ಸತ್ತವನು ಅಂತ್ಯಕ್ರಿಯೆ ನಡೆಸಿದ 15 ದಿನಗಳ ಬಳಿಕ ಪ್ರತ್ಯಕ್ಷ! ಅಷ್ಟಕ್ಕೂ ಆಗಿದ್ದೇನು ಗೊತ್ತ
ಮೃತದೇಹವನ್ನು ತಮ್ಮ ಮಗ ರವಿ ಕುಮಾರ್ ಎಂದು ತಪ್ಪಾಗಿ ಗುರುತಿಸಿ ಕುಟುಂಬ ಅಂತ್ಯಕ್ರಿಯೆ ನಡೆಸಿತ್ತು; 15 ದಿನಗಳ ಬಳಿಕ ಜೈಲಿನಿಂದ ಬಂದ ಫೋನ್ ಕಾಲ್ ಕುಟುಂಬಕ್ಕೆ ಅಚ್ಚರಿ ಮೂಡಿಸಿದೆ.
‘ನಿಮ್ಮ ಮಗ ಮೃತಪಟ್ಟಿದ್ದಾನೆ’ ಎಂದು ಭಾವಿಸಿ ಅಂತ್ಯಕ್ರಿಯೆ ನಡೆಸಿದ ಕುಟುಂಬಕ್ಕೆ 15 ದಿನಗಳ ಬಳಿಕ ಬಂದ ಒಂದು ಫೋನ್ ಕರೆ ಎಲ್ಲವನ್ನೂ ಬದಲಿಸಿದೆ. ಸತ್ತನೆಂದುಕೊಂಡಿದ್ದ ರವಿ ಕುಮಾರ್ (Ravi Kumar) ಬದುಕೇ ಇದ್ದಾನೆ, ಜೈಲಿನಲ್ಲಿದ್ದಾನೆ ಎಂಬ ವಿಚಾರ ತಿಳಿದು ಕುಟುಂಬಸ್ಥರು ಅಚ್ಚರಿಗೊಂಡಿದ್ದಾರೆ. ಪಂಜಾಬ್ನ ಕಪೂರ್ತಲಾದಲ್ಲಿ (Punjab) ನಡೆದಿರುವ ಈ ಘಟನೆ ಇದೀಗ ಸ್ಥಳೀಯವಾಗಿ ಚರ್ಚೆಗೆ ಗ್ರಾಸವಾಗಿದೆ.
ಕಪೂರ್ತಲಾ ನಿವಾಸಿ ರವಿ ಕುಮಾರ್ ಆಗಸ್ಟ್ 5ರಂದು ಮನೆಯಿಂದ ಹೊರಗೆ ಹೋಗಿದ್ದರು. ಬಳಿಕ ಮನೆಗೆ ವಾಪಸ್ ಬಾರದ ಹಿನ್ನೆಲೆಯಲ್ಲಿ ತಂದೆ ಹಾಗೂ ಸಹೋದರ ಸೇರಿದಂತೆ ಕುಟುಂಬಸ್ಥರು ಹಲವು ಕಡೆಗಳಲ್ಲಿ ಹುಡುಕಾಟ ನಡೆಸಿದ್ದರು. ಯಾವುದೇ ಸುಳಿವು ಸಿಗದಿದ್ದರಿಂದ ಆಗಸ್ಟ್ 11ರಂದು ಕಪೂರ್ತಲಾ ಸಿಟಿ ಪೊಲೀಸ್ ಠಾಣೆಯಲ್ಲಿ (Police) ನಾಪತ್ತೆ ಪ್ರಕರಣ ದಾಖಲಿಸಲಾಗಿತ್ತು.
ಇದರ ಮಧ್ಯೆ, ಅಪರಿಚಿತ ಯುವಕನೊಬ್ಬನ ಸುಟ್ಟುಹೋದ ಮೃತದೇಹ ಪತ್ತೆಯಾಗಿದೆ ಎಂದು ಪೊಲೀಸರು ಕುಟುಂಬಕ್ಕೆ ಮಾಹಿತಿ ನೀಡಿದ್ದರು. ಮೃತದೇಹದ ಫೋಟೋಗಳನ್ನು ತೋರಿಸಿದಾಗ ಕುಟುಂಬಸ್ಥರು ಹಾಗೂ ಇತರ ಕೆಲವರು ಅದನ್ನು ರವಿ ಕುಮಾರ್ ಅವರದ್ದೇ ಎಂದು ಗುರುತಿಸಿದ್ದರು ಎನ್ನಲಾಗಿದೆ.
ಮಗ ಮೃತಪಟ್ಟಿದ್ದಾನೆ ಎಂಬ ನಂಬಿಕೆಯಿಂದ ಕುಟುಂಬಸ್ಥರು ಆಗಸ್ಟ್ 13ರಂದು ಅಂತ್ಯಕ್ರಿಯೆ ನೆರವೇರಿಸಿದ್ದರು. ಬಳಿಕದ ಧಾರ್ಮಿಕ ವಿಧಿವಿಧಾನಗಳನ್ನೂ ಪೂರ್ಣಗೊಳಿಸಿದ್ದರು. ಹೀಗೆ ಅಂತ್ಯಕ್ರಿಯೆ ಮುಗಿದು ಸುಮಾರು 15 ದಿನಗಳು ಕಳೆದಿದ್ದವು.
ಆದರೆ ಸೆಪ್ಟೆಂಬರ್ 2ರಂದು ಕುಟುಂಬಕ್ಕೆ ಕಪೂರ್ತಲಾ ಸೆಂಟ್ರಲ್ ಜೈಲು (Central Jail) ಸಿಬ್ಬಂದಿಯಿಂದ ಕರೆ ಬಂದಿದ್ದು, ‘ರವಿ ಕುಮಾರ್ ಎಂಬ ವ್ಯಕ್ತಿ ನಮ್ಮ ಜೈಲಿನಲ್ಲಿದ್ದಾನೆ’ ಎಂದು ತಿಳಿಸಿದ್ದಾರೆ. ಈ ಮಾತು ಕೇಳುತ್ತಿದ್ದಂತೆ ಕುಟುಂಬಸ್ಥರಿಗೆ ನಂಬಲಾಗದಷ್ಟು ದೊಡ್ಡ ಶಾಕ್ ಎದುರಾಗಿದೆ.
ವಿಷಯದ ಸತ್ಯಾಸತ್ಯತೆ ತಿಳಿಯಲು ಮರುದಿನವೇ ಕುಟುಂಬಸ್ಥರು ಜೈಲಿಗೆ ತೆರಳಿದ್ದಾರೆ. ಅಲ್ಲಿ ರವಿ ಕುಮಾರ್ ಅವರನ್ನು ಸ್ವತಃ ನೋಡಿದ ಬಳಿಕವೇ ಆತ ಬದುಕಿರುವುದು ಖಚಿತವಾಗಿದೆ. ಸತ್ತನೆಂದು ಭಾವಿಸಿ ಕಣ್ಣೀರಿಟ್ಟಿದ್ದ ಕುಟುಂಬಕ್ಕೆ ತಮ್ಮ ಮಗ ಕಣ್ಣೆದುರೇ ಜೀವಂತವಾಗಿರುವುದು ಸಂತಸದ ಕ್ಷಣವಾಗಿತ್ತು.
ಪ್ರಾಥಮಿಕ ಮಾಹಿತಿಯ ಪ್ರಕಾರ, ಜಲಂಧರ್ ಪೊಲೀಸರು (Jalandhar Police) ರವಿ ಕುಮಾರ್ ಅವರನ್ನು ಸುಮಾರು ಒಂದು ತಿಂಗಳ ಹಿಂದೆ ಲೋಯಿಟರಿಂಗ್ಗೆ ಸಂಬಂಧಿಸಿದ ಪ್ರಕರಣದಲ್ಲಿ ಬಂಧಿಸಿದ್ದರು ಎನ್ನಲಾಗಿದೆ. ನಂತರ ಅವರನ್ನು ಕಪೂರ್ತಲಾ ಸೆಂಟ್ರಲ್ ಜೈಲಿಗೆ ಕಳುಹಿಸಲಾಗಿತ್ತು.
ಇದೀಗ ಮತ್ತೊಬ್ಬ ವ್ಯಕ್ತಿಯ ಮೃತದೇಹವನ್ನು ರವಿ ಕುಮಾರ್ ಅವರದ್ದೆಂದು ಗುರುತಿಸಿ ಅಂತ್ಯಕ್ರಿಯೆ ನಡೆಸಿರುವುದು ಹಲವು ಪ್ರಶ್ನೆಗಳನ್ನು ಹುಟ್ಟುಹಾಕಿದೆ. ಮೃತದೇಹದ ಗುರುತಿನಲ್ಲಿ ತಪ್ಪು ಹೇಗೆ ಸಂಭವಿಸಿತು? ಮೃತಪಟ್ಟ ವ್ಯಕ್ತಿ ನಿಜವಾಗಿ ಯಾರು? ಎಂಬುದನ್ನು ಪೊಲೀಸರು ಪತ್ತೆಹಚ್ಚಬೇಕಿದೆ.
ಘಟನೆಯ ಸಂಪೂರ್ಣ ಹಿನ್ನೆಲೆಯನ್ನು ತಿಳಿಯಲು ಪೊಲೀಸರು ತನಿಖೆ (Investigation) ನಡೆಸಬೇಕಿದ್ದು, ಮೃತದೇಹದ ಗುರುತಿನ ಗೊಂದಲ ಹೇಗೆ ಉಂಟಾಯಿತು ಎಂಬುದರ ಮೇಲೂ ಗಮನ ಹರಿಸಲಾಗುತ್ತಿದೆ. ಸತ್ತನೆಂದುಕೊಂಡಿದ್ದ ವ್ಯಕ್ತಿ 15 ದಿನಗಳ ಬಳಿಕ ಜೈಲಿನಲ್ಲಿ ಜೀವಂತವಾಗಿ ಪತ್ತೆಯಾಗಿರುವ ಘಟನೆ ಇದೀಗ ಪಂಜಾಬ್ನಲ್ಲಿ ಕುತೂಹಲ ಮೂಡಿಸಿದೆ.
