ಈ ತಳಿ ಮೇಕೆ ಸಾಕಾಣಿಕೆಯಲ್ಲಿ ಭಾರೀ ಲಾಭ! ದೇಶಾದ್ಯಂತ ಬೇಡಿಕೆ ಇರುವ ಮೇಕೆ ಜಾತಿ ಇದು

• ಸಿರೋಹಿ ಮೇಕೆ ಸಾಕಾಣಿಕೆಯಲ್ಲಿ ಭಾರೀ ಲಾಭ
• ವೇಗವಾದ ತೂಕವೃದ್ಧಿ, ಉತ್ತಮ ಹಾಲು ಉತ್ಪಾದನೆ
• ದೇಶಾದ್ಯಂತ ಬೇಡಿಕೆ ಇರುವ ಮೇಕೆ ಜಾತಿ ಇದು

Goat Farming Business: ಗ್ರಾಮೀಣ ಆರ್ಥಿಕತೆಯಲ್ಲಿ ಪಶುಸಂಗೋಪನೆ ಎಂದರೆ ಕೇವಲ ಹಸು-ಎಮ್ಮೆ ಸಾಕಾಣಿಕೆ ಮಾತ್ರವಲ್ಲ. ಇತ್ತೀಚಿನ ವರ್ಷಗಳಲ್ಲಿ ಮೇಕೆ ಸಾಕಾಣಿಕೆ ರೈತರು ಮತ್ತು ನಿರುದ್ಯೋಗ ಯುವಕರಿಗೆ ಭರವಸೆಯ ಉದ್ಯಮವಾಗಿ (Profitable Business) ಹೊರಹೊಮ್ಮುತ್ತಿದೆ. ವಿಶೇಷವಾಗಿ ಕಡಿಮೆ ಜಾಗ, ಕಡಿಮೆ ವೆಚ್ಚ ಮತ್ತು ಬೇಗ ಆದಾಯ ನೀಡುವ ಗುಣಗಳಿಂದ ಮೇಕೆಗಳು ಜನಪ್ರಿಯವಾಗುತ್ತಿವೆ.

ಇಂತಹ ಮೇಕೆ ಜಾತಿಗಳಲ್ಲಿ ಈಗ ಹೆಚ್ಚು ಚರ್ಚೆಗೆ ಬಂದಿರುವುದು ಸಿರೋಹಿ (Sirohi) ಜಾತಿಯ ಮೇಕೆ. ಇದರ ವಿಶಿಷ್ಟ ದೇಹರಚನೆ, ದೀರ್ಘ ಕಿವಿಗಳು ಮತ್ತು ಬಲಿಷ್ಠ ರೂಪವೇ ಮೊದಲ ನೋಟದಲ್ಲೇ ಗಮನ ಸೆಳೆಯುತ್ತದೆ.

ಸಿರೋಹಿ ಮೇಕೆಯ ಮೂಲ ಮತ್ತು ಜನಪ್ರಿಯತೆ

ಸಿರೋಹಿ ಜಾತಿಯ ಮೇಕೆಗಳು ಮೂಲತಃ ರಾಜಸ್ಥಾನದ ಸಿರೋಹಿ ಜಿಲ್ಲೆ (Sirohi Districts) ಮತ್ತು ಗುಜರಾತ್‌ನ ಕೆಲ ಭಾಗಗಳಲ್ಲಿ ಹೆಚ್ಚು ಕಂಡುಬರುತ್ತವೆ. ಆದರೆ ಇತ್ತೀಚೆಗೆ ಉತ್ತರ ಪ್ರದೇಶ, ಬಿಹಾರ ಸೇರಿದಂತೆ ಹಲವು ರಾಜ್ಯಗಳಲ್ಲಿ ಈ ಮೇಕೆ ಸಾಕಾಣಿಕೆ ವೇಗವಾಗಿ ವಿಸ್ತಾರವಾಗುತ್ತಿದೆ.

ಹವಾಮಾನಕ್ಕೆ ಸುಲಭವಾಗಿ ಹೊಂದಿಕೊಳ್ಳುವ ಗುಣ, ಬರವನ್ನು ಸಹಿಸುವ ಶಕ್ತಿ ಮತ್ತು ಕಡಿಮೆ ರೋಗಬಾಧೆ ಇವು ಈ ಜಾತಿಯನ್ನು ರೈತರ ಮೆಚ್ಚಿನ ಆಯ್ಕೆಯಾಗಿ ಮಾಡಿವೆ.

ತೂಕ, ಹಾಲು ಮತ್ತು ಮಾರುಕಟ್ಟೆ ಬೇಡಿಕೆ

ಸಿರೋಹಿ ಮೇಕೆಗಳ ಪ್ರಮುಖ ವಿಶೇಷತೆ ಎಂದರೆ ವೇಗವಾದ ಬೆಳವಣಿಗೆ. ಸಾಮಾನ್ಯವಾಗಿ ಈ ಮೇಕೆಗಳು 12–15 ತಿಂಗಳೊಳಗೆ 50–60 ಕಿಲೋ ತೂಕ ತಲುಪುತ್ತವೆ. ಹೆಣ್ಣು ಮೇಕೆಗಳು ಸರಾಸರಿ 30–40 ಕಿಲೋ ತೂಕ ಹೊಂದಿರುತ್ತವೆ.

ಹಾಲಿನ ವಿಷಯಕ್ಕೆ ಬಂದರೆ, ಪ್ರತಿದಿನ 1 ರಿಂದ 2 ಲೀಟರ್ವರೆಗೆ ಹಾಲು ನೀಡುವ ಸಾಮರ್ಥ್ಯ ಇವುಗಳಿಗೆ ಇದೆ. ಹಾಲಿನ ಗುಣಮಟ್ಟವೂ ಉತ್ತಮವಾಗಿದ್ದು, ಸ್ಥಳೀಯ ಮಾರುಕಟ್ಟೆಯಲ್ಲಿ ಬೇಡಿಕೆ ಹೆಚ್ಚಾಗಿದೆ. ಮೇಕೆ ಮಾಂಸಕ್ಕೂ ಸದಾ ಉತ್ತಮ ದರ ಸಿಗುವುದರಿಂದ, ಆದಾಯದ ಎರಡು ದಾರಿಗಳು ರೈತರಿಗೆ ಲಭ್ಯವಾಗುತ್ತವೆ.

ಪುನರುತ್ಪಾದನೆ ಮತ್ತು ಲಾಭದ ಸಾಧ್ಯತೆ

ಸಿರೋಹಿ ಮೇಕೆಗಳು ಸಾಮಾನ್ಯವಾಗಿ ಜೋಡಿ ಮರಿಗಳಿಗೆ ಜನ್ಮ ನೀಡುವ ಪ್ರಮಾಣ ಹೆಚ್ಚು. ಒಂದು ವರ್ಷದಿಂದ ಒಂದೂವರೆ ವರ್ಷದೊಳಗೆ ಎರಡು ಬಾರಿ ಮರಿಗಳನ್ನು ನೀಡುವ ಶಕ್ತಿಯಿದೆ. ಇದರಿಂದ ಕಡಿಮೆ ಅವಧಿಯಲ್ಲೇ ಮೇಕೆಗಳ ಸಂಖ್ಯೆ ಹೆಚ್ಚಾಗಿ, ಆದಾಯವೂ ವೇಗವಾಗಿ ಏರುತ್ತದೆ.

ರೋಗ ನಿರೋಧಕ ಶಕ್ತಿ ಹೆಚ್ಚು ಇರುವುದರಿಂದ ಚಿಕಿತ್ಸೆ ವೆಚ್ಚವೂ ಕಡಿಮೆ ಆಗುತ್ತದೆ. ಈ ಕಾರಣಗಳಿಂದಲೇ ಸಿರೋಹಿ ಮೇಕೆ ಸಾಕಾಣಿಕೆ ಗ್ರಾಮೀಣ ಭಾಗದಲ್ಲಿ ಭರವಸೆಯ ಉದ್ಯಮವಾಗಿ ಬೆಳೆಯುತ್ತಿದೆ.

ರೈತರಿಗೆ ಹೊಸ ಆದಾಯದ ದಾರಿ

ಉದ್ಯೋಗದ ಒತ್ತಡದಿಂದ ಬೇಸತ್ತವರು ಅಥವಾ ಸ್ವಂತ ಉದ್ಯಮ ಆರಂಭಿಸಲು ಯೋಚಿಸುವವರು, ಸಿರೋಹಿ ಮೇಕೆ ಸಾಕಾಣಿಕೆಯನ್ನು (Goat Farming) ಒಂದು ಉತ್ತಮ ಆಯ್ಕೆಯಾಗಿ ಪರಿಗಣಿಸಬಹುದು. ಸರಿಯಾದ ನಿರ್ವಹಣೆ ಮತ್ತು ಮಾರುಕಟ್ಟೆ ಸಂಪರ್ಕ ಇದ್ದರೆ, ಕಡಿಮೆ ಸಮಯದಲ್ಲೇ ಸ್ಥಿರ ಆದಾಯ ಗಳಿಸುವ ಅವಕಾಶ ಇದೆ. ಆದರೆ ಗಮನವಿರಲಿ ಸರಿಯಾದ ಜ್ಞಾನ ಹಾಗೂ ಬಲ್ಲವರ ಅನುಭವ ತಿಳಿದು ಮುಂದುವರೆಯುವುದು ಉತ್ತಮ.