ವಾಟ್ಸಪ್ ಹೊಸ ಆನ್‌ಲೈನ್ ಸ್ಟೇಟಸ್ ಫೀಚರ್! ವಾಟ್ಸಪ್‌ನಲ್ಲಿ ಹೊಸ ಸೌಲಭ್ಯ

ವಿಶ್ವದ ಜನಪ್ರಿಯ ಮೆಸೇಜಿಂಗ್ ಅಪ್ಲಿಕೇಶನ್ ಆಗಿರುವ ವಾಟ್ಸಪ್ ಮತ್ತೆ ಹೊಸ ಫೀಚರ್ ಮೂಲಕ ಬಳಕೆದಾರರ ಗಮನ ಸೆಳೆಯಲು ಸಜ್ಜಾಗಿದೆ. ದಿನದಿಂದ ದಿನಕ್ಕೆ ಸಂವಹನವನ್ನು ಸುಲಭಗೊಳಿಸುವ ಹೊಸ ಆಯ್ಕೆಗಳನ್ನು ಪರಿಚಯಿಸುತ್ತಿರುವ ಕಂಪನಿ, ಈಗ ಮತ್ತೊಂದು ಸ್ಮಾರ್ಟ್ ಸೌಲಭ್ಯವನ್ನು ಅಭಿವೃದ್ಧಿಪಡಿಸುತ್ತಿದೆ. ಈ ಹೊಸ ಫೀಚರ್ ಮೂಲಕ ಚಾಟ್ ತೆರೆಯದೇ ಯಾರು ಆನ್‌ಲೈನ್‌ನಲ್ಲಿ ಇದ್ದಾರೆ ಎಂಬುದನ್ನು ನೇರವಾಗಿ ನೋಡಬಹುದಾಗಿದೆ.

ಈಗಾಗಲೇ ವಾಟ್ಸಪ್‌ನಲ್ಲಿ ಯಾರಾದರೂ ಆನ್‌ಲೈನ್‌ನಲ್ಲಿದ್ದಾರೆಯೇ ಎಂದು ತಿಳಿಯಲು ಆ ವ್ಯಕ್ತಿಯ ಚಾಟ್ ವಿಂಡೋ ತೆರೆಯಲೇಬೇಕು. ಆದರೆ ಮುಂದಿನ ದಿನಗಳಲ್ಲಿ ಅದಕ್ಕೆ ಅಗತ್ಯವೇ ಇರುವುದಿಲ್ಲ. ಫೇಸ್‌ಬುಕ್ ಮೆಸೆಂಜರ್ ಮಾದರಿಯಲ್ಲಿ, ಆನ್‌ಲೈನ್‌ನಲ್ಲಿರುವ ಕಂಟಾಕ್ಟ್‌ಗಳ ಪಟ್ಟಿ ಒಂದೇ ಜಾಗದಲ್ಲಿ ಪ್ರದರ್ಶವಾಗುವ ವ್ಯವಸ್ಥೆಯನ್ನು ವಾಟ್ಸಪ್ ತರಲು ಸಿದ್ಧವಾಗಿದೆ.

‘ಕಾಂಟಾಕ್ಟ್ಸ್ ಹಬ್’ ಎಂಬ ಹೊಸ ಆಯ್ಕೆ

ಈ ಹೊಸ ಫೀಚರ್‌ನಲ್ಲಿ “ಕಾಂಟಾಕ್ಟ್ಸ್ ಹಬ್” ಎಂಬ ವಿಶೇಷ ವಿಭಾಗ ಇರಲಿದೆ. ಇಲ್ಲಿ ಪ್ರಸ್ತುತ ಆನ್‌ಲೈನ್‌ನಲ್ಲಿ ಇರುವ ಸ್ನೇಹಿತರು, ಕುಟುಂಬ ಸದಸ್ಯರು ಅಥವಾ ಇತರ ಕಂಟಾಕ್ಟ್‌ಗಳ ಮಾಹಿತಿ ಸುಲಭವಾಗಿ ಕಾಣುತ್ತದೆ. ಬಳಕೆದಾರರಿಗೆ ಬೇಗನೆ ಸಂಪರ್ಕ ಸಾಧಿಸಲು ಇದು ಸಹಾಯ ಮಾಡಲಿದೆ.

ಮೊದಲು ಈ ಫೀಚರ್ ಅನ್ನು ಆಂಡ್ರಾಯ್ಡ್ ಬೀಟಾ ಆವೃತ್ತಿಯಲ್ಲಿ ಪರೀಕ್ಷಿಸಲಾಗಿತ್ತು. ಇದೀಗ iOS ಟೆಸ್ಟ್ ಫ್ಲೈಟ್ ಆವೃತ್ತಿಯಲ್ಲಿಯೂ ಇದು ಕಾಣಿಸಿಕೊಂಡಿದೆ. ಅಂದರೆ ಶೀಘ್ರದಲ್ಲೇ ಎರಡೂ ಪ್ಲಾಟ್‌ಫಾರ್ಮ್ ಬಳಕೆದಾರರಿಗೆ ಈ ಹೊಸ ಅನುಭವ ಸಿಗುವ ಸಾಧ್ಯತೆ ಇದೆ.

ಗ್ರೀನ್ ಸ್ಟೇಟಸ್ ಬಬಲ್ ಮೂಲಕ ಮಾಹಿತಿ

ಹೊಸ ವ್ಯವಸ್ಥೆಯಲ್ಲಿ ಆನ್‌ಲೈನ್‌ನಲ್ಲಿರುವವರ ಪ್ರೊಫೈಲ್ ಫೋಟೋ ಪಕ್ಕದಲ್ಲಿ ಹಸಿರು ಬಣ್ಣದ ಸ್ಟೇಟಸ್ ಸೂಚನೆ ಕಾಣಲಿದೆ. ಇದರಿಂದ ಯಾರು ಸಕ್ರಿಯರಾಗಿದ್ದಾರೆ ಎಂಬುದು ಕ್ಷಣಾರ್ಧದಲ್ಲೇ ತಿಳಿಯುತ್ತದೆ. ಅಲ್ಲದೆ, ಕಂಟಾಕ್ಟ್ ಹುಡುಕಲು ಪ್ರತ್ಯೇಕ ಸರ್ಚ್ ಬಾರ್ ಕೂಡ ನೀಡಲಾಗುತ್ತದೆ.

ಮೊಬೈಲ್ ನಂಬರ್ ನಮೂದಿಸುವುದು ಅಥವಾ QR ಕೋಡ್ ಸ್ಕ್ಯಾನ್ ಮಾಡುವ ಮೂಲಕ ಹೊಸ ಕಂಟಾಕ್ಟ್ ಸೇರಿಸುವ ಅವಕಾಶವೂ ಈ ವಿಭಾಗದಲ್ಲೇ ದೊರೆಯಲಿದೆ. ಬಳಕೆದಾರರಿಗೆ ಹೆಚ್ಚು ವೇಗವಾಗಿ ಮತ್ತು ಸುಲಭವಾಗಿ ಸಂಪರ್ಕಗಳನ್ನು ನಿರ್ವಹಿಸಲು ಈ ಫೀಚರ್ ನೆರವಾಗಲಿದೆ.

ಪ್ರೈವಸಿ ಸೆಟ್ಟಿಂಗ್‌ಗೆ ಮಹತ್ವ

ಆದರೆ ಎಲ್ಲರಿಗೂ ಈ ಮಾಹಿತಿ ಕಾಣುವುದಿಲ್ಲ. ಯಾರಾದರೂ ತಮ್ಮ ಪ್ರೈವಸಿ ಸೆಟ್ಟಿಂಗ್‌ನಲ್ಲಿ “ಆನ್‌ಲೈನ್ ಸ್ಟೇಟಸ್” ಅಥವಾ “ಲಾಸ್ಟ್ ಸೀನ್” ಆಯ್ಕೆಯನ್ನು ಆಫ್ ಮಾಡಿಕೊಂಡಿದ್ದರೆ, ಅವರು ಈ ಹೊಸ ಕಂಟಾಕ್ಟ್ಸ್ ಹಬ್ ಪಟ್ಟಿಯಲ್ಲಿ ಕಾಣಿಸಿಕೊಳ್ಳುವುದಿಲ್ಲ. ಹೀಗಾಗಿ ಬಳಕೆದಾರರ ಗೌಪ್ಯತೆಯನ್ನೂ ವಾಟ್ಸಪ್ ಗಮನದಲ್ಲಿಟ್ಟುಕೊಂಡಿದೆ.

ವಾಟ್ಸಪ್ ಬಳಕೆ ಇನ್ನಷ್ಟು ಸರಳ ಮತ್ತು ವೇಗವಾಗಿಸುವ ದಿಕ್ಕಿನಲ್ಲಿ ಕಂಪನಿ ಹೊಸ ಹೊಸ ಪ್ರಯೋಗಗಳನ್ನು ಮಾಡುತ್ತಿದ್ದು, ಈ ಫೀಚರ್ ಕೂಡ ಬಳಕೆದಾರರಲ್ಲಿ ಹೆಚ್ಚಿನ ಕುತೂಹಲ ಮೂಡಿಸಿದೆ.