5 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳ ಸಾವಿನ ಪ್ರಮಾಣ ಹೆಚ್ಚಳ! ಭಾರತ ಮುಂಚೂಣಿ
2023ರಲ್ಲಿ ಐದು ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳ ಸಾವುಗಳಲ್ಲಿ ಭಾರತ ಮತ್ತು ನೈಜೀರಿಯಾ ಮುಂಚೂಣಿಯಲ್ಲಿವೆ ಎಂದು ಅಂತಾರಾಷ್ಟ್ರೀಯ ಅಧ್ಯಯನ ತಿಳಿಸಿದೆ. ಜಾಗತಿಕ ಸಾವುಗಳಲ್ಲಿ ಮೂರನೇ ಭಾಗ ಈ ಎರಡು ದೇಶಗಳದ್ದೇ ಎಂದು ವರದಿ ಹೇಳಿದೆ.
ಐದು ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳ ಸಾವಿನ ಪ್ರಮಾಣ ಜಾಗತಿಕ ಮಟ್ಟದಲ್ಲಿ ಕಡಿಮೆಯಾಗುತ್ತಿರುವುದಾದರೂ, ಕೆಲವು ದೇಶಗಳಲ್ಲಿ ಇನ್ನೂ ಪರಿಸ್ಥಿತಿ ಗಂಭೀರವಾಗಿಯೇ ಇದೆ. 2023ರ ವರದಿಯ ಪ್ರಕಾರ ಭಾರತ ಮತ್ತು ನೈಜೀರಿಯಾ ದೇಶಗಳಲ್ಲಿ ಮಕ್ಕಳ ಸಾವುಗಳ ಸಂಖ್ಯೆ ಅತ್ಯಧಿಕವಾಗಿದೆ.
ಅಂತರಾಷ್ಟ್ರೀಯ ವಿಜ್ಞಾನ ಪತ್ರಿಕೆ PLOS Journal ಪ್ರಕಟಿಸಿದ ಅಧ್ಯಯನದಲ್ಲಿ ಈ ವಿಷಯ ಬಹಿರಂಗವಾಗಿದೆ. ವರದಿಯ ಪ್ರಕಾರ ಜಗತ್ತಿನಲ್ಲಿ ಸಂಭವಿಸುವ ಒಟ್ಟು ಮಕ್ಕಳ ಸಾವುಗಳಲ್ಲಿ ಸುಮಾರು ಮೂರನೇ ಭಾಗ ಭಾರತ ಮತ್ತು ನೈಜೀರಿಯಾ ದೇಶಗಳಲ್ಲೇ ಸಂಭವಿಸುತ್ತಿವೆ.
ಭಾರತದಲ್ಲಿ ಎಷ್ಟು ಮಕ್ಕಳು ಸಾವನ್ನಪ್ಪಿದ್ದಾರೆ?
ಅಧ್ಯಯನದ ಪ್ರಕಾರ 2023ರಲ್ಲಿ ಭಾರತದಲ್ಲಿ ಸುಮಾರು 6.4 ಲಕ್ಷ ಐದು ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳು ಸಾವನ್ನಪ್ಪಿದ್ದಾರೆ. ಅದೇ ವೇಳೆ ನೈಜೀರಿಯಾದಲ್ಲಿ ಈ ಸಂಖ್ಯೆ ಇನ್ನೂ ಹೆಚ್ಚು ಇದ್ದು ಸುಮಾರು 7.7 ಲಕ್ಷ ಮಕ್ಕಳು ಮರಣ ಹೊಂದಿದ್ದಾರೆ ಎಂದು ವರದಿ ಹೇಳಿದೆ.
ಇದು ಆರೋಗ್ಯ ವ್ಯವಸ್ಥೆ, ಪೌಷ್ಟಿಕಾಂಶ ಕೊರತೆ, ಸೋಂಕು ರೋಗಗಳು ಹಾಗೂ ಸಾಮಾಜಿಕ ಅಂಶಗಳ ಜೊತೆ ಸಂಬಂಧ ಹೊಂದಿರುವ ಸಮಸ್ಯೆ ಎಂದು ತಜ್ಞರು ಹೇಳುತ್ತಾರೆ.
ಕಳೆದ ಮೂರು ದಶಕಗಳಲ್ಲಿ ಸುಧಾರಣೆ
ಪೆಕಿಂಗ್ ವಿಶ್ವವಿದ್ಯಾಲಯದ ಅಧ್ಯಯನದ ಪ್ರಕಾರ ಕಳೆದ ಮೂರು ದಶಕಗಳಲ್ಲಿ ಮಕ್ಕಳ ಸಾವಿನ ಪ್ರಮಾಣದಲ್ಲಿ ಗಮನಾರ್ಹ ಇಳಿಕೆ ಕಂಡುಬಂದಿದೆ.
1990ರಲ್ಲಿ ಜಗತ್ತಿನಾದ್ಯಂತ ಸುಮಾರು 1.29 ಕೋಟಿ ಮಕ್ಕಳು ಐದು ವರ್ಷಕ್ಕಿಂತ ಮುಂಚೆಯೇ ಸಾವನ್ನಪ್ಪುತ್ತಿದ್ದರು. ಆದರೆ 2023ಕ್ಕೆ ಈ ಸಂಖ್ಯೆ ಸುಮಾರು 47 ಲಕ್ಷಕ್ಕೆ ಇಳಿಕೆಯಾಗಿದೆ.
ಇದು ಸುಮಾರು 63 ಶೇಕಡಾ ಇಳಿಕೆ ಎಂದು ಅಧ್ಯಯನ ಹೇಳುತ್ತದೆ. ಮಕ್ಕಳ ಸಾವಿನ ಪ್ರಮಾಣವು ವರ್ಷಕ್ಕೆ ಸರಾಸರಿ 3.18 ಶೇಕಡಾ ಕಡಿಮೆಯಾಗುತ್ತಿರುವುದೂ ಗಮನಾರ್ಹ ಬೆಳವಣಿಗೆ ಎಂದು ವರದಿ ತಿಳಿಸಿದೆ.
ಇನ್ನೂ ಸವಾಲು ಉಳಿದಿದೆ
1990ರಲ್ಲಿ ಪ್ರತಿ 1000 ಜನನಗಳಿಗೆ 93.58 ಮಕ್ಕಳು ಸಾವನ್ನಪ್ಪುತ್ತಿದ್ದರೆ, 2023ರಲ್ಲಿ ಅದು 36.72ಕ್ಕೆ ಇಳಿಕೆಯಾಗಿದೆ. ಆದರೆ ಈ ಸುಧಾರಣೆ ಇದ್ದರೂ ಹಲವು ದೇಶಗಳಲ್ಲಿ ಇನ್ನೂ ಸಮಸ್ಯೆ ಮುಂದುವರಿದಿದೆ.
ಸಂಶೋಧಕರ ಅಂದಾಜು ಪ್ರಕಾರ ಸುಮಾರು 58 ದೇಶಗಳು 2030ರೊಳಗೆ ವಿಶ್ವಸಂಸ್ಥೆಯ ಸಸ್ಥಿರ ಅಭಿವೃದ್ಧಿ ಗುರಿಯನ್ನು ತಲುಪಲು ಸಾಧ್ಯವಾಗದಿರಬಹುದು. ಆ ಗುರಿಯ ಪ್ರಕಾರ ಪ್ರತಿ 1000 ಜನನಗಳಿಗೆ 25ಕ್ಕಿಂತ ಕಡಿಮೆ ಮಕ್ಕಳ ಸಾವು ಇರಬೇಕು.
