ರಾಖಿ ಕಟ್ಟಿದ ತಂಗಿಯನ್ನೇ ಕೊಂದ ಅಣ್ಣ! ಕಾರಣ ಕೇಳಿ ಬೆಚ್ಚಿಬಿದ್ದ ಪೊಲೀಸರು
ಉತ್ತರ ಪ್ರದೇಶದ ಝಾನ್ಸಿಯಲ್ಲಿ ರಾಖಿ ಕಟ್ಟಿದ ಕೆಲವೇ ಗಂಟೆಗಳಲ್ಲಿ ಅಣ್ಣ ತನ್ನ ಸಹೋದರಿಯನ್ನು ಹತ್ಯೆ ಮಾಡಿದ ಭೀಕರ ಘಟನೆ ನಡೆದಿದೆ. ಹಿಂದಿನ ದಿನವೇ ಆಕೆಯ ಪ್ರಿಯಕರನನ್ನೂ ಕೊಂದಿರುವುದು ಬೆಳಕಿಗೆ ಬಂದಿದೆ.
- ರಾಖಿ ಕಟ್ಟಿದ ದಿನ ಅಣ್ಣ ಸಹೋದರಿಯನ್ನು ಕೊಂದ ಘಟನೆ
- ಹಿಂದಿನ ದಿನವೇ ಪ್ರಿಯಕರನ ಹತ್ಯೆ ಮಾಡಿದ ಅಣ್ಣ ಮತ್ತು ಸ್ನೇಹಿತ
- ಝಾನ್ಸಿಯಲ್ಲಿ ಇಬ್ಬರ ಹತ್ಯೆ ಪ್ರಕರಣದಲ್ಲಿ ಇಬ್ಬರು ಬಂಧನ
ಉತ್ತರ ಪ್ರದೇಶದ (Uttar Pradesh) ಝಾನ್ಸಿ ಜಿಲ್ಲೆಯಲ್ಲಿ ನಡುಗಿಸುವ ಘಟನೆ ಬೆಳಕಿಗೆ ಬಂದಿದೆ. ಅಣ್ಣನ ಕೈಯಲ್ಲಿ ರಾಖಿ ಕಟ್ಟಿದ ಕೆಲವೇ ಗಂಟೆಗಳಲ್ಲೇ ಸಹೋದರಿಯ ಜೀವ ಅಂತ್ಯಗೊಂಡಿದೆ. ಇದಕ್ಕೂ ಮೊದಲು, ಆಕೆಯ ಪ್ರಿಯಕರನನ್ನೂ ಹತ್ಯೆ ಮಾಡಲಾಗಿತ್ತು.
ಘಟನೆ ಗರೌತ್ ಪ್ರದೇಶದಲ್ಲಿ ನಡೆದಿದೆ. 18 ವರ್ಷದ ಕುಮಾರಿ ಮತ್ತು 19 ವರ್ಷದ ವಿಷಾಲ್ ಕಳೆದ ಕೆಲವು ತಿಂಗಳಿನಿಂದ ಪ್ರೀತಿಸುತ್ತಿದ್ದರು. ನಾಲ್ಕು ತಿಂಗಳ ಹಿಂದೆ ಇಬ್ಬರೂ ಮನೆ ಬಿಟ್ಟು ಓಡಿ ಹೋದರೂ, ಕುಟುಂಬಗಳ ಒತ್ತಾಯಕ್ಕೆ ತಲೆಬಾಗಿದ್ದು, ಮನೆಗೆ ಮರಳಿದ್ದರು. ಕುಟುಂಬಗಳ ನಡುವೆ ಒಪ್ಪಂದವೂ ನಡೆದು, ಸ್ವಲ್ಪ ದಿನ ಇಬ್ಬರೂ ದೂರವಿದ್ದರು. ಆದರೆ ಇತ್ತೀಚೆಗೆ ಇಬ್ಬರೂ ಮತ್ತೆ ಭೇಟಿಯಾಗಲು ಪ್ರಾರಂಭಿಸಿದರು.
ಈ ಸಂಗತಿ ಕುಮಾರಿಯ ಅಣ್ಣ, 25 ವರ್ಷದ ಅರವಿಂದ್‌ಗೆ ಇಷ್ಟ ಆಗಲಿಲ್ಲ. ಪೂಣೆಯಿಂದ ಊರಿಗೆ ಬಂದಿದ್ದ ಅವನು, ಸ್ನೇಹಿತ ಪ್ರಕಾಶ್ ಪ್ರಜಾಪತಿಯನ್ನು ಜೊತೆಯಲ್ಲಿ ಕರೆತಂದು ಹತ್ಯೆಯ ಪ್ಲಾನ್ ಮಾಡಿದ್ದ. ಆಗಸ್ಟ್ 7ರಂದು ಉದ್ಯೋಗದ ನೆಪದಲ್ಲಿ ವಿಷಾಲ್‌ನ್ನು ಕರೆದುಕೊಂಡು ಹೋಗಿ ಇಬ್ಬರೂ ಕೊಂದರು. ಬಳಿಕ, ಗೂಢಾ ಗ್ರಾಮದ ಬಳಿ ವಿಷಾಲ್‌ನ ಶವ ಪತ್ತೆಯಾಯಿತು. ಇದರಿಂದ ಪೊಲೀಸರಿಗೆ ಸಂಶಯ ಹುಟ್ಟಿದ್ದು, ಪ್ರಕರಣ ದಾಖಲಿಸಲಾಯಿತು.
ಇದರ ಮಧ್ಯೆ, ಶನಿವಾರ ಕುಮಾರಿ ತನ್ನ ಅಣ್ಣ ಅರವಿಂದ್‌ಗೆ ರಾಖಿ ಕಟ್ಟಿದಳು. ಕೆಲವೇ ಹೊತ್ತಿನ ನಂತರ ಅವನು ಆಕೆಯನ್ನು ಔಷಧಿ ತರಬೇಕೆಂದು ಕರೆದುಕೊಂಡು ಹೋಗಿ, ಸ್ನೇಹಿತನೊಂದಿಗೆ ಸೇರಿ ಹತ್ಯೆ ಮಾಡಿದ. ಭಾನುವಾರ ಚಂದ್ರಪುರ ಗ್ರಾಮದ ಹತ್ತಿರದ ಬಯಲಿನಲ್ಲಿ ಕುಮಾರಿಯ ಶವ ಪತ್ತೆಯಾಯಿತು.
ಪೊಲೀಸರ ತನಿಖೆಯಲ್ಲಿ ಅರವಿಂದ್ ಮತ್ತು ಪ್ರಕಾಶ್ ಇಬ್ಬರೂ ಪ್ರಿಯಕರ ವಿಷಾಲ್ ಮತ್ತು ಸಹೋದರಿ ಕುಮಾರಿಯನ್ನು ಕ್ರಮವಾಗಿ ಎರಡು ದಿನಗಳಲ್ಲಿ ಕೊಂದಿರುವುದು ದೃಢಪಟ್ಟಿದೆ. ಇದೀಗ ಇಬ್ಬರನ್ನೂ ಬಂಧಿಸಿ ಜೈಲಿಗೆ ಕಳುಹಿಸಲಾಗಿದೆ.
Brother Kills Sister After Rakhi in Jhansi
