ಪೋಸ್ಟ್ ಆಫೀಸ್ ನಲ್ಲಿ 10 ಲಕ್ಷ ಹೂಡಿಕೆಗೆ ಎಷ್ಟು ಸಿಗುತ್ತೆ? ಇಲ್ಲಿದೆ ಬಡ್ಡಿ, ಚಕ್ರಬಡ್ಡಿ ಲೆಕ್ಕಾಚಾರ

• ಸರ್ಕಾರದ ಭರವಸೆಯ ಹೂಡಿಕೆ ಯೋಜನೆ
• ವರ್ಷಕ್ಕೆ 7.7% ಚಕ್ರವಡ್ಡಿ ಲಾಭ ನಿಮ್ಮದಾಗಿಸಿಕೊಳ್ಳಿ
• ಈ ಪೋಸ್ಟ್ ಆಫೀಸ್ ಯೋಜನೆಯಲ್ಲಿ ಲಕ್ಷಗಳ ಆದಾಯ

ಇತ್ತೀಚಿನ ದಿನಗಳಲ್ಲಿ ಸುರಕ್ಷಿತ ಹೂಡಿಕೆ ಹುಡುಕುತ್ತಿರುವ ಮಧ್ಯಮ ವರ್ಗದವರು ಪೋಸ್ಟ್ ಆಫೀಸ್ ಯೋಜನೆಗಳತ್ತ (Post Office Scheme) ಹೆಚ್ಚು ಗಮನ ಹರಿಸುತ್ತಿದ್ದಾರೆ. ಷೇರು ಮಾರುಕಟ್ಟೆಯ ಏರಿಳಿತಗಳಿಂದ ದೂರವಿದ್ದು, ಸರ್ಕಾರದ ಭರವಸೆಯೊಂದಿಗೆ ನಿಶ್ಚಿತ ಆದಾಯ ನೀಡುವ India Post ನ್ಯಾಷನಲ್ ಸೇವಿಂಗ್ಸ್ ಸರ್ಟಿಫಿಕೆಟ್ (NSC) ಯೋಜನೆ ಹೂಡಿಕೆದಾರರ ವಿಶ್ವಾಸ ಗಳಿಸಿದೆ. ಬ್ಯಾಂಕ್ FD ಗಳಿಗಿಂತ ಹೆಚ್ಚು ಬಡ್ಡಿ ನೀಡುತ್ತಿರುವುದು ಈ ಯೋಜನೆಯ ದೊಡ್ಡ ಆಕರ್ಷಣೆ.

ರೂ.10 ಲಕ್ಷ ಹೂಡಿದರೆ ಎಷ್ಟು ಸಿಗುತ್ತದೆ?

ಪ್ರಸ್ತುತ NSC ಯೋಜನೆಗೆ ಸರ್ಕಾರ ವರ್ಷಕ್ಕೆ 7.7 ಶೇಕಡಾ ಬಡ್ಡಿಯನ್ನು ನೀಡುತ್ತಿದೆ. ನೀವು ಒಂದೇ ಬಾರಿ ರೂ.10 ಲಕ್ಷ ಹೂಡಿಕೆ ಮಾಡಿದರೆ, 5 ವರ್ಷಗಳ ಮೆಚ್ಯೂರಿಟಿ ಬಳಿಕ ಸುಮಾರು ರೂ.14,49,035 ಪಡೆಯಬಹುದು. ಅಂದರೆ ಕೇವಲ ಬಡ್ಡಿಯ ರೂಪದಲ್ಲೇ ಸುಮಾರು ರೂ.4.49 ಲಕ್ಷ ಲಾಭ ಸಿಗುತ್ತದೆ. ಬಡ್ಡಿಗೆ ಚಕ್ರವಡ್ಡಿ ಲಾಭವೂ ಸೇರುವುದರಿಂದ ನಿಮ್ಮ ಹಣ ನಿಧಾನವಾಗಿ ಆದರೆ ಖಚಿತವಾಗಿ ಹೆಚ್ಚಾಗುತ್ತದೆ.

ಯೋಜನೆಯ ಮುಖ್ಯ ನಿಯಮಗಳು

ಈ ಯೋಜನೆಯಲ್ಲಿ ಕನಿಷ್ಠ ರೂ.1,000 ದಿಂದ ಹೂಡಿಕೆ ಆರಂಭಿಸಬಹುದು. ಗರಿಷ್ಠ ಹೂಡಿಕೆಗೆ ಯಾವುದೇ ಮಿತಿ ಇಲ್ಲ. ನಿಮ್ಮ ಆರ್ಥಿಕ ಸಾಮರ್ಥ್ಯಕ್ಕೆ ಅನುಗುಣವಾಗಿ ಮೊತ್ತವನ್ನು ಆಯ್ಕೆ ಮಾಡಬಹುದು. ಯೋಜನೆಯ ಅವಧಿ 5 ವರ್ಷಗಳು. ಪ್ರತಿವರ್ಷ ಲಭಿಸುವ ಬಡ್ಡಿಯನ್ನು ಮರುಹೂಡಿಕೆ ಎಂದು ಪರಿಗಣಿಸಲಾಗುತ್ತದೆ, ಇದರಿಂದ ಒಟ್ಟು ಲಾಭ ಹೆಚ್ಚಾಗುತ್ತದೆ.

ತೆರಿಗೆ ಲಾಭ ಮತ್ತು ಅರ್ಹತೆ

NSC ಯೋಜನೆಯಲ್ಲಿ ಹೂಡಿದ ಮೊತ್ತಕ್ಕೆ ಆದಾಯ ತೆರಿಗೆ ಕಾಯ್ದೆಯ ಸೆಕ್ಷನ್ 80C ಅಡಿಯಲ್ಲಿ ವರ್ಷಕ್ಕೆ ರೂ.1.5 ಲಕ್ಷವರೆಗೆ ತೆರಿಗೆ ಮನ್ನಾ ಲಭ್ಯ. ಭಾರತೀಯ ನಾಗರಿಕರು ಸಿಂಗಲ್ ಅಥವಾ ಜಂಟಿ ಖಾತೆಯಾಗಿ ಹೂಡಿಕೆ ಮಾಡಬಹುದು. 10 ವರ್ಷ ಮೇಲ್ಪಟ್ಟ ಮಕ್ಕಳು ತಮ್ಮ ಹೆಸರಿನಲ್ಲಿ, 10 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳಿಗಾಗಿ ಪೋಷಕರು ಖಾತೆ ತೆರೆಯಬಹುದು. ಆದರೆ NRI ಗಳು ಮತ್ತು ಕಂಪನಿಗಳಿಗೆ ಈ ಯೋಜನೆ ಲಭ್ಯವಿಲ್ಲ.

ಯಾರಿಗೆ ಈ ಯೋಜನೆ ಸೂಕ್ತ?

ಮಾರುಕಟ್ಟೆ ರಿಸ್ಕ್ ಬೇಡ, ಆದರೆ ಭವಿಷ್ಯಕ್ಕೆ ಭದ್ರ ಹಣಕಾಸು ಬೇಕು ಎನ್ನುವವರಿಗೆ NSC ಒಳ್ಳೆಯ ಆಯ್ಕೆ. ಮಕ್ಕಳ ಶಿಕ್ಷಣ, ನಿವೃತ್ತಿ ಜೀವನ ಅಥವಾ ಭವಿಷ್ಯದ ದೊಡ್ಡ ಅಗತ್ಯಗಳಿಗೆ ನಿಧಿ ಸಂಗ್ರಹಿಸಲು ಈ ಯೋಜನೆಯನ್ನು ಪರಿಗಣಿಸಬಹುದು.