ಕತ್ತೆ ಸಾಕಾಣಿಕೆಗೆ ಕೇಂದ್ರದ ಭರ್ಜರಿ ಸಹಾಯಧನ! 50 ಲಕ್ಷ ರೂಪಾಯಿ ಸಬ್ಸಿಡಿ

• ಕತ್ತೆ ಸಾಕಾಣಿಕೆ ಯೋಜನೆ
• ಕತ್ತೆ ಸಾಕಾಣಿಕೆಗೆ ಸಹಾಯಧನ
• ಕತ್ತೆಗಳ ಸಂಖ್ಯೆ ಹೆಚ್ಚಿಸಲು ಕ್ರಮ

Donkey Farming: ದೇಶದಲ್ಲಿ ಕತ್ತೆಗಳ ಸಂಖ್ಯೆ ವೇಗವಾಗಿ ಕುಸಿಯುತ್ತಿರುವ ಹಿನ್ನೆಲೆಯಲ್ಲಿ ಕೇಂದ್ರ ಸರ್ಕಾರ ಇದೀಗ ಕತ್ತೆ ಸಾಕಾಣಿಕೆಯನ್ನು ಉತ್ತೇಜಿಸಲು ಹೊಸ ಕ್ರಮಗಳನ್ನು ಕೈಗೊಂಡಿದೆ. ರೈತರು, ಸ್ವಸಹಾಯ ಸಂಘಗಳು ಮತ್ತು ಉತ್ಪಾದಕರ ಸಂಘಗಳು ಕತ್ತೆ ಸಾಕಾಣಿಕೆ ಆರಂಭಿಸಿದರೆ ಸರ್ಕಾರದಿಂದ ದೊಡ್ಡ ಪ್ರಮಾಣದ ಆರ್ಥಿಕ ಸಹಾಯ ದೊರೆಯಲಿದೆ.

ಕೇಂದ್ರ ಸರ್ಕಾರದ ನ್ಯಾಷನಲ್ ಲೈವ್‌ಸ್ಟಾಕ್ ಮಿಷನ್ (National Livestock Mission) ಯೋಜನೆಯಡಿ ಈ ನೆರವು ನೀಡಲಾಗುತ್ತದೆ. ಈ ಯೋಜನೆಯ ಮೂಲಕ ಕತ್ತೆ, ಕುದುರೆ ಮತ್ತು ಒಂಟೆಗಳ ಸಾಕಾಣಿಕೆಗೆ ಪ್ರೋತ್ಸಾಹ ನೀಡಲಾಗುತ್ತಿದೆ. ಯೋಜನೆ ಆರಂಭಿಸುವವರಿಗೆ ಒಟ್ಟು ವೆಚ್ಚದ 50 ಶೇಕಡಾವರೆಗೆ ಸಬ್ಸಿಡಿ ನೀಡಲಾಗುತ್ತದೆ. ಗರಿಷ್ಠವಾಗಿ ₹50 ಲಕ್ಷವರೆಗೆ ಸಹಾಯಧನ ದೊರೆಯುತ್ತದೆ.

ಉದಾಹರಣೆಗೆ, ಒಂದು ಯೋಜನೆಯ ಒಟ್ಟು ವೆಚ್ಚ ₹1 ಕೋಟಿ ಆಗಿದ್ದರೆ, ಅದರಲ್ಲಿ ಅರ್ಧವಾದ ₹50 ಲಕ್ಷವನ್ನು ಕೇಂದ್ರ ಸರ್ಕಾರವೇ ನೀಡುತ್ತದೆ. ಈ ಯೋಜನೆಯಡಿ ರೈತ ಉತ್ಪಾದಕರ ಸಂಘಗಳು (FPO), ಸ್ವಸಹಾಯ ಸಂಘಗಳು ಹಾಗೂ ಸೆಕ್ಷನ್-8 ಕಂಪನಿಗಳು ಸಹ ಅರ್ಜಿ ಸಲ್ಲಿಸಬಹುದು.

2019ರ ಪಶುಗಣತಿ ವರದಿ ಪ್ರಕಾರ ಭಾರತದಲ್ಲಿ ಕತ್ತೆಗಳ ಸಂಖ್ಯೆ ಕೇವಲ 1.23 ಲಕ್ಷದಷ್ಟೇ ಉಳಿದಿದೆ. ಕಳೆದ ಕೆಲವು ವರ್ಷಗಳಲ್ಲಿ ಇದು ಸುಮಾರು 60 ಶೇಕಡಾ ಮಟ್ಟಕ್ಕೆ ಇಳಿದಿರುವುದು ಸರ್ಕಾರದ ಗಮನ ಸೆಳೆದಿದೆ.

ಜಮ್ಮು-ಕಾಶ್ಮೀರ, ಹಿಮಾಚಲ ಪ್ರದೇಶ, ರಾಜಸ್ಥಾನ, ಉತ್ತರ ಪ್ರದೇಶ, ಮಧ್ಯಪ್ರದೇಶ, ಮಹಾರಾಷ್ಟ್ರ, ಗುಜರಾತ್, ಕರ್ನಾಟಕ ಮತ್ತು ಆಂಧ್ರಪ್ರದೇಶ ಸೇರಿದಂತೆ ಕೆಲವು ರಾಜ್ಯಗಳಲ್ಲಿ ಇನ್ನೂ ಕತ್ತೆಗಳ ಸಾಕಾಣಿಕೆ ಕಂಡುಬರುತ್ತಿದೆ.

ಕೆಲವೆಡೆ ಕತ್ತೆಗಳ ಸಂಖ್ಯೆ ಅತಿ ಕಡಿಮೆಯಾಗಿರುವುದರಿಂದ ಅವುಗಳ ಸಂರಕ್ಷಣೆ ಮತ್ತು ಅಭಿವೃದ್ಧಿಗೆ ವಿಶೇಷ ಯೋಜನೆಗಳನ್ನು ಸರ್ಕಾರ ರೂಪಿಸುತ್ತಿದೆ. ಕತ್ತೆ ಹಾಲಿನಿಂದ ಸೌಂದರ್ಯ ಉತ್ಪನ್ನಗಳು ಸೇರಿದಂತೆ ಹಲವು ಉತ್ಪನ್ನಗಳನ್ನು ತಯಾರಿಸುವ ಅವಕಾಶವೂ ಹೆಚ್ಚುತ್ತಿದೆ.

ಇದರ ಜೊತೆಗೆ ಕತ್ತೆ ಹಾಲನ್ನು ಆಹಾರ ಉತ್ಪನ್ನವಾಗಿ ಗುರುತಿಸುವಂತೆ FSSAIಗೆ ಕೇಂದ್ರ ಸರ್ಕಾರ ಮನವಿ ಮಾಡಿದೆ. ಕತ್ತೆ, ಕುದುರೆ ಮತ್ತು ಒಂಟೆಗಳ ಸಂರಕ್ಷಣೆಗಾಗಿ ರಾಜ್ಯ ಸರ್ಕಾರಗಳು ಯೋಜನೆಗಳನ್ನು ಕೈಗೊಂಡರೆ ₹10 ಕೋಟಿವರೆಗೆ ಸಹಾಯಧನ ನೀಡುವ ವ್ಯವಸ್ಥೆಯೂ ಇದೆ.

2015ರಲ್ಲಿ ಆರಂಭವಾದ ನ್ಯಾಷನಲ್ ಲೈವ್‌ಸ್ಟಾಕ್ ಮಿಷನ್ ಯೋಜನೆಯಡಿ ಪಶು ಜಾತಿ ಸಂರಕ್ಷಣೆ, ಸಾಕಾಣಿಕೆ ಕೇಂದ್ರಗಳು ಮತ್ತು ಹೊಸ ಉದ್ಯೋಗ ಅವಕಾಶಗಳನ್ನು ಸೃಷ್ಟಿಸುವತ್ತ ಸರ್ಕಾರ ಗಮನ ಹರಿಸಿದೆ. ಇದರಿಂದ ರೈತರು ಹಾಗೂ ಯುವಕರಿಗೆ ಹೊಸ ಆದಾಯ ಮಾರ್ಗಗಳು ದೊರೆಯುವ ನಿರೀಕ್ಷೆ ಇದೆ.