Aadhaar Card App: ಆಧಾರ್ ಆಪ್‌ನ ಪೂರ್ಣ ಆವೃತ್ತಿ ಬಿಡುಗಡೆ! ಬಳಕೆದಾರರಿಗೆ ಲಭ್ಯವಾಗಿದೆ ಹೊಸ ಸೌಲಭ್ಯ
Aadhaar Card App: ಆಧಾರ್ ಕಾರ್ಡ್ ಬಳಕೆದಾರರಿಗೆ ಯುಐಡಿಎಐ ಹೊಸ ಆಪ್ ಬಿಡುಗಡೆ ಮಾಡಿದೆ. ಕ್ಯೂಆರ್ ಕೋಡ್ ಹಾಗೂ ಫೇಸ್ ರಿಕಗ್ನಿಷನ್ ತಂತ್ರಜ್ಞಾನದಿಂದ ಸುರಕ್ಷಿತ ಗುರುತಿನ ಪರಿಶೀಲನೆ ನಡೆಸುವ ಅವಕಾಶ ಈಗ ಲಭ್ಯವಾಗಲಿದೆ.
Aadhaar Card App: ಆಧಾರ್ ಕಾರ್ಡ್ ಬಳಸುವ ಕೋಟ್ಯಂತರ ನಾಗರಿಕರಿಗೆ ಯುಐಡಿಎಐ ಮಹತ್ವದ ಸೌಲಭ್ಯವನ್ನು ಪರಿಚಯಿಸಿದೆ. ಹೊಸ ಆಧಾರ್ ಆಪ್‌ನ ಪೂರ್ಣ ಆವೃತ್ತಿ ಬಿಡುಗಡೆಯಾಗಿದ್ದು, ಇದರಲ್ಲಿ ಬಳಕೆದಾರರ ವೈಯಕ್ತಿಕ ಮಾಹಿತಿಗೆ ಹೆಚ್ಚಿನ ಭದ್ರತೆ ನೀಡುವ ಹಲವು ಆಧುನಿಕ ಸೌಲಭ್ಯಗಳನ್ನು ಸೇರಿಸಲಾಗಿದೆ.
ಇದುವರೆಗೆ ಅನೇಕ ಕಡೆಗಳಲ್ಲಿ ಆಧಾರ್ ಜೆರಾಕ್ಸ್ ಪ್ರತಿಯನ್ನು ನೀಡಬೇಕಾಗುತ್ತಿತ್ತು. ಆದರೆ ಇಂತಹ ಪ್ರತಿಗಳು ದುರುಪಯೋಗವಾಗುವ ಸಾಧ್ಯತೆ ಇರುವ ಕಾರಣ, ಹೊಸ ಆಪ್‌ನಲ್ಲಿ ಕ್ಯೂಆರ್ ಕೋಡ್ ಆಧಾರಿತ ಪರಿಶೀಲನೆ ವ್ಯವಸ್ಥೆಯನ್ನು ಪರಿಚಯಿಸಲಾಗಿದೆ. ಬಳಕೆದಾರರು ಬೇಕಾದ ಮಾಹಿತಿಯನ್ನು ಮಾತ್ರ ಹಂಚಿಕೊಳ್ಳುವ ರೀತಿಯಲ್ಲಿ ಕ್ಯೂಆರ್ ಕೋಡ್ ರಚಿಸಿ ಬಳಸಬಹುದು.
ಹೋಟೆಲ್‌ಗಳು, ಪ್ರವಾಸಿ ತಾಣಗಳು, ಸರ್ಕಾರಿ ಕಚೇರಿಗಳು ಅಥವಾ ಗುರುತಿನ ದೃಢೀಕರಣ ಅಗತ್ಯವಿರುವ ಸ್ಥಳಗಳಲ್ಲಿ ಇನ್ನು ಮುಂದೆ ಫೋಟೋಕಾಪಿ ನೀಡುವ ಅಗತ್ಯ ಕಡಿಮೆಯಾಗಲಿದೆ. ಕ್ಯೂಆರ್ ಕೋಡ್ ಸ್ಕ್ಯಾನ್ ಮೂಲಕವೇ ಪರಿಶೀಲನೆ ಪೂರ್ಣಗೊಳ್ಳಲಿದೆ.
ಹೊಸ ಆಪ್‌ನ ಮತ್ತೊಂದು ಪ್ರಮುಖ ವೈಶಿಷ್ಟ್ಯವೆಂದರೆ ಫೇಸ್ ರಿಕಗ್ನಿಷನ್. ಮೊದಲು ಒಟಿಪಿ ಮೂಲಕ ಮಾತ್ರ ಪ್ರವೇಶ ಸಾಧ್ಯವಾಗುತ್ತಿತ್ತು. ಈಗ ಮುಖ ಗುರುತಿಸುವ ತಂತ್ರಜ್ಞಾನದ ಮೂಲಕ ಗುರುತಿನ ದೃಢೀಕರಣ ಮಾಡಬಹುದಾಗಿದೆ. ಇದರಿಂದ ಖಾತೆಯ ಭದ್ರತೆ ಇನ್ನಷ್ಟು ಬಲವಾಗಲಿದೆ.
ಇದಲ್ಲದೆ, ಒಂದೇ ಆಪ್‌ನಲ್ಲಿ ಕುಟುಂಬ ಸದಸ್ಯರ ಆಧಾರ್ ವಿವರಗಳನ್ನು ಸೇರಿಸಿ ನಿರ್ವಹಿಸುವ ಅವಕಾಶವೂ ನೀಡಲಾಗಿದೆ. ಇದರಿಂದ ಕುಟುಂಬದ ಹಲವು ಆಧಾರ್ ದಾಖಲೆಗಳನ್ನು ಒಂದೇ ಸ್ಥಳದಲ್ಲಿ ಸುಲಭವಾಗಿ ಬಳಸಬಹುದು.
ಆಪ್ ಸಕ್ರಿಯಗೊಳಿಸುವ ವಿಧಾನ:
- ಗೂಗಲ್ ಪ್ಲೇ ಸ್ಟೋರ್‌ನಿಂದ Aadhaar App ಡೌನ್‌ಲೋಡ್ ಮಾಡಿ
- ಭಾಷೆ ಆಯ್ಕೆ ಮಾಡಿ
- ಮೊಬೈಲ್ ಸಂಖ್ಯೆ ನಮೂದಿಸಿ
- ಒಟಿಪಿ ಪರಿಶೀಲನೆ ಪೂರ್ಣಗೊಳಿಸಿ
- ಫೇಸ್ ರಿಕಗ್ನಿಷನ್ ಪ್ರಕ್ರಿಯೆ ಮುಗಿಸಿ
- 6 ಅಂಕಿಯ ಪಿನ್ ಹೊಂದಿಸಿ
- ಆಧಾರ್ ವಿವರಗಳನ್ನು ಸೇರಿಸಿ ಖಾತೆ ಸಕ್ರಿಯಗೊಳಿಸಿ
