ಎಟಿಎಂ ಕಾರ್ಡ್ ಇಲ್ಲದೆ ಹಣ ತೆಗೆಯುವ ಸುಲಭ ವಿಧಾನ! ಕ್ಯೂಆರ್ ಸ್ಕ್ಯಾನ್ ಮಾಡಿ ಸಾಕು
ಎಟಿಎಂ ಕಾರ್ಡ್ ಇಲ್ಲದಿದ್ದರೂ ಯುಪಿಐ ಆಧಾರಿತ ಕಾರ್ಡ್‌ಲೆಸ್ ವ್ಯವಸ್ಥೆಯಿಂದ ಗೂಗಲ್ ಪೇ, ಫೋನ್‌ಪೇ ಮೂಲಕ ಎಟಿಎಂನಲ್ಲಿ ಕ್ಯೂಆರ್ ಸ್ಕ್ಯಾನ್ ಮಾಡಿ ಸುರಕ್ಷಿತವಾಗಿ ಹಣ ತೆಗೆಯುವ ವಿಧಾನವನ್ನು ಇಲ್ಲಿ ಸರಳವಾಗಿ ವಿವರಿಸಲಾಗಿದೆ
- ಎಟಿಎಂ ಕಾರ್ಡ್ ಇಲ್ಲದೆ ಹಣ ಡ್ರಾ
- ಯುಪಿಐ ಕಾರ್ಡ್‌ಲೆಸ್ ವಿತ್‌ಡ್ರಾ ವಿಧಾನ
- ಗೂಗಲ್ ಪೇ ಮೂಲಕ ನಗದು
Cardless Cash: ಪರ್ಸ್‌ನಲ್ಲಿ ಎಟಿಎಂ ಕಾರ್ಡ್ ಇಲ್ಲದೆ ಬ್ಯಾಂಕ್‌ಗೆ ಹೋಗಿ ಹಿಂದಿರುಗಿದ ದಿನಗಳು ಈಗ ಹಳೆಯದಾಗುತ್ತಿವೆ. ತಂತ್ರಜ್ಞಾನ ಬೆಳವಣಿಗೆಯೊಂದಿಗೆ, ಸ್ಮಾರ್ಟ್‌ಫೋನ್ (Smartphone) ಇದ್ದರೆ ಸಾಕು, ಎಟಿಎಂನಿಂದ ನಗದು ಪಡೆಯುವ ವ್ಯವಸ್ಥೆ ಈಗ ಲಭ್ಯವಾಗಿದೆ.
UPI ಆಧಾರಿತ ಕಾರ್ಡ್‌ಲೆಸ್ ಕ್ಯಾಶ್ ವಿತ್‌ಡ್ರಾ ಸೌಲಭ್ಯ ಬಳಸಿ, ಗೂಗಲ್ ಪೇ ಸೇರಿದಂತೆ ಹಲವು ಯುಪಿಐ ಅಪ್ಲಿಕೇಶನ್‌ಗಳ ಮೂಲಕ ನೇರವಾಗಿ ಎಟಿಎಂನಿಂದ ಹಣ ತೆಗೆಯಬಹುದು.
ಗೂಗಲ್ ಪೇ ಮೂಲಕ ಹಣ ತೆಗೆಯುವುದು ಹೇಗೆ?
ಈ ಸೌಲಭ್ಯ ಬಳಸಲು ಯುಪಿಐ ಸಪೋರ್ಟ್ ಇರುವ ಎಟಿಎಂಗೆ ಹೋಗಬೇಕು. ಎಟಿಎಂ ಸ್ಕ್ರೀನ್‌ನಲ್ಲಿ ‘UPI Cash Withdrawal’ ಅಥವಾ ‘Cardless Cash Withdrawal’ ಆಯ್ಕೆಯನ್ನು ಆರಿಸಬೇಕು. ನಂತರ ತೆಗೆದುಕೊಳ್ಳಬೇಕಾದ ಮೊತ್ತವನ್ನು ನಮೂದಿಸಿದರೆ, ಸ್ಕ್ರೀನ್‌ನಲ್ಲಿ ಕ್ಯೂಆರ್ ಕೋಡ್ ಕಾಣಿಸುತ್ತದೆ.
ಮೊಬೈಲ್‌ನಲ್ಲಿ ಗೂಗಲ್ ಪೇ ಅಪ್ ತೆರೆದು ಕ್ಯೂಆರ್ ಕೋಡ್ ಸ್ಕ್ಯಾನ್ ಮಾಡಬೇಕು. ಬ್ಯಾಂಕ್ ಖಾತೆ ಆಯ್ಕೆ ಮಾಡಿದ ಬಳಿಕ ಯುಪಿಐ ಪಿನ್ ನಮೂದಿಸಿದರೆ ವ್ಯವಹಾರ ಪೂರ್ಣಗೊಳ್ಳುತ್ತದೆ. ತಕ್ಷಣವೇ ಎಟಿಎಂನಿಂದ ನಗದು ಹೊರಬರುತ್ತದೆ.
ಮಿತಿಗಳು ಮತ್ತು ಲಭ್ಯತೆ
ಒಂದು ವ್ಯವಹಾರದಲ್ಲಿ ಗರಿಷ್ಠ ₹10,000 ವರೆಗೆ ಮಾತ್ರ ಹಣ ತೆಗೆಯಬಹುದು. ಕನಿಷ್ಠ ಮೊತ್ತ ₹100. ದಿನನಿತ್ಯದ ಮಿತಿ ನಿಮ್ಮ ಬ್ಯಾಂಕ್ ಹಾಗೂ ಯುಪಿಐ ಲಿಮಿಟ್ ಮೇಲೆ ಅವಲಂಬಿತವಾಗಿರುತ್ತದೆ.
ಎಲ್ಲಾ ಎಟಿಎಂಗಳು ಈ ಸೌಲಭ್ಯ ನೀಡುವುದಿಲ್ಲ. ಐಸಿಸಿಡಬ್ಲ್ಯು (ICCW) ಸಕ್ರಿಯಗೊಳಿಸಿರುವ ಎಟಿಎಂಗಳಲ್ಲಿ ಮಾತ್ರ ಈ ವ್ಯವಸ್ಥೆ ಕೆಲಸ ಮಾಡುತ್ತದೆ. ಗೂಗಲ್ ಪೇ ಜೊತೆಗೆ ಫೋನ್‌ಪೇ, ಪೇಟಿಎಂ ಮತ್ತು ಭೀಮ್ ಅಪ್‌ಗಳಲ್ಲೂ ಈ ಫೀಚರ್ ಲಭ್ಯವಿದೆ.
ಸುರಕ್ಷತೆ ಮುಖ್ಯ
ಎಟಿಎಂ ಒಳಗೆ ವ್ಯವಹಾರ ಮಾಡುವಾಗ ಯಾರೂ ನೋಡದಂತೆ ಜಾಗ್ರತೆ ವಹಿಸಬೇಕು. ಕ್ಯೂಆರ್ ಕೋಡ್ ಮತ್ತು ಯುಪಿಐ ಪಿನ್ ಅನ್ನು ಯಾರಿಗೂ ತೋರಿಸಬಾರದು. ಅನುಮಾನಾಸ್ಪದ ಲಿಂಕ್‌ಗಳು ಅಥವಾ ಸಂದೇಶಗಳಿಗೆ ಪ್ರತಿಕ್ರಿಯಿಸಬಾರದು. ವ್ಯವಹಾರ ಮುಗಿದ ನಂತರ ಅಪ್‌ನಲ್ಲಿ ದೃಢೀಕರಣ ಸಂದೇಶ ಪರಿಶೀಲಿಸುವುದು ಅಗತ್ಯ.
