ತಾಯಿ ಸತ್ತರೂ ಜೀವಂತವೆಂದು ತೋರಿಸಿ 7 ವರ್ಷದಿಂದ ಪಿಂಚಣಿ ಪಡೆಯುತ್ತಿದ್ದ ಮಗ! ಮುಂದೇನಾಯ್ತು ಗೊತ್ತ
ಉತ್ತರ ಪ್ರದೇಶದ ಮೀರಟ್‌ನಲ್ಲಿ ತಾಯಿ ಏಳು ವರ್ಷಗಳ ಹಿಂದೆ ಮೃತಪಟ್ಟಿದ್ದರೂ ಜೀವಂತವೆಂದು ನಕಲಿ ದಾಖಲೆ ಸೃಷ್ಟಿಸಿ ಮಗ ಪಿಂಚಣಿ ಪಡೆಯುತ್ತಿದ್ದ ಘಟನೆ ಬೆಳಕಿಗೆ ಬಂದಿದೆ. ಒಟ್ಟು ₹44 ಲಕ್ಷ ವಂಚನೆ ಪ್ರಕರಣ ದಾಖಲಾಯಿತು.
Pension fraud: ಉತ್ತರ ಪ್ರದೇಶದ ಮೀರಟ್ ಜಿಲ್ಲೆಯಲ್ಲಿ (Uttar Pradesh, Meerut) ಅಚ್ಚರಿ ಮೂಡಿಸುವ ಪಿಂಚಣಿ ವಂಚನೆ ಪ್ರಕರಣ ಬಹಿರಂಗವಾಗಿದೆ. ತಾಯಿ ಏಳು ವರ್ಷಗಳ ಹಿಂದೆ ಮೃತಪಟ್ಟಿದ್ದರೂ ಜೀವಂತವಾಗಿದ್ದಾರೆ ಎಂದು ತೋರಿಸಿ ಮಗ ಹಲವು ವರ್ಷಗಳ ಕಾಲ ಪಿಂಚಣಿ ಹಣ ಪಡೆಯುತ್ತಿದ್ದ ಪ್ರಕರಣ ಇದೀಗ ಬೆಳಕಿಗೆ ಬಂದಿದೆ.
ಸ್ವಾತಂತ್ರ್ಯ ಹೋರಾಟಗಾರರ ಪತ್ನಿಯಾಗಿದ್ದ ಶಾಂತಿ ದೇವಿ 2018ರ ಡಿಸೆಂಬರ್‌ 9ರಂದು ನಿಧನರಾಗಿದ್ದರು. ಆದರೆ ಅವರ ಪುತ್ರ ಪ್ರೇಮ್ ಸಿಂಗ್ ತಾಯಿ ಇನ್ನೂ ಜೀವಂತವಾಗಿದ್ದಾರೆ ಎಂದು ತೋರಿಸಲು ನಕಲಿ ದಾಖಲೆಗಳನ್ನು ಸೃಷ್ಟಿಸಿದ್ದಾನೆ ಎನ್ನಲಾಗಿದೆ.
ನಕಲಿ ಲೈಫ್ ಸರ್ಟಿಫಿಕೆಟ್ ಬಳಕೆ
ಬ್ಯಾಂಕ್‌ಗೆ ನಕಲಿ ಲೈಫ್ ಸರ್ಟಿಫಿಕೆಟ್ ಸಲ್ಲಿಸಿ, ಸ್ವಾತಂತ್ರ್ಯ ಹೋರಾಟಗಾರರ ಕುಟುಂಬಕ್ಕೆ ಸಿಗುವ ಪಿಂಚಣಿ ಹಾಗೂ ಡಿಫೆನ್ಸ್ ಪಿಂಚಣಿಯನ್ನು ಮುಂದುವರಿಯುವಂತೆ ಮಾಡಿದ ಆರೋಪ ಎದುರಾಗಿದೆ. ಈ ಮೂಲಕ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಖಾತೆಯಿಂದ ಎಟಿಎಂ ಹಾಗೂ ಯುಪಿಐ ಮೂಲಕ ಸುಮಾರು ₹44,38,096 ಹಣವನ್ನು ತೆಗೆದುಕೊಂಡಿದ್ದಾನೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಈ ಮೋಸವು 2025ರ ಅಕ್ಟೋಬರ್‌ 8ರಂದು ಸರ್ಡಾನಾ ಉಪವಿಭಾಗಾಧಿಕಾರಿಗೆ ಬಂದ ದೂರು ಬಳಿಕ ಹೊರಬಂದಿತು. ನಂತರ ಬ್ಯಾಂಕ್ ಅಧಿಕಾರಿಗಳು ಖಾತೆ ಪರಿಶೀಲನೆ ನಡೆಸಿದಾಗ ಅನೇಕ ಅಕ್ರಮಗಳು ಪತ್ತೆಯಾದವು.
ಪೊಲೀಸ್ ಪ್ರಕರಣ ದಾಖಲು
ಈ ಹಿನ್ನೆಲೆಯಲ್ಲಿ ಬ್ಯಾಂಕ್ ಮ್ಯಾನೇಜರ್ 2025ರ ನವೆಂಬರ್‌ 27ರಂದು ದೌರಾಲಾ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದರು. ಆರಂಭದಲ್ಲಿ ಕ್ರಮ ಕೈಗೊಳ್ಳದ ಹಿನ್ನೆಲೆಯಲ್ಲಿ ದೂರುದಾರರು ನ್ಯಾಯಾಲಯದ ಮೊರೆ ಹೋಗಿದ್ದರು.
ನ್ಯಾಯಾಲಯದ ಆದೇಶದ ಮೇರೆಗೆ ಪ್ರೇಮ್ ಸಿಂಗ್ ಹಾಗೂ ಅವನಿಗೆ ಸಹಕರಿಸಿದವರ ವಿರುದ್ಧ ವಂಚನೆ, ಕಪಟ ದಾಖಲೆ ಸೃಷ್ಟಿ ಹಾಗೂ ಸಂಚು ಸೇರಿದಂತೆ ಹಲವು ಕಲಂಗಳಡಿ ಎಫ್‌ಐಆರ್ ದಾಖಲಾಗಿದೆ. ಈ ಕುರಿತು ದೌರಾಲಾ ಇನ್ಸ್‌ಪೆಕ್ಟರ್ ಸುಮನ್ ಕುಮಾರ್ ಸಿಂಗ್ ತನಿಖೆ ನಡೆಯುತ್ತಿದ್ದು, ಆರೋಪಿಗಳ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಲಾಗುತ್ತದೆ ಎಂದು ತಿಳಿಸಿದ್ದಾರೆ.
