ಹೆಣ್ಣುಮಕ್ಕಳಿರುವ ತಂದೆ-ತಾಯಿಗೆ ಸಿಹಿ ಸುದ್ದಿ! ಕೇಂದ್ರದ ಸೂಪರ್ ಯೋಜನೆ
ಕೇಂದ್ರ ಸರ್ಕಾರದ ಸುಕನ್ಯಾ ಸಮೃದ್ಧಿ ಯೋಜನೆಯ ಮೂಲಕ ಮಗಳ ಭವಿಷ್ಯಕ್ಕೆ ಭದ್ರತೆ ನೀಡುವ ಜೊತೆಗೆ ದೀರ್ಘಾವಧಿಯಲ್ಲಿ ₹72 ಲಕ್ಷದವರೆಗೆ ಮೆಚ್ಯೂರಿಟಿ ಮೊತ್ತ ಪಡೆಯುವ ಅವಕಾಶ ಪೋಷಕರಿಗೆ ಲಭ್ಯವಾಗಿದ್ದು ಹೂಡಿಕೆಗೆ ಜನರು ಆಸಕ್ತಿ ತೋರಿಸುತ್ತಿದ್ದಾರೆ
- ಸುಕನ್ಯಾ ಸಮೃದ್ಧಿ ಯೋಜನೆ, ಮಗಳ ಭವಿಷ್ಯಕ್ಕೆ ಭದ್ರತೆ
- ಮಗಳ ಭವಿಷ್ಯ ಭದ್ರತೆಗಾಗಿ ಉಳಿತಾಯ ಯೋಜನೆ
- 8.20% ಬಡ್ಡಿದರದೊಂದಿಗೆ ತೆರಿಗೆ ರಿಯಾಯಿತಿ ಸೌಲಭ್ಯ
ಮಗಳ ಭವಿಷ್ಯವನ್ನು ಭದ್ರಪಡಿಸಬೇಕೆಂಬುದು ಪ್ರತಿಯೊಬ್ಬ ತಂದೆ-ತಾಯಿಯ ಕನಸು. ಉತ್ತಮ ಶಿಕ್ಷಣ, ಗೌರವಯುತ ಜೀವನ ಹಾಗೂ ಭವಿಷ್ಯದ ಅಗತ್ಯಗಳಿಗೆ ಹಣಕಾಸಿನ ಬೆಂಬಲ ಅಗತ್ಯವಾಗಿರುವ ಈ ದಿನಗಳಲ್ಲಿ, ಕೇಂದ್ರ ಸರ್ಕಾರ ಪರಿಚಯಿಸಿದ Sukanya Samriddhi Yojana ಪೋಷಕರಿಗೆ ದೊಡ್ಡ ಆಸರೆಯಾಗಿ ಪರಿಣಮಿಸಿದೆ.
2015ರಲ್ಲಿ Beti Bachao Beti Padhao ಅಭಿಯಾನದ ಭಾಗವಾಗಿ ಆರಂಭವಾದ ಈ ಯೋಜನೆ, ಇಂದು ದೀರ್ಘಾವಧಿ ಹೂಡಿಕೆಯಲ್ಲಿ ಅತ್ಯಂತ ಆಕರ್ಷಕ ಆಯ್ಕೆಯಾಗಿ ಬೆಳೆಯುತ್ತಿದೆ.
ನಿಯಮಿತವಾಗಿ ಹೂಡಿಕೆ ಮಾಡಿದರೆ ಚಕ್ರಬಡ್ಡಿಯ ಶಕ್ತಿಯಿಂದ ಮೆಚ್ಯೂರಿಟಿ ವೇಳೆಗೆ ಲಕ್ಷಾಂತರ ರೂಪಾಯಿ ಸಿಗುತ್ತದೆ ಎಂಬುದೇ ಈ ಯೋಜನೆಯ ದೊಡ್ಡ ಪ್ಲಸ್.
ಹೂಡಿಕೆ ಮಾಡಿದರೆ ಹೇಗೆ ₹72 ಲಕ್ಷ?
ಈ ಯೋಜನೆಯಲ್ಲಿ ಪ್ರತಿ ವರ್ಷ ಗರಿಷ್ಠ ₹1.5 ಲಕ್ಷವನ್ನು 15 ವರ್ಷಗಳ ಕಾಲ ಜಮೆ ಮಾಡಬಹುದು. ಒಟ್ಟು ಹೂಡಿಕೆ ಮೊತ್ತ ₹22.5 ಲಕ್ಷವಾಗುತ್ತದೆ. ಪ್ರಸ್ತುತ 8.20% ಬಡ್ಡಿದರ ಅನ್ವಯಿಸಿದರೆ, 21ನೇ ವರ್ಷಕ್ಕೆ ಮೆಚ್ಯೂರಿಟಿ ಮೊತ್ತ ಸುಮಾರು ₹71.8 ಲಕ್ಷಕ್ಕೆ ಏರುತ್ತದೆ. ಬಡ್ಡಿಯಿಂದಲೇ ₹49 ಲಕ್ಷಕ್ಕಿಂತ ಹೆಚ್ಚು ಲಾಭ ಸಿಗುತ್ತದೆ.
ಮೆಚ್ಯೂರಿಟಿ ಮೊತ್ತವನ್ನು ಸಂಪೂರ್ಣವಾಗಿ ಪಡೆಯಲು ಪ್ರತಿ ವರ್ಷ ಏಪ್ರಿಲ್ 1ರಿಂದ 5ರೊಳಗೆ ಡಿಪಾಜಿಟ್ ಮಾಡುವುದೇ ಉತ್ತಮ ಎಂದು ಹಣಕಾಸು ತಜ್ಞರು ಸಲಹೆ ನೀಡುತ್ತಾರೆ.
ಈ ಯೋಜನೆ ಏಕೆ ವಿಶೇಷ?
ಸರ್ಕಾರದ ಗ್ಯಾರಂಟಿ ಇರುವುದರಿಂದ ಯಾವುದೇ ರಿಸ್ಕ್ ಇಲ್ಲ. ಸಣ್ಣ ಉಳಿತಾಯ ಯೋಜನೆಗಳಲ್ಲಿ ಇಷ್ಟು ಹೆಚ್ಚಿನ ಬಡ್ಡಿದರ ಸಿಗುವುದು ಅಪರೂಪ. ಆದಾಯ ತೆರಿಗೆ ಕಾಯ್ದೆಯ ಸೆಕ್ಷನ್ 80C ಅಡಿಯಲ್ಲಿ ವರ್ಷಕ್ಕೆ ₹1.5 ಲಕ್ಷವರೆಗೆ ತೆರಿಗೆ ವಿನಾಯಿತಿ ದೊರೆಯುತ್ತದೆ. ತಿಂಗಳಿಗೆ ಕೇವಲ ₹250ರಿಂದಲೇ ಖಾತೆ ಆರಂಭಿಸಬಹುದಾಗಿದೆ.
ಗಮನಿಸಬೇಕಾದ ಮುಖ್ಯ ನಿಯಮಗಳು
ಹುಟ್ಟಿದ ದಿನದಿಂದ 10 ವರ್ಷದೊಳಗಿನ ಮಗಳ ಹೆಸರಲ್ಲಿ ಖಾತೆ ತೆರೆಯಬಹುದು. ಗರಿಷ್ಠ ಇಬ್ಬರು ಹೆಣ್ಣು ಮಕ್ಕಳಿಗೆ ಈ ಸೌಲಭ್ಯ ಲಭ್ಯ. ಖಾತೆ ತೆರೆದ 21 ವರ್ಷಗಳ ನಂತರ ಸಂಪೂರ್ಣ ಹಣ ವಿತ್‌ಡ್ರಾ ಮಾಡಬಹುದು. ಆದರೆ 18 ವರ್ಷವಾದ ಬಳಿಕ ಉನ್ನತ ಶಿಕ್ಷಣಕ್ಕಾಗಿ 50% ಹಣ ತೆಗೆದುಕೊಳ್ಳಲು ಅವಕಾಶ ಇದೆ.
