ನೇಪಾಳ ಪ್ರವಾಹ: 1,643 ವಿದ್ಯಾರ್ಥಿಗಳನ್ನು ಪಾರು ಮಾಡಿದ ರಿಯಲ್ ಹೀರೋ ಶಿಕ್ಷಕ ರಾಜೇಂದ್ರ!
Nepal Floods: ನೇಪಾಳದಲ್ಲಿ ಭೀಕರ ಪ್ರವಾಹದ ನಡುವೆ ಅಪಾಯ ಅರಿತು ಕ್ಷಣಾರ್ಧದಲ್ಲಿ ನಿರ್ಧಾರ ಕೈಗೊಂಡ ಮುಖ್ಯ ಶಿಕ್ಷಕ ರಾಜೇಂದ್ರ ದ್ವಿವೇದಿ 1,643 ವಿದ್ಯಾರ್ಥಿಗಳನ್ನು ಸುರಕ್ಷಿತ ಸ್ಥಳಕ್ಕೆ ಕರೆದೊಯ್ದು ಜೀವ ಉಳಿಸಿದ್ದಾರೆ.
ಕಠ್ಮಂಡು: ನೇಪಾಳದಲ್ಲಿ ಪ್ರವಾಹ (Nepal Floods) ಭೀಕರ ಸ್ವರೂಪ ಪಡೆದುಕೊಂಡ ಸಂದರ್ಭದಲ್ಲಿ ಸಾವಿರಾರು ಮಕ್ಕಳ ಜೀವ ಉಳಿಸಿದ ಮುಖ್ಯ ಶಿಕ್ಷಕರೊಬ್ಬರು (Teacher Saves 1,643 Students) ಇದೀಗ ಎಲ್ಲರ ಮೆಚ್ಚುಗೆಗೆ ಪಾತ್ರರಾಗಿದ್ದಾರೆ. ಅಪಾಯವನ್ನು ಮೊದಲೇ ಗುರುತಿಸಿ ಕ್ಷಣಾರ್ಧದಲ್ಲಿ ನಿರ್ಧಾರ ಕೈಗೊಂಡ ರಾಜೇಂದ್ರ ದ್ವಿವೇದಿ ಅವರನ್ನು ಸ್ಥಳೀಯರು ‘ರಿಯಲ್ ಹೀರೋ’ ಎಂದು ಕೊಂಡಾಡುತ್ತಿದ್ದಾರೆ.
47 ವರ್ಷದ ರಾಜೇಂದ್ರ ದ್ವಿವೇದಿ ಅವರು ತ್ರಿಶೂಲ್‌ನ ತ್ರಿಭುವನ್ ತ್ರಿಶೂಲಿ ಮಾಧ್ಯಮಿಕ ಶಾಲೆಯ ಪ್ರಾಂಶುಪಾಲರಾಗಿದ್ದಾರೆ. ಶಾಲೆಯು ನದಿಯಿಂದ ಕೇವಲ 60 ಮೀಟರ್‌ಗಳಷ್ಟು ದೂರದಲ್ಲಿದ್ದ ಹಿನ್ನೆಲೆಯಲ್ಲಿ ಪ್ರವಾಹದ ಅಪಾಯದ ಬಗ್ಗೆ ಅವರಿಗೆ ಮುನ್ನೆಚ್ಚರಿಕೆ ಸಿಕ್ಕಿತ್ತು.
ಬುಧವಾರ ಬೆಳಗ್ಗೆ 9.20ರ ಸುಮಾರಿಗೆ ಸ್ನೇಹಿತರೊಬ್ಬರಿಂದ ಪ್ರವಾಹದ ಎಚ್ಚರಿಕೆ ಸಂದೇಶ ಬಂದ ಕೂಡಲೇ ರಾಜೇಂದ್ರ ಎಚ್ಚೆತ್ತುಕೊಂಡರು. ಶಾಲೆಯಲ್ಲಿದ್ದ 1,643 ವಿದ್ಯಾರ್ಥಿಗಳ ಸುರಕ್ಷತೆಯೇ ಮೊದಲ ಆದ್ಯತೆ ಎಂದು ನಿರ್ಧರಿಸಿ, ಶಿಕ್ಷಕರಿಗೆ ಮಕ್ಕಳನ್ನು ತರಗತಿಗಳಿಂದ ತಕ್ಷಣ ಹೊರಗೆ ಕರೆತರುವಂತೆ ಸೂಚಿಸಿದರು.
ಮೊದಲಿಗೆ ವಿದ್ಯಾರ್ಥಿಗಳನ್ನು ಶಾಲೆಯ ಮೂರು ಅಂತಸ್ತಿನ ಕಟ್ಟಡದ ಮೇಲ್ಭಾಗಕ್ಕೆ ಕರೆದೊಯ್ಯುವ ಯೋಚನೆ ಮಾಡಲಾಗಿತ್ತು. ಆದರೆ ಪರಿಸ್ಥಿತಿ ವೇಗವಾಗಿ ಬದಲಾಗುತ್ತಿರುವುದನ್ನು ಗಮನಿಸಿದ ರಾಜೇಂದ್ರ, ಕಟ್ಟಡದಲ್ಲೇ ಉಳಿಯುವುದು ಸುರಕ್ಷಿತವಲ್ಲ ಎಂದು ತೀರ್ಮಾನಿಸಿದರು.
ಬಳಿಕ ಶಾಲಾ ಬಸ್‌ಗಳ (School Bus) ಚಾಲಕರನ್ನು ತುರ್ತಾಗಿ ಕರೆಸಿಕೊಂಡು ಮಕ್ಕಳನ್ನು ವಾಹನಗಳಲ್ಲಿ ಸ್ಥಳಾಂತರಿಸಲು ಪ್ರಯತ್ನಿಸಲಾಯಿತು. ಆದರೆ ಪ್ರವಾಹದ ನೀರು ವೇಗವಾಗಿ ಸಮೀಪಿಸುತ್ತಿದ್ದ ಕಾರಣ ಆ ಯೋಜನೆಯನ್ನೂ ಕೈಬಿಡಲಾಯಿತು.
ಕೊನೆಗೆ ವಿದ್ಯಾರ್ಥಿಗಳನ್ನು ಶಾಲೆಯ ಸಮೀಪದ ಎತ್ತರದ ಪ್ರದೇಶಕ್ಕೆ ಕರೆದೊಯ್ದು, ಅಲ್ಲಿದ್ದ ಬೋಧಿ ಮರದ ಕೆಳಗೆ ಸುರಕ್ಷಿತವಾಗಿ ಇರಿಸಲಾಯಿತು. ಮಕ್ಕಳು ಇನ್ನೂ ಪರಿಸ್ಥಿತಿಯನ್ನು ಅರ್ಥಮಾಡಿಕೊಳ್ಳುವಷ್ಟರಲ್ಲಿ ಪ್ರವಾಹದ ರಭಸ ಹೆಚ್ಚಾಯಿತು.
ಅಷ್ಟರಲ್ಲಿ ಭೋರ್ಗರೆಯುತ್ತ ಬಂದ ಪ್ರವಾಹದ ನೀರು ಮೂರು ಅಂತಸ್ತಿನ ಶಾಲಾ ಕಟ್ಟಡವನ್ನೇ ಕೊಚ್ಚಿಕೊಂಡು ಹೋಗಿದೆ. ತಮ್ಮ ಕಣ್ಣೆದುರೇ ಶಾಲಾ ಕಟ್ಟಡ ಕುಸಿದು ನೀರಿನಲ್ಲಿ ಕೊಚ್ಚಿಹೋಗುವುದನ್ನು ಕಂಡ ವಿದ್ಯಾರ್ಥಿಗಳು ಭಯಭೀತರಾದರು. ಆದರೆ ತಾವು ಕಟ್ಟಡದೊಳಗೆ ಉಳಿದಿದ್ದರೆ ಏನಾಗುತ್ತಿತ್ತು ಎಂಬುದನ್ನು ನೆನೆದು ಮತ್ತಷ್ಟು ಆತಂಕಗೊಂಡರು.
ಸಮಯಪ್ರಜ್ಞೆ (Presence of Mind) ಮತ್ತು ಮುನ್ನೆಚ್ಚರಿಕೆಯ ನಿರ್ಧಾರದಿಂದ ಇಷ್ಟೊಂದು ದೊಡ್ಡ ದುರಂತವನ್ನು ತಪ್ಪಿಸಿದ ರಾಜೇಂದ್ರ ಅವರ ಕಾರ್ಯಕ್ಕೆ ವಿದ್ಯಾರ್ಥಿಗಳ ಪೋಷಕರು, ಸ್ಥಳೀಯರು ಹಾಗೂ ಅಧಿಕಾರಿಗಳು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಅಪಾಯದ ಸಮಯದಲ್ಲಿ ಒಬ್ಬ ಶಿಕ್ಷಕ ತೆಗೆದುಕೊಂಡ ಸರಿಯಾದ ನಿರ್ಧಾರ ನೂರಾರು ಕುಟುಂಬಗಳಿಗೆ ನೆಮ್ಮದಿ ತಂದಿದೆ.
