ಮೊಟ್ಟೆ ಬೆಲೆ ಏರಿಕೆ.. ಕಾರಣ ಇಲ್ಲಿದೆ! ಜನ ಸಾಮಾನ್ಯರಿಗೆ ಮತ್ತೊಂದು ಶಾಕ್
Egg Prices: ಇಥನಾಲ್ ಉತ್ಪಾದನೆಗೆ ಜೋಳದ ಬಳಕೆ ಹೆಚ್ಚುತ್ತಿರುವ ಬೆನ್ನಲ್ಲೇ ಪೌಲ್ಟ್ರಿ ಫೀಡ್ ವೆಚ್ಚ ಏರಿಕೆಯಾಗಿದೆ ಎಂಬ ವಾದ ಕೇಳಿಬರುತ್ತಿದ್ದು, ಮೊಟ್ಟೆ ಬೆಲೆ ಹೆಚ್ಚಳ ಸಾಮಾನ್ಯರ ಆಹಾರ ಬಜೆಟ್ ಮೇಲೆ ಪರಿಣಾಮ ಬೀರುವ ಆತಂಕ ಮೂಡಿಸಿದೆ.
- ಮೊಟ್ಟೆ ಬೆಲೆ ಚಿಲ್ಲರೆ ಮಾರುಕಟ್ಟೆಯಲ್ಲಿ ₹9ರವರೆಗೆ ಏರಿಕೆ
- ಇಥನಾಲ್ ಉತ್ಪಾದನೆಗೆ ಜೋಳ ಬಳಕೆ ಹೆಚ್ಚಳ
- ಪೌಲ್ಟ್ರಿ ಫೀಡ್ ದುಬಾರಿಯಾಗಿರುವುದು ಬೆಲೆ ಏರಿಕೆಗೆ ಕಾರಣ
Egg Prices: ಕಡಿಮೆ ದರದಲ್ಲಿ ಸಿಗುವ ಉತ್ತಮ ಪ್ರೋಟೀನ್ ಆಹಾರವೆಂದೇ ಪರಿಗಣಿಸಲಾಗುವ ಮೊಟ್ಟೆಯ ಬೆಲೆ ಇದೀಗ ಏರಿಕೆಯಾಗಿದೆ. ಫಾರ್ಮ್ಗೇಟ್ನಲ್ಲಿ ಸುಮಾರು ₹7ಕ್ಕೆ ಸಿಗುತ್ತಿದ್ದ ಒಂದು ಮೊಟ್ಟೆ, ಚಿಲ್ಲರೆ ಮಾರುಕಟ್ಟೆಯಲ್ಲಿ ₹8.50ರಿಂದ ₹9ರವರೆಗೆ ಮಾರಾಟವಾಗುತ್ತಿದೆ ಎಂದು ವರದಿಯಾಗಿದೆ. ಇದರಿಂದ ಗ್ರಾಹಕರಿಗೆ ಮೊಟ್ಟೆ ಖರೀದಿಯ ಖರ್ಚು ಹೆಚ್ಚಾಗಿದೆ.
ಮುಂದಿನ ದಿನಗಳಲ್ಲಿ ಚಳಿಗಾಲ ಆರಂಭವಾಗಲಿರುವುದರಿಂದ ಮೊಟ್ಟೆಗೆ ಬೇಡಿಕೆ ಮತ್ತಷ್ಟು ಹೆಚ್ಚಾಗುವ ಸಾಧ್ಯತೆಯಿದೆ. ಹೀಗಾಗಿ ಈಗಾಗಲೇ ಏರಿರುವ ಬೆಲೆ ಮುಂದಿನ ದಿನಗಳಲ್ಲಿ ಇನ್ನಷ್ಟು ಪರಿಣಾಮ ಬೀರುವ ಸಾಧ್ಯತೆ ಬಗ್ಗೆ ಚರ್ಚೆ ನಡೆಯುತ್ತಿದೆ.
ಮೊಟ್ಟೆ ಬೆಲೆ ಏರಿಕೆಗೆ ಪ್ರಮುಖ ಕಾರಣ ಪೌಲ್ಟ್ರಿ ಫೀಡ್ನ ವೆಚ್ಚ ಹೆಚ್ಚಳ ಎಂಬ ವಾದ ಕೇಳಿಬರುತ್ತಿದೆ. ಕೋಳಿ ಆಹಾರದಲ್ಲಿ (Poultry Feed) ಸುಮಾರು ಶೇ.50ರಿಂದ 55ರಷ್ಟು ಜೋಳವನ್ನು ಬಳಸಲಾಗುತ್ತದೆ. ಉಳಿದ ಭಾಗದಲ್ಲಿ ಮುಖ್ಯವಾಗಿ ಸೋಯಾಬೀನ್ ಸೇರಿದಂತೆ ಇತರ ಪದಾರ್ಥಗಳನ್ನು ಬಳಸಲಾಗುತ್ತದೆ.
ಇದೀಗ ಜೋಳದ ಬಳಕೆ ಇಥನಾಲ್ ಉತ್ಪಾದನೆಗೆ (Ethanol Production) ಹೆಚ್ಚಾಗಿರುವುದರಿಂದ ಪೌಲ್ಟ್ರಿ ಉದ್ಯಮಕ್ಕೆ ಅಗತ್ಯವಿರುವ ಜೋಳದ ಬೆಲೆಯ ಮೇಲೂ ಪರಿಣಾಮ ಬೀರಿದೆ ಎಂಬ ವಿಶ್ಲೇಷಣೆಗಳು ವ್ಯಕ್ತವಾಗಿವೆ. ಜೋಳ ದುಬಾರಿಯಾದರೆ ಫೀಡ್ ತಯಾರಿಕೆಯ ವೆಚ್ಚವೂ ಹೆಚ್ಚುತ್ತದೆ. ಅದರ ಪರಿಣಾಮವಾಗಿ ಮೊಟ್ಟೆಯ ಉತ್ಪಾದನಾ ವೆಚ್ಚ ಏರಬಹುದು.
ಕೇಂದ್ರ ಸರ್ಕಾರದ 2025ರಲ್ಲಿ ಲೋಕಸಭೆಯಲ್ಲಿ ನೀಡಿದ್ದ ಮಾಹಿತಿಯ ಪ್ರಕಾರ, 2024-25ರಲ್ಲಿ ಇಥನಾಲ್ ಉತ್ಪಾದನೆಗಾಗಿ 125.75 ಲಕ್ಷ ಮೆಟ್ರಿಕ್ ಟನ್ ಜೋಳವನ್ನು ಬಳಸಲಾಗಿದೆ. ಇದೇ ಅವಧಿಯಲ್ಲಿ ಜೋಳ ಆಧಾರಿತ ಡಿಸ್ಟಿಲರಿಗಳಿಗೆ 477.8 ಕೋಟಿ ಲೀಟರ್ ಇಥನಾಲ್ ಉತ್ಪಾದನೆಗೆ ಹಂಚಿಕೆ ಮಾಡಲಾಗಿತ್ತು ಎಂದು ಮಾಹಿತಿ ನೀಡಲಾಗಿತ್ತು.
ಇನ್ನೊಂದು ಗಮನಾರ್ಹ ಸಂಗತಿಯೆಂದರೆ, ಕೇವಲ ಎರಡು ವರ್ಷಗಳ ಅವಧಿಯಲ್ಲಿ ಇಥನಾಲ್ ತಯಾರಿಕೆಗೆ ಬಳಸುವ ಜೋಳದ ಪ್ರಮಾಣ 8.3 ಲಕ್ಷ ಟನ್ನಿಂದ 125.75 ಲಕ್ಷ ಟನ್ಗೆ ಏರಿಕೆಯಾಗಿದೆ ಎಂದು ವರದಿಯಾಗಿದೆ. 2025-26ರಲ್ಲೂ 125.78 ಲಕ್ಷ ಟನ್ ಜೋಳವನ್ನು ಇಥನಾಲ್ ಉತ್ಪಾದನೆಗೆ ಮೀಸಲಿಡಲಾಗಿದೆ ಎನ್ನಲಾಗಿದೆ.
ಹೀಗಾಗಿ ಇಥನಾಲ್ಗಾಗಿ ಜೋಳದ ಬಳಕೆ ಹೆಚ್ಚಳ, ಪೌಲ್ಟ್ರಿ ಫೀಡ್ ವೆಚ್ಚ ಮತ್ತು ಮೊಟ್ಟೆ ಬೆಲೆ ನಡುವಿನ ಸಂಬಂಧದ ಬಗ್ಗೆ ಈಗ ಚರ್ಚೆ ಜೋರಾಗಿದೆ. ಆದರೆ ಮೊಟ್ಟೆ ಬೆಲೆ ಏರಿಕೆಗೆ ಬೇಡಿಕೆ, ಉತ್ಪಾದನೆ, ಸಾಗಣೆ ಮತ್ತು ಇತರ ಮಾರುಕಟ್ಟೆ ಅಂಶಗಳೂ ಕಾರಣವಾಗಬಹುದು ಎಂಬುದನ್ನು ಗಮನಿಸಬೇಕಿದೆ.
