ಕಾರ್ ಡ್ರೈವಿಂಗ್ ಗೂ ಹೆಲ್ಮೆಟ್ ಬೇಕಾ? ಕಾರು ಚಾಲಕನಿಗೆ ಹೆಲ್ಮೆಟ್ ಇಲ್ಲವೆಂದು 500 ದಂಡ! ವೈರಲ್ ಸುದ್ದಿ
ಅಥಣಿಯಲ್ಲಿ ಕಾರು ಚಾಲನೆ ಮಾಡುವಾಗ ಹೆಲ್ಮೆಟ್ ಧರಿಸಿಲ್ಲ ಎಂದು ಆರೋಪಿಸಿ ₹500 ದಂಡದ ನೋಟಿಸ್ ಬಂದಿದ್ದು, ಎಐ ಕ್ಯಾಮೆರಾದ ಕಾರ್ಯವೈಖರಿ ಕುರಿತು ಸಾಮಾಜಿಕ ಜಾಲತಾಣದಲ್ಲಿ ಚರ್ಚೆ ಶುರುವಾಗಿದೆ.
- ಕಾರು ಸವಾರನಿಗೆ ₹500 ದಂಡ
- ‘ನೋ ಹೆಲ್ಮೆಟ್’ ಎಂದು ನೋಟಿಸ್
- ಎಐ ಕ್ಯಾಮೆರಾ ವಿರುದ್ಧ ಅಸಮಾಧಾನ
ಬೆಳಗಾವಿ (Belagavi): ಕಾರು ಓಡಿಸುತ್ತಿದ್ದ ವ್ಯಕ್ತಿಯೊಬ್ಬರಿಗೆ ಹೆಲ್ಮೆಟ್ ಧರಿಸಿಲ್ಲ ಎಂದು ₹500 ದಂಡ ವಿಧಿಸಿರುವ ವಿಚಿತ್ರ ಘಟನೆ (Car Driver Gets Helmet Fine) ಜಿಲ್ಲೆಯ ಅಥಣಿ ಪಟ್ಟಣದಲ್ಲಿ ನಡೆದಿದೆ. ಸಂಚಾರ ಪೊಲೀಸರಿಂದ ಬಂದ ದಂಡದ ನೋಟಿಸ್ (Fine Notice) ಕಂಡು ಕಾರು ಮಾಲೀಕ ಸುಭಾಷ್ ಬೋಜನೆ (Subhash Bojane) ಅಚ್ಚರಿಗೊಳಗಾಗಿದ್ದಾರೆ.
ಅಥಣಿ ಪಟ್ಟಣದ ಅಂಬೇಡ್ಕರ್ ವೃತ್ತದ ಮೂಲಕ ಕಾರು ಸಂಚರಿಸಿದ್ದನ್ನು ಎಐ ಕ್ಯಾಮೆರಾ (AI Camera) ದಾಖಲಿಸಿತ್ತು. ಬಳಿಕ ಕಾರಿನ ಮಾಲೀಕರ ವಾಟ್ಸ್ಆ್ಯಪ್ಗೆ ಸಂಚಾರ ನಿಯಮ ಉಲ್ಲಂಘನೆ ಮಾಡಿರುವುದಾಗಿ ₹500 ದಂಡದ ಸಂದೇಶ ಬಂದಿದೆ.
ನೋಟಿಸ್ನಲ್ಲಿ ಉಲ್ಲಂಘನೆಯ ಕಾರಣವಾಗಿ ‘ನೋ ಹೆಲ್ಮೆಟ್’ (No Helmet) ಎಂದು ನಮೂದಿಸಲಾಗಿತ್ತು. ಕಾರು ಚಾಲನೆ ಮಾಡುವಾಗ ಹೆಲ್ಮೆಟ್ ಹಾಕಿಲ್ಲ ಎಂಬ ಕಾರಣಕ್ಕೆ ದಂಡ ಬಂದಿರುವುದನ್ನು ಕಂಡು ಸುಭಾಷ್ ಬೋಜನೆ ತಬ್ಬಿಬ್ಬಾಗಿದ್ದಾರೆ.
ಈ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿರುವ ಅವರು, “ಕಾರು ಓಡಿಸುವಾಗ ಹೆಲ್ಮೆಟ್ ಹಾಕಬೇಕೇ?” ಎಂದು ಪ್ರಶ್ನಿಸಿದ್ದಾರೆ. ಎಐ ಕ್ಯಾಮೆರಾದಿಂದ ಆಗಿರುವ ಯಡವಟ್ಟನ್ನು ತೋರಿಸಲು ಅವರು ಹೆಲ್ಮೆಟ್ ಧರಿಸಿಕೊಂಡೇ ಕಾರು ಚಾಲನೆ ಮಾಡುವ ವಿಡಿಯೋವನ್ನೂ ಮಾಡಿದ್ದಾರೆ.
ಸಾಮಾನ್ಯವಾಗಿ ದ್ವಿಚಕ್ರ ವಾಹನ ಸವಾರರಿಗೆ ಹೆಲ್ಮೆಟ್ ಕಡ್ಡಾಯವಾಗಿದ್ದು, ಕಾರು ಚಾಲಕರಿಗೆ ಈ ನಿಯಮ ಅನ್ವಯಿಸುವುದಿಲ್ಲ. ಹೀಗಾಗಿ ಕಾರಿಗೆ ‘ನೋ ಹೆಲ್ಮೆಟ್’ ಉಲ್ಲಂಘನೆ ಎಂದು ದಂಡದ ನೋಟಿಸ್ ಬಂದಿರುವುದು ಇದೀಗ ಚರ್ಚೆಗೆ ಕಾರಣವಾಗಿದೆ.
ಸುಭಾಷ್ ಬೋಜನೆ ಬಳಿಕ ತಮ್ಮ ಅನುಭವದ ವಿಡಿಯೋವನ್ನು ಸಾಮಾಜಿಕ ಜಾಲತಾಣದಲ್ಲಿ (Social Media) ಹಂಚಿಕೊಂಡಿದ್ದಾರೆ. ವಿಡಿಯೋ ವೈರಲ್ ಆಗುತ್ತಿದ್ದಂತೆ ಎಐ ಆಧಾರಿತ ಸಂಚಾರ ನಿಯಂತ್ರಣ ವ್ಯವಸ್ಥೆಯಲ್ಲಿ ಇಂತಹ ತಪ್ಪುಗಳು ಹೇಗೆ ಸಂಭವಿಸಿವೆ ಎಂಬ ಪ್ರಶ್ನೆಗಳೂ ಕೇಳಿಬರುತ್ತಿವೆ.
ಅಥಣಿ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ಈ ಘಟನೆ ನಡೆದಿದ್ದು, ಸಂಚಾರ ನಿಯಮ ಉಲ್ಲಂಘನೆ ಪತ್ತೆಹಚ್ಚಲು ಬಳಸುವ ಕ್ಯಾಮೆರಾದ ದಾಖಲಾತಿ ಹಾಗೂ ದಂಡದ ನೋಟಿಸ್ ಕುರಿತು ಇದೀಗ ಸಾರ್ವಜನಿಕರ ಗಮನ ಸೆಳೆದಿದೆ.
