Farmer Robbery: ಕಣ್ಣಿಗೆ ಕಾರದ ಪುಡಿ ಎರಚಿ ರೈತನಿಂದ 25 ಲಕ್ಷ ದೋಚಿದ ಖತರ್ನಾಕ್ ಗ್ಯಾಂಗ್
ಮಧ್ಯಪ್ರದೇಶದ ಅಶೋಕ್‌ನಗರ ಜಿಲ್ಲೆಯಲ್ಲಿ ಬೈಕ್‌ನಲ್ಲಿ ಸಾಗುತ್ತಿದ್ದ ರೈತನ ಕಣ್ಣಿಗೆ ಕಾರದ ಪುಡಿ ಎರಚಿ 25 ಲಕ್ಷ ನಗದು ದೋಚಿದ ಘಟನೆ ಸ್ಥಳೀಯರಲ್ಲಿ ಆತಂಕ ಹೆಚ್ಚಿಸಿದೆ, ಆರೋಪಿಗಳ ಬಂಧನಕ್ಕೆ ಹುಡುಕಾಟ ತೀವ್ರವಾಗಿದೆ
- ರೈತನ ಕಣ್ಣಿಗೆ ಕಾರದ ಪುಡಿ ದಾಳಿ ನಡೆಸಿ ದರೋಡೆ
- ಬೈಕ್‌ನಲ್ಲಿ ಸಾಗುತ್ತಿದ್ದ ರೈತನಿಂದ 25 ಲಕ್ಷ ನಗದು ದರೋಡೆ
- ಪ್ರಕರಣ ದಾಖಲಿಸಿ ಆರೋಪಿಗಳಿಗಾಗಿ ಪೊಲೀಸರ ಶೋಧ
Farmer Robbery: ಮಧ್ಯಪ್ರದೇಶದಲ್ಲಿ ರೈತರನ್ನು ಗುರಿಯಾಗಿಸಿಕೊಂಡು ನಡೆಯುತ್ತಿರುವ ಅಪರಾಧಗಳು ಜನರಲ್ಲಿ ಆತಂಕ ಹುಟ್ಟಿಸುತ್ತಿವೆ. ಸಾರ್ವಜನಿಕ ರಸ್ತೆಗಳಲ್ಲಿ ಹಗಲು ಹೊತ್ತಲ್ಲೇ ನಡೆಯುವ ದರೋಡೆಗಳು ಭದ್ರತೆ ಬಗ್ಗೆ ಪ್ರಶ್ನೆ ಎತ್ತುತ್ತಿವೆ.
ಅಶೋಕ್‌ನಗರ ಜಿಲ್ಲೆಯ ತಮ್ಮೋಯಿಯಾ ಚಕ್ ಗ್ರಾಮದ 47 ವರ್ಷದ ರೈತ ಲಖ್ವಿಂದರ್‌, ಸಂಬಂಧಿಕರಿಗೆ ಹಣ ನೀಡಲು ರೂ.25 ಲಕ್ಷ ನಗದು ತೆಗೆದುಕೊಂಡು ಬೈಕ್‌ನಲ್ಲಿ ಹೊರಟಿದ್ದ. ಮಾರ್ಗ ಮಧ್ಯೆ ತಮ್ಮೋಯಿಯಾ ಚಕ್–ಮೋಹ್ರಿ ಗ್ರಾಮಗಳ ನಡುವೆ ಈ ಘಟನೆ ನಡೆದಿದೆ.
ಕಾರದ ಪುಡಿ ಎರಚಿ ಕ್ಷಿಪ್ರ ದರೋಡೆ
ರಸ್ತೆ ಬದಿಯಲ್ಲಿ ಅಡ್ಡಗಟ್ಟಿದ ಮೂವರು ಅಪರಿಚಿತರು ಮೊದಲು ರೈತನೊಂದಿಗೆ ಮಾತನಾಡಿದ್ದಾರೆ. ಕ್ಷಣಾರ್ಧದಲ್ಲಿ ಅವರ ಬಳಿ ತಂದಿದ್ದ ಕಾರದ ಪುಡಿಯನ್ನು ರೈತನ ಕಣ್ಣಿಗೆ ಎರಚಿ, ಅವನ ಬಳಿ ಇದ್ದ ನಗದು ಬ್ಯಾಗ್ ಕಸಿದುಕೊಂಡು ಪರಾರಿಯಾಗಿದ್ದಾರೆ. ತೀವ್ರ ನೋವಿನಿಂದ ರೈತ ಸಹಾಯಕ್ಕೆ ಕೂಗಲು ಕೂಡ ಸಾಧ್ಯವಾಗದ ಸ್ಥಿತಿ ಉಂಟಾಯಿತು.
ಸ್ವಲ್ಪ ಸಮಯದ ಬಳಿಕ ತಾನೇ ಸಮಾಧಾನ ಮಾಡಿಕೊಂಡ ರೈತ ಪೊಲೀಸರನ್ನು ಸಂಪರ್ಕಿಸಿದ್ದಾನೆ. ದೂರಿನ ಮೇರೆಗೆ ಪ್ರಕರಣ ದಾಖಲಿಸಿರುವ ಪೊಲೀಸರು ತನಿಖೆ ಆರಂಭಿಸಿದ್ದು, ಆರೋಪಿಗಳ ಪತ್ತೆಗೆ ವಿಶೇಷ ತಂಡಗಳನ್ನು ರಚಿಸಲಾಗಿದೆ ಎಂದು ಸಬ್‌ ಡಿವಿಜನಲ್ ಪೊಲೀಸ್ ಅಧಿಕಾರಿ ವಿವೇಕ್ ಶರ್ಮಾ ತಿಳಿಸಿದ್ದಾರೆ. ಈ ದರೋಡೆ ಪ್ರಕರಣ ಸ್ಥಳೀಯವಾಗಿ ಭಾರಿ ಚರ್ಚೆಗೆ ಕಾರಣವಾಗಿದೆ.
