ಗ್ರಾಹಕರಿಗೆ ಬಿಗ್ ಅಲರ್ಟ್! ಇಂದಿನಿಂದ ಹೊಸ ಹೊಸ ನಿಯಮಗಳು ಜಾರಿ, ಬಾರೀ ಬದಲಾವಣೆಗಳು
ನವೆಂಬರ್ 1ರಿಂದ ಆಧಾರ್ ಅಪ್‌ಡೇಟ್ ಶುಲ್ಕ, ಬ್ಯಾಂಕ್ ನಾಮಿನಿ ನಿಯಮಗಳು, ಹೊಸ GST ಸ್ಲಾಬ್, ಪೆನ್ಶನ್ ಪ್ರಮಾಣಪತ್ರ, ಕಾರ್ಡ್ ಶುಲ್ಕ ಸೇರಿದಂತೆ ಹಲವಾರು ಹೊಸ ನಿಯಮಗಳು ಜಾರಿಗೆ ಬಂದಿವೆ.
ನವೆಂಬರ್ ಆರಂಭದೊಂದಿಗೆ ದೇಶದಾದ್ಯಂತ ಹಲವು ಹೊಸ ಆರ್ಥಿಕ ಹಾಗೂ ಆಡಳಿತಾತ್ಮಕ ನಿಯಮಗಳು ಜಾರಿಯಾಗಿದೆ. ಈ ಬದಲಾವಣೆಗಳು ನೇರವಾಗಿ ಗ್ರಾಹಕರ ದಿನನಿತ್ಯದ ವ್ಯವಹಾರಗಳನ್ನೂ ಪ್ರಭಾವಿಸುತ್ತವೆ.
ಆಧಾರ್ ಅಪ್‌ಡೇಟ್ ಶುಲ್ಕದಿಂದ ಹಿಡಿದು ಬ್ಯಾಂಕ್ ನಾಮಿನಿ ನಿಯಮಗಳು, ಹೊಸ GST ಸ್ಲಾಬ್‌ಗಳು ಹಾಗೂ ಪೆನ್ಶನ್ ಪ್ರಕ್ರಿಯೆಗಳಲ್ಲಿ ಬದಲಾವಣೆಗಳು ಈ ಪಟ್ಟಿಯಲ್ಲಿ ಸೇರಿವೆ.
ಭಾರತ ವಿಶಿಷ್ಟ ಗುರುತಿನ ಪ್ರಾಧಿಕಾರ (UIDAI) ಪ್ರಕಟಿಸಿದಂತೆ, ಮಕ್ಕಳ ಆಧಾರ್ ಕಾರ್ಡ್‌ಗಳಿಗೆ ಬಯೋಮೆಟ್ರಿಕ್ ಅಪ್‌ಡೇಟ್ ಶುಲ್ಕ ₹125 ರದ್ದು ಮಾಡಲಾಗಿದೆ. ಈ ಸೇವೆ ಮುಂದಿನ ಒಂದು ವರ್ಷ ಉಚಿತವಾಗಿರಲಿದೆ. ಆದರೆ ವಯಸ್ಕರಿಗೆ ಹೆಸರು, ವಿಳಾಸ, ಜನ್ಮ ದಿನಾಂಕ ಅಥವಾ ಮೊಬೈಲ್ ಸಂಖ್ಯೆ ಬದಲಾಯಿಸಲು ₹75 ಹಾಗೂ ಬಯೋಮೆಟ್ರಿಕ್ ಅಪ್‌ಡೇಟ್‌ಗಳಿಗೆ ₹125 ಪಾವತಿಸಬೇಕಾಗುತ್ತದೆ.
ಬ್ಯಾಂಕ್ ಖಾತೆ ಹಾಗೂ ಲಾಕರ್ ನಾಮಿನಿ ನಿಯಮಗಳಲ್ಲಿಯೂ ಬದಲಾವಣೆ ಜಾರಿಯಾಗಿದೆ. ಇದೀಗ ಗ್ರಾಹಕರು ಒಂದು ಖಾತೆಗೆ ಗರಿಷ್ಠ ನಾಲ್ವರನ್ನು ನಾಮಿನಿ ಮಾಡಿಕೊಳ್ಳಬಹುದು. ಇದರಿಂದ ತುರ್ತು ಪರಿಸ್ಥಿತಿಯಲ್ಲಿ ಕುಟುಂಬ ಸದಸ್ಯರಿಗೆ ಹಣ ಪಡೆಯಲು ಸುಲಭವಾಗುತ್ತದೆ ಮತ್ತು ಸ್ವಾಮ್ಯ ವಿವಾದಗಳೂ ತಪ್ಪುತ್ತವೆ. ಆನ್‌ಲೈನ್‌ನಲ್ಲಿ ಆಧಾರ್ ವಿಳಾಸ ಅಥವಾ ಜನ್ಮದಿನಾಂಕ ಬದಲಾವಣೆ ಮಾಡಲು ಸಹ ಹೊಸ ವ್ಯವಸ್ಥೆ ಅನುಮತಿಸುತ್ತದೆ.
ನವೆಂಬರ್ 1ರಿಂದ ಸರ್ಕಾರ ಹೊಸ ಎರಡು-ಸ್ಲ್ಯಾಬ್ GST ವ್ಯವಸ್ಥೆಯನ್ನು ಜಾರಿಗೆ ತಂದಿದೆ. ಹಿಂದಿನ 5%, 12%, 18%, 28% ಎಂಬ ನಾಲ್ಕು ಸ್ಲ್ಯಾಬ್ ವ್ಯವಸ್ಥೆಯ ಬದಲು ಈಗ ಸರಳೀಕೃತ ರಚನೆ ಅಳವಡಿಸಲಾಗಿದೆ. 12% ಮತ್ತು 28% ಸ್ಲ್ಯಾಬ್‌ಗಳು ತೆಗೆದುಹಾಕಲ್ಪಟ್ಟಿವೆ. ಆದರೆ ಐಶಾರಾಮಿ ಮತ್ತು ಹಾನಿಕರ ಉತ್ಪನ್ನಗಳ ಮೇಲೆ 40% ತೆರಿಗೆ ವಿಧಿಸಲು ತೀರ್ಮಾನಿಸಲಾಗಿದೆ.
ಕೇಂದ್ರ ಸರ್ಕಾರದ ಉದ್ಯೋಗಿಗಳು ರಾಷ್ಟ್ರೀಯ ನಿವೃತ್ತಿ ಯೋಜನೆ (NPS)ಯಿಂದ ಏಕೀಕೃತ ನಿವೃತ್ತಿ ಯೋಜನೆಗೆ (UPS) ಬದಲಾಗಲು ನವೆಂಬರ್ 30ರವರೆಗೆ ಗಡುವು ವಿಸ್ತರಿಸಲಾಗಿದೆ. ಇದೇ ಸಮಯದಲ್ಲಿ, ಎಲ್ಲಾ ಪೆನ್ಶನರ್‌ಗಳು ತಮ್ಮ ವಾರ್ಷಿಕ ಜೀವಿತ ಪ್ರಮಾಣಪತ್ರವನ್ನು ನವೆಂಬರ್ ಅಂತ್ಯದೊಳಗೆ ಬ್ಯಾಂಕ್ ಅಥವಾ ಜೀವನ್ ಪ್ರಮಾಣ್ ಪೋರ್ಟಲ್ ಮೂಲಕ ಸಲ್ಲಿಸಬೇಕಾಗಿದೆ. ವಿಳಂಬವಾದರೆ ಪೆನ್ಶನ್ ಪಾವತಿಯಲ್ಲಿ ತೊಂದರೆಗಳು ಎದುರಾಗಬಹುದು.
ಪಂಜಾಬ್ ನ್ಯಾಷನಲ್ ಬ್ಯಾಂಕ್ (PNB) ದೇಶದಾದ್ಯಂತ ಲಾಕರ್ ಶುಲ್ಕಗಳಲ್ಲಿ ಪರಿಷ್ಕರಣೆ ಮಾಡಲು ತೀರ್ಮಾನಿಸಿದೆ. ಹೊಸ ದರಗಳು ಲಾಕರ್ ಗಾತ್ರ ಮತ್ತು ವಿಭಾಗದ ಆಧಾರದ ಮೇಲೆ ನಿಗದಿಯಾಗಲಿದ್ದು, ಪ್ರಕಟಣೆಯ ನಂತರ 30 ದಿನಗಳಲ್ಲಿ ಜಾರಿಯಾಗುವ ಸಾಧ್ಯತೆ ಇದೆ.
ಅದೇ ವೇಳೆ, SBI ಕಾರ್ಡ್ ಬಳಕೆದಾರರಿಗೆ ಹೊಸ ಶುಲ್ಕಗಳು ವಿಧಿಸಲಾಗಿವೆ. ಈಗಿನಿಂದ MobiKwik, Cred ಮುಂತಾದ ಆ್ಯಪ್‌ಗಳ ಮೂಲಕ ವಿದ್ಯಾಭ್ಯಾಸ ಸಂಬಂಧಿತ ಪಾವತಿಗಳಿಗೆ 1% ಶುಲ್ಕ ವಿಧಿಸಲಾಗುತ್ತದೆ. ಜೊತೆಗೆ ಡಿಜಿಟಲ್ ವಾಲೆಟ್‌ಗೆ ₹1,000 ಕ್ಕಿಂತ ಹೆಚ್ಚು ಮೊತ್ತವನ್ನು ಕಾರ್ಡ್ ಮೂಲಕ ಸೇರಿಸಿದರೆ 1% ಪಾವತಿಸಬೇಕು.
New Rules from November 1, Major Changes for Aadhaar, Banks, GST and More
