Union Budget 2026: ಕೇಂದ್ರ ಬಜೆಟ್ 2026ರಲ್ಲಿ ಸಾಮಾನ್ಯ ಹಾಗೂ ಮಧ್ಯಮ ವರ್ಗಕ್ಕೆ ಸಿಹಿ ಸುದ್ದಿ
Union Budget 2026: ಕೇಂದ್ರ ಬಜೆಟ್ 2026ರಲ್ಲಿ ಸಾಮಾನ್ಯ ಹಾಗೂ ಮಧ್ಯಮ ವರ್ಗಕ್ಕೆ ತೆರಿಗೆ, ಆರೋಗ್ಯ, ಮಹಿಳಾ ಸಬಲೀಕರಣ, ಪ್ರಯಾಣ, ಐಟಿ ಮತ್ತು ಕೃಷಿ ಕ್ಷೇತ್ರಗಳಲ್ಲಿ ನೇರ ಲಾಭ ನೀಡುವ ಹಲವು ನಿರ್ಧಾರಗಳನ್ನು ಸರ್ಕಾರ ಪ್ರಕಟಿಸಿದೆ. ಐಟಿಆರ್ ಅವಧಿ ವಿಸ್ತರಣೆ ಹಾಗೂ ಟಿಸಿಎಸ್ ಕಡಿತ ಕ್ರಮಗಳು ಸೇರಿವೆ
- ಸಾಮಾನ್ಯ–ಮಧ್ಯಮ ವರ್ಗಕ್ಕೆ ತೆರಿಗೆ ಮತ್ತು ವೆಚ್ಚಗಳಲ್ಲಿ ರಿಲೀಫ್
- ಬಜೆಟ್ 2026: ಐಟಿಆರ್ ಗಡುವು ವಿಸ್ತರಣೆ, TCS ದರ ಕಡಿತ
- ಜನಪರ ನಿರ್ಧಾರಗಳು: ಮಹಿಳಾ ಯೋಜನೆ, ಆರೋಗ್ಯ, ಪ್ರಯಾಣ
Union Budget 2026: ಕೇಂದ್ರ ಸರ್ಕಾರ ಮಂಡಿಸಿರುವ ಬಜೆಟ್ 2026 ಸಾಮಾನ್ಯ ಮತ್ತು ಮಧ್ಯಮ ವರ್ಗದ ಜನರಿಗೆ ನೇರವಾಗಿ ಅನುಕೂಲವಾಗುವ ಹಲವು ನಿರ್ಧಾರಗಳೊಂದಿಗೆ ಗಮನ ಸೆಳೆದಿದೆ.
ತೆರಿಗೆ ಸಡಿಲಿಕೆಗಳಿಂದ ಹಿಡಿದು ಆರೋಗ್ಯ, ಶಿಕ್ಷಣ, ಪ್ರಯಾಣ ಹಾಗೂ ಉದ್ಯೋಗ ಕ್ಷೇತ್ರಗಳವರೆಗೆ ಜನಪರ ಅಂಶಗಳು ಈ ಬಜೆಟ್‌ನ ಪ್ರಮುಖ ಹೈಲೈಟ್ ಆಗಿವೆ.
ಐಟಿಆರ್ ಗಡುವಿಗೆ ವಿಸ್ತರಣೆ
ತೆರಿಗೆದಾರರಿಗೆ ದೊಡ್ಡ ನಿಟ್ಟುಸಿರು ನೀಡುವಂತೆ, ಇನ್‌ಕಮ್ ಟ್ಯಾಕ್ಸ್ ರಿಟರ್ನ್ಸ್ (ITR) ಸಲ್ಲಿಸುವ ಗಡುವನ್ನು ಜುಲೈ 31ರವರೆಗೆ ವಿಸ್ತರಿಸಲಾಗಿದೆ. ಜೊತೆಗೆ ರಿಟರ್ನ್ ಸಲ್ಲಿಕೆಯಲ್ಲಿ ತಪ್ಪುಗಳಿದ್ದರೆ, ಮಾರ್ಚ್ 31ರವರೆಗೆ ತಿದ್ದುಪಡಿ ಮಾಡುವ ಅವಕಾಶ ನೀಡಲಾಗಿದೆ. ಇದರಿಂದ ಉದ್ಯೋಗಿಗಳು ಹಾಗೂ ಸಣ್ಣ ಉದ್ಯಮಿಗಳಿಗೆ ಅನುಕೂಲವಾಗಲಿದೆ.
ಆರೋಗ್ಯ ವೆಚ್ಚ ಕಡಿತಕ್ಕೆ ಹೆಜ್ಜೆ
ಬಜೆಟ್‌ನಲ್ಲಿ 17 ವಿಧದ ಕ್ಯಾನ್ಸರ್ ಔಷಧಿಗಳ ಮೇಲಿನ ಕಸ್ಟಮ್ಸ್ ಡ್ಯೂಟಿ ಕಡಿತ ಘೋಷಿಸಲಾಗಿದೆ. ಈ ನಿರ್ಧಾರದಿಂದ ಚಿಕಿತ್ಸೆ ವೆಚ್ಚ ಇಳಿಯುವ ನಿರೀಕ್ಷೆ ಇದ್ದು, ರೋಗಿಗಳು ಮತ್ತು ಅವರ ಕುಟುಂಬಗಳಿಗೆ ಆರ್ಥಿಕ ಭಾರ ಕಡಿಮೆಯಾಗಲಿದೆ.
ವಿದೇಶಿ ಶಿಕ್ಷಣ ಮತ್ತು ಪ್ರಯಾಣಕ್ಕೆ ರಿಲೀಫ್
ಭಾರತದಿಂದ ವಿದೇಶಕ್ಕೆ ಶಿಕ್ಷಣ, ಚಿಕಿತ್ಸೆ ಅಥವಾ ಪ್ರವಾಸಕ್ಕಾಗಿ ಹಣ ಕಳುಹಿಸುವಾಗ ವಿಧಿಸಲಾಗುತ್ತಿದ್ದ TCS ದರವನ್ನು 20%ರಿಂದ 2%ಕ್ಕೆ ಇಳಿಸಲಾಗಿದೆ. ಇದರಿಂದ ಮಧ್ಯಮ ವರ್ಗದ ಕುಟುಂಬಗಳ ವಿದೇಶಿ ವೆಚ್ಚಗಳು ಸಾಕಷ್ಟು ಕಡಿಮೆಯಾಗಲಿವೆ. ರಸ್ತೆ ಅಪಘಾತ ಪರಿಹಾರದ ಮೇಲಿನ ಬಡ್ಡಿಗೆ ತೆರಿಗೆ ವಿನಾಯಿತಿಯೂ ಘೋಷಿಸಲಾಗಿದೆ.
ಮಹಿಳೆಯರು ಮತ್ತು ಉದ್ಯಮಿಗಳಿಗೆ ಉತ್ತೇಜನ
ಗ್ರಾಮೀಣ ಪ್ರದೇಶಗಳಲ್ಲಿ ಮಹಿಳಾ ಉದ್ಯಮಿಗಳಿಗೆ ಬೆಂಬಲ ನೀಡಲು ಶೀ ಮಾರ್ಟ್‌ಗಳ ಸ್ಥಾಪನೆ ಘೋಷಿಸಲಾಗಿದೆ. ಮಹಿಳೆಯರು ಸ್ವಂತವಾಗಿ ವ್ಯಾಪಾರ ಆರಂಭಿಸಲು ಇದು ದೊಡ್ಡ ಅವಕಾಶವಾಗಲಿದೆ. ಜಿಲ್ಲೆಗೊಂದು ಲೇಡೀಸ್ ಹಾಸ್ಟೆಲ್ ಸ್ಥಾಪನೆಯೂ ಮಹಿಳಾ ಸಬಲೀಕರಣದ ಭಾಗವಾಗಿದೆ.
ಐಟಿ, ಡೇಟಾ ಸೆಂಟರ್ ಮತ್ತು ಫಾರ್ಮಾ ಬೆಂಬಲ
ಐಟಿ ಕಂಪನಿಗಳಿಗೆ ಹೆಚ್ಚುವರಿ ತೆರಿಗೆ ಸಡಿಲಿಕೆ ನೀಡಲಾಗಿದ್ದು, ಕ್ಲೌಡ್ ಡೇಟಾ ಸೆಂಟರ್‌ಗಳಿಗೆ ತೆರಿಗೆ ವಿನಾಯಿತಿ ಘೋಷಿಸಲಾಗಿದೆ. ಜೊತೆಗೆ ಫಾರ್ಮಾ ಕ್ಷೇತ್ರಕ್ಕಾಗಿ ‘ಬಯೋಫಾರ್ಮಾ ಶಕ್ತಿ’ ಯೋಜನೆ ಪರಿಚಯಿಸಲಾಗಿದ್ದು, ಇದು ಔಷಧ ಉದ್ಯಮಕ್ಕೆ ಹೊಸ ಬಲ ನೀಡಲಿದೆ.
ಸಾರಿಗೆ, ಕೃಷಿ ಮತ್ತು ಪ್ರವಾಸೋದ್ಯಮ ಅಭಿವೃದ್ಧಿ
ಹೈ-ಸ್ಪೀಡ್ ರೈಲು ಕಾರಿಡಾರ್‌ಗಳ ಘೋಷಣೆಯಿಂದ ಉದ್ಯೋಗ ಮತ್ತು ವ್ಯಾಪಾರ ಚಟುವಟಿಕೆಗಳು ಹೆಚ್ಚಾಗುವ ನಿರೀಕ್ಷೆ ಇದೆ. ಕೃಷಿ ಕ್ಷೇತ್ರದಲ್ಲಿ 500 ಜಲಾಶಯಗಳ ಅಭಿವೃದ್ಧಿ, ವಾಲ್ನಟ್, ಬಾದಾಮಿ ತೋಟಗಳಿಗೆ ಉತ್ತೇಜನ ನೀಡಲಾಗಿದೆ. ತಿರುಪತಿ, ಚಾರ್ಮಿನಾರ್ ಸೇರಿದಂತೆ ಪವಿತ್ರ ಹಾಗೂ ಐತಿಹಾಸಿಕ ಸ್ಥಳಗಳ ಅಭಿವೃದ್ಧಿಗೂ ಬಜೆಟ್‌ನಲ್ಲಿ ಆದ್ಯತೆ ನೀಡಲಾಗಿದೆ.
ಒಟ್ಟಾರೆ, ಬಜೆಟ್ 2026 ಸಾಮಾನ್ಯ ಮತ್ತು ಮಧ್ಯಮ ವರ್ಗದ ಜೀವನಶೈಲಿಗೆ ನೇರ ಪರಿಣಾಮ ಬೀರುವ, ಜನಪರ ಹಾಗೂ ಅಭಿವೃದ್ಧಿ ಮುಖಿ ಬಜೆಟ್ ಎಂದು ವಿಶ್ಲೇಷಕರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
