Solar Eclipse: ಆಗಸ್ಟ್‌ 12ರಂದು ಅಪರೂಪದ ಖಗೋಳ ಸಂಭ್ರಮ; ಸೂರ್ಯಗ್ರಹಣ, ಉಲ್ಕಾಪಾತ ಒಂದೇ ದಿನ

Solar Eclipse: 2026ರ ಆಗಸ್ಟ್‌ 12 ಖಗೋಳಾಸಕ್ತರಿಗೆ ವಿಶೇಷ ದಿನವಾಗಲಿದೆ. ಹಗಲಿನಲ್ಲಿ ಅಪರೂಪದ ಸಂಪೂರ್ಣ ಸೂರ್ಯಗ್ರಹಣ ಸಂಭವಿಸಿದರೆ, ಅದೇ ದಿನ ರಾತ್ರಿ ಪ್ರಸಿದ್ಧ ಪರ್ಸೀಡ್ (Perseid) ಉಲ್ಕಾಪಾತ ಆಕಾಶವನ್ನು ಅಲಂಕರಿಸಲಿದೆ. ಒಂದೇ ದಿನ ಎರಡು ಪ್ರಮುಖ ಖಗೋಳ ಘಟನೆಗಳು ನಡೆಯುತ್ತಿರುವುದು ಈ ದಿನದ ವಿಶೇಷತೆಯಾಗಿದೆ.

ಸೂರ್ಯ, ಚಂದ್ರ ಮತ್ತು ಭೂಮಿ ಒಂದೇ ಸರಳರೇಖೆಯಲ್ಲಿ ಬಂದಾಗ ಚಂದ್ರನು ಸೂರ್ಯನನ್ನು ಸಂಪೂರ್ಣವಾಗಿ ಆವರಿಸಿದರೆ ಅದನ್ನು ಸಂಪೂರ್ಣ ಸೂರ್ಯಗ್ರಹಣ ಎಂದು ಕರೆಯಲಾಗುತ್ತದೆ. ಈ ವೇಳೆ ಸೂರ್ಯನ ಹೊರಭಾಗದ ಪ್ರಕಾಶವಲಯ ಸ್ಪಷ್ಟವಾಗಿ ಕಾಣಿಸಿಕೊಳ್ಳುವುದು ಖಗೋಳಾಸಕ್ತರಿಗೆ ಅಪರೂಪದ ಅನುಭವವಾಗಿರುತ್ತದೆ.

ಈ ಬಾರಿ ಸಂಪೂರ್ಣ ಸೂರ್ಯಗ್ರಹಣವು ಗ್ರೀನ್‌ಲ್ಯಾಂಡ್‌, ಐಸ್‌ಲ್ಯಾಂಡ್‌, ಉತ್ತರ ರಷ್ಯಾ, ಉತ್ತರ ಅಟ್ಲಾಂಟಿಕ್‌, ಸ್ಪೇನ್ ಹಾಗೂ ಪೋರ್ಚುಗಲ್‌ನ ಕೆಲವು ಭಾಗಗಳಲ್ಲಿ ಸ್ಪಷ್ಟವಾಗಿ ಗೋಚರಿಸಲಿದೆ. ಯುರೋಪ್‌ನಲ್ಲಿ 1999ರ ಬಳಿಕ ಕಾಣಿಸಿಕೊಳ್ಳುತ್ತಿರುವ ಮೊದಲ ಸಂಪೂರ್ಣ ಸೂರ್ಯಗ್ರಹಣ ಇದಾಗಿದ್ದು, ಸ್ಪೇನ್‌ನಲ್ಲಿ ಸುಮಾರು 120 ವರ್ಷಗಳ ಬಳಿಕ ಈ ದೃಶ್ಯ ಮರುಕಳಿಸುತ್ತಿದೆ.

ಸೂರ್ಯಾಸ್ತದ ಹೊತ್ತಿನಲ್ಲಿ ಸ್ಪೇನ್ ಹಾಗೂ ಪೋರ್ಚುಗಲ್‌ನ ಕೆಲವು ಪ್ರದೇಶಗಳಲ್ಲಿ ಗ್ರಹಣ ಸಂಭವಿಸುವ ಕಾರಣ ಇದನ್ನು “ಸನ್‌ಸೆಟ್ ಎಕ್ಲಿಪ್ಸ್” (Sunset Eclipse) ಎಂದೂ ಕರೆಯಲಾಗುತ್ತಿದೆ. ಸೂರ್ಯಾಸ್ತದ ಹಿನ್ನೆಲೆಯಲ್ಲಿರುವ ಚಂದ್ರನ ನೆರಳು ಮತ್ತು ಸೂರ್ಯನ ಕೊರೋನಾ ಅತ್ಯಂತ ಆಕರ್ಷಕ ದೃಶ್ಯವನ್ನು ನೀಡಲಿದೆ.

ಇದೇ ದಿನ ರಾತ್ರಿ ಪರ್ಸೀಡ್ ಉಲ್ಕಾಪಾತ ತನ್ನ ಗರಿಷ್ಠ ಹಂತ ತಲುಪಲಿದೆ. ಸೂರ್ಯಗ್ರಹಣ ಅಮಾವಾಸ್ಯೆಯಂದು ಸಂಭವಿಸುವುದರಿಂದ ಚಂದ್ರನ ಬೆಳಕು ಇರುವುದಿಲ್ಲ. ಹೀಗಾಗಿ ಆಕಾಶ ಹೆಚ್ಚು ಕತ್ತಲಾಗಿದ್ದು, ಉಲ್ಕಾಪಾತವನ್ನು ಸ್ಪಷ್ಟವಾಗಿ ವೀಕ್ಷಿಸಲು ಅನುಕೂಲಕರ ಪರಿಸ್ಥಿತಿ ನಿರ್ಮಾಣವಾಗಲಿದೆ.

ಭಾರತದಲ್ಲಿ ಈ ಸಂಪೂರ್ಣ ಸೂರ್ಯಗ್ರಹಣ ಗೋಚರಿಸುವ ಸಾಧ್ಯತೆ ಇಲ್ಲ. ಆದರೆ ಲಡಾಖ್ ಮತ್ತು ಜಮ್ಮು-ಕಾಶ್ಮೀರದ ಉತ್ತರ ಭಾಗಗಳಲ್ಲಿ ಭಾಗಶಃ ಗ್ರಹಣ ಕಾಣುವ ಸಾಧ್ಯತೆ ಇದೆ ಎಂದು ಕೆಲವು ಖಗೋಳ ಲೆಕ್ಕಾಚಾರಗಳು ಸೂಚಿಸಿವೆ. ದೇಶದ ಖಗೋಳಾಸಕ್ತರು ಆಗಸ್ಟ್‌ 12 ಮತ್ತು 13ರ ಮುಂಜಾನೆ ಪರ್ಸೀಡ್ ಉಲ್ಕಾಪಾತವನ್ನು ವೀಕ್ಷಿಸುವ ಅವಕಾಶ ಪಡೆಯಬಹುದು.