ಸಿಹಿ ಸುದ್ದಿ, 50 ಸಾವಿರದಿಂದ 1 ಲಕ್ಷ ವರೆಗೆ ಸರಳ ಸಾಲ ಸೌಲಭ್ಯ! ಅರ್ಜಿ ಪ್ರಕ್ರಿಯೆ ಬಹಳ ಸರಳ

• 50 ಸಾವಿರದಿಂದ 1 ಲಕ್ಷ ರೂ.ವರೆಗೆ ಸರಳ ಸಾಲ ಸೌಲಭ್ಯ
• 30 ಲಕ್ಷಕ್ಕೂ ಅಧಿಕ ಕುಶಲಕರ್ಮಿಗಳ ನೋಂದಣಿ
• ಪಿಎಂ ವಿಶ್ವಕರ್ಮ ಆರ್ಥಿಕವಾಗಿ ಸಬಲೀಕರಿಸುವ ಗುರಿ

ಸಾಂಪ್ರದಾಯಿಕ ಕೌಶಲ್ಯ ಮತ್ತು ಕೈಚಾಣಾಕ್ಷತೆಯನ್ನೇ ಜೀವನಾಧಾರವಾಗಿಟ್ಟುಕೊಂಡ ಲಕ್ಷಾಂತರ ಕುಶಲಕರ್ಮಿಗಳಿಗೆ ನೆರವಾಗುವ ಉದ್ದೇಶದಿಂದ ಜಾರಿಯಲ್ಲಿರುವ ಪ್ರಧಾನ ಮಂತ್ರಿ ವಿಶ್ವಕರ್ಮ ಯೋಜನೆ ಮತ್ತಷ್ಟು ಬಲ ಪಡೆಯುತ್ತಿದೆ.

ಸಾಲ ಪ್ರಕ್ರಿಯೆ ಸರಳೀಕರಣದಿಂದ ಹಿಡಿದು ಮಾರುಕಟ್ಟೆ ಸಂಪರ್ಕವರೆಗೆ ಹಲವು ಮಹತ್ವದ ಬದಲಾವಣೆಗಳನ್ನು ಸರ್ಕಾರ ಜಾರಿಗೆ ತಂದಿದೆ.

ವಿಶ್ವಕರ್ಮ ಯೋಜನೆಯ ಗುರಿ ಏನು?

2023ರ ಸೆಪ್ಟೆಂಬರ್ 17ರಂದು ಆರಂಭವಾದ ಪಿಎಂ ವಿಶ್ವಕರ್ಮ ಯೋಜನೆ, ತಮ್ಮ ಕೈಗಳು ಮತ್ತು ಸಾಂಪ್ರದಾಯಿಕ ಸಾಧನಗಳ ಮೂಲಕ ಕೆಲಸ ಮಾಡುವ 18 ಬಗೆಯ ಕುಶಲಕರ್ಮಿಗಳು ಹಾಗೂ ಕಸುಬುದಾರರನ್ನು ಆರ್ಥಿಕವಾಗಿ ಸಬಲೀಕರಿಸುವ ಗುರಿ ಹೊಂದಿದೆ.

ಈ ಯೋಜನೆಯನ್ನು ಸೂಕ್ಷ್ಮ, ಸಣ್ಣ ಮತ್ತು ಮಧ್ಯಮ ಉದ್ಯಮಗಳ ಸಚಿವಾಲಯ (MSME) ಅನುಷ್ಠಾನಗೊಳಿಸುತ್ತಿದೆ.

30 ಲಕ್ಷ ಫಲಾನುಭವಿಗಳ ನೋಂದಣಿ

2025ರ ಡಿಸೆಂಬರ್ 1ರ ವೇಳೆಗೆ ಯೋಜನೆಯಡಿ 30 ಲಕ್ಷಕ್ಕೂ ಅಧಿಕ ಮಂದಿ ನೋಂದಾಯಿಸಿಕೊಂಡಿದ್ದಾರೆ. ಇದರಲ್ಲಿ 23 ಲಕ್ಷಕ್ಕೂ ಹೆಚ್ಚು ಫಲಾನುಭವಿಗಳು ಕೌಶಲ್ಯಾಭಿವೃದ್ಧಿ ತರಬೇತಿಯನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದ್ದಾರೆ. ಇದು ಯೋಜನೆಯ ವ್ಯಾಪ್ತಿ ಮತ್ತು ಜನಪ್ರಿಯತೆಯನ್ನು ಸ್ಪಷ್ಟಪಡಿಸುತ್ತದೆ.

ಡಿಜಿಟಲ್ ಪಾವತಿ ಮೂಲಕ 22 ಕೋಟಿ ರೂ. ಪ್ರೋತ್ಸಾಹಧನ

ಫಲಾನುಭವಿಗಳಿಗೆ ಡಿಜಿಟಲ್ ವಹಿವಾಟಿಗೆ ಉತ್ತೇಜನ ನೀಡಲು ಇಂಡಿಯಾ ಪೋಸ್ಟ್ ಪೇಮೆಂಟ್ ಬ್ಯಾಂಕ್, ಪೇಟಿಎಂ, ಫೋನ್‌ಪೇ, ಭಾರತ್‌ಪೇ ಸೇರಿದಂತೆ ಹಲವು ಸಂಸ್ಥೆಗಳೊಂದಿಗೆ ಒಪ್ಪಂದ ಮಾಡಿಕೊಳ್ಳಲಾಗಿದೆ. ಇದರ ಫಲವಾಗಿ 6.8 ಲಕ್ಷಕ್ಕೂ ಹೆಚ್ಚು ಕುಶಲಕರ್ಮಿಗಳಿಗೆ ಒಟ್ಟು 22 ಕೋಟಿ ರೂ. ಮೌಲ್ಯದ ಡಿಜಿಟಲ್ ಪ್ರೋತ್ಸಾಹಧನ ನೇರವಾಗಿ ಪಾವತಿಸಲಾಗಿದೆ.

ಮಾರುಕಟ್ಟೆ ಸಂಪರ್ಕ ಮತ್ತು ಆನ್‌ಲೈನ್ ಮಾರಾಟ

ಕುಶಲಕರ್ಮಿಗಳ ಉತ್ಪನ್ನಗಳಿಗೆ ಮಾರುಕಟ್ಟೆ ಒದಗಿಸಲು ಒಎನ್‌ಡಿಸಿ, ಫ್ಯಾಬ್ ಇಂಡಿಯಾ, ಮೀಶೋ ಸೇರಿದಂತೆ ವಿವಿಧ ಇ-ಕಾಮರ್ಸ್ ವೇದಿಕೆಗಳಲ್ಲಿ ಅವಕಾಶ ಕಲ್ಪಿಸಲಾಗಿದೆ. 30 ಸಾವಿರಕ್ಕೂ ಹೆಚ್ಚು ವಿಶ್ವಕರ್ಮ ಫಲಾನುಭವಿಗಳು ಸರ್ಕಾರಿ ಇ-ಮಾರ್ಕೆಟ್‌ಪ್ಲೇಸ್ (GeM) ಗೆ ಸೇರಿದ್ದಾರೆ. ಜೊತೆಗೆ, ವ್ಯಾಪಾರ ಮೇಳಗಳು ಮತ್ತು ರಾಜ್ಯ ಮಟ್ಟದ ಪ್ರದರ್ಶನಗಳ ಮೂಲಕ ಮಾರಾಟಕ್ಕೆ ಸಹಕಾರ ನೀಡಲಾಗುತ್ತಿದೆ.

ಸಾಲ ಪ್ರಕ್ರಿಯೆಯಲ್ಲಿ ಮಹತ್ವದ ಬದಲಾವಣೆ

ಸಾಲದ ಇಎಂಐ (Loan EMI) ಒತ್ತಡ ಕಡಿಮೆ ಮಾಡುವ ಉದ್ದೇಶದಿಂದ 50,000 ರೂ. ರಿಂದ 1,00,000 ರೂ.ವರೆಗಿನ ಸಣ್ಣ ಮೊತ್ತದ ಸಾಲಗಳನ್ನು ತ್ವರಿತವಾಗಿ ವಿತರಿಸಲು ಕ್ರಮ ಕೈಗೊಳ್ಳಲಾಗಿದೆ. ಸಾಲ ತಿರಸ್ಕೃತವಾದರೆ ಕಾರಣವನ್ನು ಲಿಖಿತವಾಗಿ ತಿಳಿಸಲು ಬ್ಯಾಂಕುಗಳಿಗೆ ಸೂಚಿಸಲಾಗಿದೆ. ತಿರಸ್ಕೃತ ಅರ್ಜಿಗಳ ಮರುಪರಿಶೀಲನೆಗೆ ಜಿಲ್ಲಾ ಮತ್ತು ಆಡಳಿತ ಮಟ್ಟದಲ್ಲಿ ಸಮಿತಿಗಳನ್ನು ರಚಿಸಲಾಗಿದೆ.

12 ಪ್ರಾದೇಶಿಕ ಭಾಷೆಗಳಲ್ಲಿ ಮಾಹಿತಿ

ಫಲಾನುಭವಿಗಳೊಂದಿಗೆ ಉತ್ತಮ ಸಂವಹನಕ್ಕಾಗಿ 12 ಪ್ರಾದೇಶಿಕ ಭಾಷೆಗಳಲ್ಲಿ ಪಠ್ಯ ಸಂದೇಶಗಳನ್ನು ಕಳುಹಿಸಲಾಗುತ್ತಿದೆ. ಸಾಲಕ್ಕೆ ಅರ್ಜಿ ಸಲ್ಲಿಸಿ ಪ್ರತಿಕ್ರಿಯೆ ನೀಡದವರಿಗೆ ಬ್ಯಾಂಕುಗಳು ಮತ್ತು ಎಂಎಸ್‌ಎಂಇ ಸಚಿವಾಲಯದ ಕಾಲ್ ಸೆಂಟರ್ ಮೂಲಕ ಸಂಪರ್ಕ ಮಾಡಲಾಗುತ್ತಿದೆ.

ಅರ್ಜಿಗಳ ಮೂರು ಹಂತದ ಪರಿಶೀಲನೆ

ವಿಶ್ವಕರ್ಮ ಯೋಜನೆಯ ಅರ್ಜಿಗಳು ಗ್ರಾಮ/ನಗರ ಮಟ್ಟ, ಜಿಲ್ಲಾ ಮಟ್ಟ ಹಾಗೂ ರಾಜ್ಯ ಅಥವಾ ಕೇಂದ್ರಾಡಳಿತ ಪ್ರದೇಶ ಮಟ್ಟದಲ್ಲಿ ಪರಿಶೀಲನೆಯ ನಂತರವೇ ಅಂತಿಮ ಅನುಮೋದನೆ ಪಡೆಯುತ್ತವೆ.

ಚಾಂಪಿಯನ್ಸ್ ಪೋರ್ಟಲ್ ಮೂಲಕ ಕುಂದುಕೊರತೆ ಪರಿಹಾರ

ಕುಂದುಕೊರತೆಗಳಿಗೆ ಪರಿಹಾರ ನೀಡಲು champions.gov.in (Champions Portal) ಮೂಲಕ ವ್ಯವಸ್ಥೆ ಕಲ್ಪಿಸಲಾಗಿದೆ. ಇಲ್ಲಿವರೆಗೆ 1.59 ಲಕ್ಷಕ್ಕೂ ಹೆಚ್ಚು ದೂರುಗಳು ದಾಖಲಾಗಿದ್ದು, ಶೇ.99ಕ್ಕಿಂತ ಹೆಚ್ಚು ಸಮಸ್ಯೆಗಳಿಗೆ ಪರಿಹಾರ ಒದಗಿಸಲಾಗಿದೆ. ಈ ಪೋರ್ಟಲ್ 23 ಭಾಷೆಗಳಲ್ಲಿ ಲಭ್ಯವಿದೆ.