಮಾಡುವ ಮೊದಲ ಹೆಜ್ಜೆ.
