ದಿನಕ್ಕೆ ಬರೋಬ್ಬರಿ 18 ಲೀಟರ್ ಹಾಲು ನೀಡುವ ಹಸು ಇದು! ರೈತರ ಆದಾಯಕ್ಕೆ ಹೊಸ ಮಾರ್ಗ

• ಈ ಹಸು ಕಡಿಮೆ ನಿರ್ವಣೆಯಲ್ಲಿ ಹೆಚ್ಚು ಹಾಲು ಉತ್ಪಾದನೆ
• ಡೈರಿ ಫಾರ್ಮಿಂಗ್ ಮೂಲಕ ಸ್ಥಿರ ಆದಾಯದ ಅವಕಾಶ
• ದೇಶಿ ಹಸು ಸಾಕಾಣಿಕೆಗೆ ರೈತರಲ್ಲಿ ಹೆಚ್ಚುತ್ತಿರುವ ಬೇಡಿಕೆ

Dairy Farming: ಕೃಷಿಯಿಂದ ಮಾತ್ರ ಜೀವನ ಸಾಗಿಸುವುದು ಸವಾಲಾಗುತ್ತಿರುವ ಈ ಕಾಲಘಟ್ಟದಲ್ಲಿ, ಪಶುಸಂಗೋಪನೆ ರೈತರಿಗೆ ಪರ್ಯಾಯ ಆದಾಯದ ದಾರಿಯಾಗಿ ಹೊರಹೊಮ್ಮಿದೆ.

ವಿಶೇಷವಾಗಿ ಹಸು ಸಾಕಾಣಿಕೆಯಲ್ಲಿ ಸರಿಯಾದ ಜಾತಿಯನ್ನು ಆಯ್ಕೆ ಮಾಡಿದರೆ ಕಡಿಮೆ ಖರ್ಚಿನಲ್ಲಿ ನಿರಂತರ ಆದಾಯ ಸಾಧ್ಯವೆಂಬುದನ್ನು ಅನೇಕ ರೈತರ ಅನುಭವಗಳು ಹೇಳುತ್ತಿವೆ.

ಥಾರ್ಪಾರ್ಕರ್ ಹಸು ಏಕೆ ವಿಶೇಷ?

ದೇಶಿ ಜಾತಿಯ ಥಾರ್ಪಾರ್ಕರ್ ಹಸುವನ್ನು (Tharparkar Cow Breed) ಪಶುಸಂಗೋಪಕರು ‘ಬಿಳಿ ಚಿನ್ನ’ ಎಂದೇ ಕರೆಯುತ್ತಾರೆ. ಕಾರಣ, ಈ ಹಸು ಸಾಮಾನ್ಯ ಆರೈಕೆಯಲ್ಲೇ ಉತ್ತಮ ಹಾಲು ಉತ್ಪಾದನೆ ನೀಡುತ್ತದೆ. ದುಬಾರಿ ಆಹಾರ ಅಥವಾ ಹೆಚ್ಚುವರಿ ಪೋಷಣೆಯ ಅವಶ್ಯಕತೆ ಇಲ್ಲದೆ ದಿನಕ್ಕೆ ಸರಾಸರಿ 15 ರಿಂದ 18 ಲೀಟರ್ ಹಾಲು ನೀಡುವ ಸಾಮರ್ಥ್ಯ ಇದಕ್ಕಿದೆ.

ಕಡಿಮೆ ಆರೈಕೆ, ದೀರ್ಘಕಾಲದ ಉತ್ಪಾದನೆ

ಈ ಹಸು ಹೆಚ್ಚು ಆರೈಕೆ ಬೇಡದೇ ದೀರ್ಘಾವಧಿ ಹಾಲು ಉತ್ಪಾದನೆ ಕಾಪಾಡಿಕೊಳ್ಳುತ್ತದೆ. ರೋಗನಿರೋಧಕ ಶಕ್ತಿ ಹೆಚ್ಚು ಇರುವುದರಿಂದ ಇತರೆ ಜಾತಿಗಳಿಗಿಂತ ಕಡಿಮೆ ಆನಾರೋಗ್ಯ ಹೊಂದಿರುತ್ತದೆ. ಇದರಿಂದ ಚಿಕಿತ್ಸಾ ವೆಚ್ಚ ಕಡಿಮೆಯಾಗಿ, ಲಾಭ ಹೆಚ್ಚಾಗುತ್ತದೆ.

ಹವಾಮಾನಕ್ಕೆ ಹೊಂದಿಕೊಳ್ಳುವ ಶಕ್ತಿ

ತೀವ್ರ ಬಿಸಿಲು ಹಾಗೂ ಕಠಿಣ ಚಳಿಯನ್ನು ಸಹಿಸುವ ಸಾಮರ್ಥ್ಯ ಥಾರ್ಪಾರ್ಕರ್ ಹಸುವಿನ ಮತ್ತೊಂದು ದೊಡ್ಡ ಗುಣ. ಗ್ರಾಮೀಣ ಪ್ರದೇಶಗಳಲ್ಲಷ್ಟೇ ಅಲ್ಲ, ವಿಭಿನ್ನ ಹವಾಮಾನ ಹೊಂದಿರುವ ಪ್ರದೇಶಗಳಲ್ಲೂ ಈ ಹಸು ಸುಲಭವಾಗಿ ಹೊಂದಿಕೊಳ್ಳುತ್ತದೆ.

ಗುರುತು, ಬೆಲೆ ಮತ್ತು ಲಾಭದ ಲೆಕ್ಕ

ಸಾಮಾನ್ಯವಾಗಿ ಬಿಳಿ ಅಥವಾ ತಿಳಿ ಬೂದು ಬಣ್ಣದ ಈ ಹಸುವಿನ ಬೆನ್ನಿನ ಮೇಲೆ ಮೃದುವಾದ ರೇಖೆಗಳು ಕಾಣಿಸಿಕೊಳ್ಳುತ್ತವೆ. ದೇಹ ಗಟ್ಟಿಯಾಗಿದ್ದು, ಕಿವಿಗಳು ಅಗಲವಾಗಿರುತ್ತವೆ. ಮಾರುಕಟ್ಟೆಯಲ್ಲಿ ಇದರ ಬೆಲೆ ಸುಮಾರು ₹20,000 ರಿಂದ ₹60,000 ವರೆಗೆ ಇದೆ.

ಉತ್ತಮ ಹಾಲು ನೀಡುವ ಸಾಮರ್ಥ್ಯ ಇರುವುದರಿಂದ, ಹಾಲು ಹಾಗೂ ಹಾಲು ಉತ್ಪನ್ನಗಳ ಮೂಲಕ ರೈತರು ಉತ್ತಮ ಆದಾಯ ಗಳಿಸುತ್ತಿದ್ದಾರೆ. ಸರಿಯಾದ ಆರೈಕೆ ಮತ್ತು ಸಮಯೋಚಿತ ಗಮನ ನೀಡಿದರೆ, ಈ ಹಸು ನಿಜಕ್ಕೂ ರೈತರಿಗೆ “ಬಿಳಿ ಚಿನ್ನ”ವಾಗುತ್ತದೆ.