ಎಲ್‌ಪಿಜಿ ಗ್ಯಾಸ್ ಸಿಲಿಂಡರ್ ಬುಕ್ಕಿಂಗ್‌ಗೆ ಹೊಸ ನಿಯಮ! ಬುಕಿಂಗ್ ಗಡುವು ವಿಸ್ತರಣೆ
LPG Cylinder Booking: ಎಲ್‌ಪಿಜಿ ಗ್ಯಾಸ್ ಬಳಕೆದಾರರಿಗೆ ತೈಲ ಕಂಪನಿಗಳು ಹೊಸ ಬುಕ್ಕಿಂಗ್ ನಿಯಮ ಜಾರಿಗೆ ತಂದಿವೆ. ಎರಡು ಸಿಲಿಂಡರ್ ಹೊಂದಿರುವವರಿಗೆ ಬುಕ್ಕಿಂಗ್ ಮಧ್ಯೆ ಕಾಯುವ ಅವಧಿ ಹೆಚ್ಚಿಸಿದ್ದು, e-KYC ಮತ್ತು OTP ದೃಢೀಕರಣ ಕಡ್ಡಾಯವಾಗಿದೆ.
LPG Cylinder Booking: ದೇಶದಲ್ಲಿ ಎಲ್‌ಪಿಜಿ ಗ್ಯಾಸ್ ಬಳಕೆದಾರರಿಗೆ ತೈಲ ಕಂಪನಿಗಳು ಕೆಲವು ಮಹತ್ವದ ಬದಲಾವಣೆಗಳನ್ನು ಘೋಷಿಸಿವೆ. ವಿಶೇಷವಾಗಿ ಎರಡು ಅಥವಾ ಹೆಚ್ಚಿನ ಸಿಲಿಂಡರ್ ಹೊಂದಿರುವ ಕುಟುಂಬಗಳ ಮೇಲೆ ಈ ಹೊಸ ನಿಯಮಗಳು ಹೆಚ್ಚು ಪರಿಣಾಮ ಬೀರುವ ಸಾಧ್ಯತೆ ಇದೆ.
ಪಶ್ಚಿಮ ಏಷ್ಯಾದ ಪರಿಸ್ಥಿತಿ ಮತ್ತು ಹೋರ್ಮುಜ್ ಜಲಸಂಧಿಯಲ್ಲಿ ಉಂಟಾಗಿರುವ ಉದ್ವಿಗ್ನತೆಯಿಂದ ಸರಬರಾಜಿನ ಮೇಲೆ ಒತ್ತಡ ಹೆಚ್ಚುವ ಸಾಧ್ಯತೆ ಇದೆ ಎಂದು ಅಂದಾಜಿಸಲಾಗಿದೆ. ಈ ಹಿನ್ನೆಲೆಯಲ್ಲಿ ಮುನ್ನೆಚ್ಚರಿಕೆಯ ಕ್ರಮವಾಗಿ ಬುಕ್ಕಿಂಗ್ ನಿಯಮಗಳಲ್ಲಿ ಬದಲಾವಣೆ ಮಾಡಲಾಗಿದೆ.
ಎರಡು ಸಿಲಿಂಡರ್ ಹೊಂದಿರುವವರಿಗೆ ಹೊಸ ಗ್ಯಾಪ್
ಹೊಸ ನಿಯಮದ ಪ್ರಕಾರ ಎರಡು ಎಲ್‌ಪಿಜಿ ಸಿಲಿಂಡರ್ ಹೊಂದಿರುವವರು ಒಂದು ಸಿಲಿಂಡರ್ ಬುಕ್ ಮಾಡಿದ ಬಳಿಕ ಮತ್ತೊಂದು ಬುಕ್ ಮಾಡಲು ಕನಿಷ್ಠ 35 ದಿನಗಳ ಕಾಲ ಕಾಯಬೇಕಾಗಿದೆ.
ಇದಕ್ಕೂ ಮಿಕ್ಕಂತೆ ಉಜ್ವಲ ಯೋಜನೆ (Ujjwala Scheme) ಫಲಾನುಭವಿಗಳಿಗೆ ಈ ಅವಧಿಯನ್ನು ಇನ್ನಷ್ಟು ಹೆಚ್ಚಿಸಿ 45 ದಿನಗಳ ಗ್ಯಾಪ್ ನಿಗದಿಪಡಿಸಲಾಗಿದೆ. ಆದರೆ ಒಂದೇ ಸಿಲಿಂಡರ್ ಹೊಂದಿರುವ ಗ್ರಾಹಕರಿಗೆ ಹಳೆಯ ನಿಯಮವೇ ಮುಂದುವರಿಯುತ್ತದೆ. ಅವರು 25 ದಿನಗಳ ಬಳಿಕ ಮತ್ತೆ ಬುಕ್ಕಿಂಗ್ ಮಾಡಬಹುದು.
ಹೆಚ್ಚುವರಿ ಬುಕ್ಕಿಂಗ್‌ಗೆ ಹೊಸ ಮಾಹಿತಿ ಕಡ್ಡಾಯ
ವರ್ಷಕ್ಕೆ ನೀಡಲಾಗುವ 12 ಸಿಲಿಂಡರ್ ಕೋಟಾ ಮುಗಿದ ಬಳಿಕ ಹೆಚ್ಚುವರಿ ಸಿಲಿಂಡರ್ ಬುಕ್ ಮಾಡಲು ಹೊಸ ನಿಯಮಗಳನ್ನು ಪಾಲಿಸಬೇಕಾಗುತ್ತದೆ. ಬಳಕೆದಾರರು ಆಪ್ ಅಥವಾ ವ್ಯವಸ್ಥೆಯಲ್ಲಿ ಕೆಲವು ವಿವರಗಳನ್ನು ನೀಡಬೇಕು.
ಮನೆಯ ಸದಸ್ಯರ ಸಂಖ್ಯೆ, ವಿಶೇಷ ಕಾರ್ಯಕ್ರಮಗಳು, ಮದುವೆ ಅಥವಾ ಅತಿಥಿಗಳ ಆಗಮನದಂತಹ ಮಾಹಿತಿ ನೀಡುವುದು ಕಡ್ಡಾಯವಾಗುತ್ತದೆ. ಇದರಿಂದ ಅನಾವಶ್ಯಕ ಬುಕ್ಕಿಂಗ್ ಕಡಿಮೆಯಾಗಲಿದೆ ಎಂದು ಕಂಪನಿಗಳು ಹೇಳಿವೆ.
OTP ಮತ್ತು e-KYC ಕಡ್ಡಾಯ
ಇನ್ನು ಮುಂದೆ ಗ್ಯಾಸ್ ಸಿಲಿಂಡರ್ ಡೆಲಿವರಿ ವೇಳೆ OTP ದೃಢೀಕರಣ ಕಡ್ಡಾಯವಾಗಿದೆ. ಜೊತೆಗೆ ಗ್ರಾಹಕರು ತಮ್ಮ ಗ್ಯಾಸ್ ಸಂಪರ್ಕಕ್ಕೆ e-KYC ಪೂರ್ಣಗೊಳಿಸಿರಬೇಕು.
e-KYC ಪೂರ್ಣಗೊಳ್ಳದಿದ್ದರೆ ಬುಕ್ಕಿಂಗ್ ರದ್ದಾಗುವ ಸಾಧ್ಯತೆ ಇದೆ. ಆದ್ದರಿಂದ ಎಲ್ಲ ಬಳಕೆದಾರರು ತಮ್ಮ KYC ವಿವರಗಳನ್ನು ಪರಿಶೀಲಿಸಿಕೊಳ್ಳುವಂತೆ ಅಧಿಕಾರಿಗಳು ಸಲಹೆ ನೀಡಿದ್ದಾರೆ.
ಗ್ಯಾಸ್ ಕೊರತೆ ಬಗ್ಗೆ ಸರ್ಕಾರದ ಸ್ಪಷ್ಟನೆ
ಕೆಲವೆಡೆ ಗ್ಯಾಸ್ ಕೊರತೆ ಇರುವಂತೆ ಕಾಣಿಸಿಕೊಂಡರೂ ದೇಶದಲ್ಲಿ ಪೆಟ್ರೋಲ್, ಡೀಸೆಲ್ ಹಾಗೂ ಎಲ್‌ಪಿಜಿ ಸಂಗ್ರಹ ಸಾಕಷ್ಟಿದೆ ಎಂದು ಸರ್ಕಾರ ಸ್ಪಷ್ಟಪಡಿಸಿದೆ. ಎಲ್ಲಾ ರಿಫೈನರಿಗಳು ಸಾಮಾನ್ಯವಾಗಿ ಕಾರ್ಯನಿರ್ವಹಿಸುತ್ತಿವೆ.
ಕೆಲವು ಪ್ರದೇಶಗಳಲ್ಲಿ ಕಾಣುವ ಕೊರತೆಗೆ ಮುಖ್ಯ ಕಾರಣ ಪೂಕಾರುಗಳು ಮತ್ತು ಅಗತ್ಯಕ್ಕಿಂತ ಹೆಚ್ಚು ಸಿಲಿಂಡರ್ ಸಂಗ್ರಹಿಸುವ ಪ್ರವೃತ್ತಿಯೇ ಎಂದು ಅಧಿಕಾರಿಗಳು ಹೇಳಿದ್ದಾರೆ. ಆದ್ದರಿಂದ ಜನರು ಆತಂಕ ಪಡದೇ ಅಗತ್ಯವಿದ್ದಷ್ಟು ಮಾತ್ರ ಬುಕ್ ಮಾಡುವಂತೆ ಸೂಚಿಸಲಾಗಿದೆ.
