Electric Scooter: ಒಮ್ಮೆ ಕಿಂಗ್ ಆಗಿದ್ದ ಓಲಾ ಈಗ ಐದನೇ ಸ್ಥಾನಕ್ಕೆ! ಹೀರೋ ಸ್ಕೂಟರ್ ಗಳು ಭಾರೀ ಮಾರಾಟ

Vida Electric Scooter: ಭಾರತದಲ್ಲಿ ಎಲೆಕ್ಟ್ರಿಕ್ ದ್ವಿಚಕ್ರ ವಾಹನಗಳ ಮಾರುಕಟ್ಟೆ ತೀವ್ರ ಸ್ಪರ್ಧೆಯ ಹಂತಕ್ಕೆ ತಲುಪಿದ್ದು, TVS, Ather, Bajaj ಜೊತೆಗೆ ಈಗ ಹೀರೋ ಕೂಡ ದಿಟ್ಟವಾಗಿ ತನ್ನ ಸ್ಥಾನವನ್ನು ಬದಲಾಯಿಸಿಕೊಂಡಿದೆ.

Vida ಬ್ರಾಂಡ್ ಮೂಲಕ ಹೀರೋ ಬಿಡುಗಡೆ ಮಾಡಿದ VX2 ಮತ್ತು V2 ಸರಣಿ ಮಾದರಿಗಳಿಗೆ ಗ್ರಾಹಕರಿಂದ ಉತ್ತಮ ಆಸಕ್ತಿ ವ್ಯಕ್ತವಾಗುತ್ತಿದೆ. VX2 Go ರೂ.73,850ರಿಂದ ಆರಂಭವಾಗಿದ್ದು, V2 Pro ಮಾದರಿ ರೂ.1.40 ಲಕ್ಷವರೆಗೆ ಏರಿಕೆಯಾಗುತ್ತದೆ (ಎಕ್ಸ್-ಶೋ ರೂಂ).

ಹೀರೋದ ಅಚ್ಚರಿ ಏರಿಕೆ

FADA ಬಿಡುಗಡೆ ಮಾಡಿದ ನವೆಂಬರ್ 2025ರ ಡೇಟಾ ಪ್ರಕಾರ ಹೀರೋ 12,213 ಎಲೆಕ್ಟ್ರಿಕ್ ವಾಹನಗಳನ್ನು ಮಾರಾಟ ಮಾಡಿದೆ. ಹಿಂದಿನ ವರ್ಷದ ಇದೇ ತಿಂಗಳ 7,352 ಯೂನಿಟ್‌ಗಳಿಗಿಂತ ಇದು 66% ಹೆಚ್ಚು.

Vida ಮಾದರಿಗಳ ಮಾರುಕಟ್ಟೆ ಹಿಡಿತ ಹೀರೋಗೆ ದೊಡ್ಡ ನೆರವಾಯಿತು. ಆದರೆ ಅಕ್ಟೋಬರ್ 2025ರೊಂದಿಗೆ ಹೋಲಿಸಿದರೆ, ಹೀರೋ ಸುಮಾರು 23% ಕಡಿಮೆ ಮಾರಾಟ ದಾಖಲಿಸಿದೆ.

ಓಲಾದ ದಾಖಲೆ ಮಟ್ಟದ ಕುಸಿತ

ಒಮ್ಮೆ ಭಾರತದ EV ಮಾರುಕಟ್ಟೆಯಲ್ಲಿ ಮೊದಲ ಸ್ಥಾನ ಅಲಂಕರಿಸಿದ್ದ ಓಲಾ ಈಗ ಸ್ಪಷ್ಟ ಕುಸಿತದ ಹಾದಿಯಲ್ಲಿ ಸಾಗುತ್ತಿದೆ. ನವೆಂಬರ್ 2025ರಲ್ಲಿ ಓಲಾ ಕೇವಲ 8,402 ಯೂನಿಟ್‌ಗಳನ್ನು ಮಾರಾಟ ಮಾಡಿ ಐದನೇ ಸ್ಥಾನಕ್ಕೆ ಸರಿದಿದೆ.

ಕಳೆದ ವರ್ಷ ಇದೇ ತಿಂಗಳಿಗಿಂತ 71% ಕಡಿಮೆ ಮಾರಾಟ ಆಗಿದ್ದು, ಅಕ್ಟೋಬರ್ ತಿಂಗಳಿಗಿಂತಲೂ 47% ಕುಸಿತ ಕಂಡಿದೆ. Q1 FY26 ನಂತರ ಓಲಾ ಮಾರಾಟ ನಿರಂತರವಾಗಿ ಇಳಿಮುಖವಾಗುತ್ತಿರುವುದು ಕಂಪನಿಗೆ ದೊಡ್ಡ ಸವಾಲಾಗಿದೆ.

ಮಾರುಕಟ್ಟೆಯಲ್ಲಿ ಹೊಸ ಹೊಸ ಬ್ರಾಂಡ್‌ಗಳು ಪ್ರವೇಶಿಸುತ್ತಿರುವಂತೆಯೇ ಪ್ರತಿ ಕಂಪನಿ ತನ್ನ ತಂತ್ರವನ್ನು ಮರು ಪರಿಶೀಲಿಸಲು ಮುಂದಾಗಿವೆ. ಸ್ಪರ್ಧೆ ಹೆಚ್ಚುತ್ತಿದ್ದಂತೆ ಗ್ರಾಹಕರು ಬೆಲೆ, ಫೀಚರ್, ರೇಂಜ್ ಮತ್ತು ಸೇವೆಗಳನ್ನು ಸಮನಾಗಿ ಪರಿಗಣಿಸುತ್ತಿರುವುದು ಗಮನಾರ್ಹ.