ಇನ್ಮುಂದೆ ಶಬರಿಮಲೆ ಪ್ರಸಾದ ಮನೆ ಬಾಗಿಲಿಗೇ ತಲುಪಲಿದೆ! ಸ್ಪೀಡ್ ಪೋಸ್ಟ್ ಮೂಲಕ ರವಾನೆ
ಶಬರಿಮಲೆ ಯಾತ್ರೆಗೆ ತೆರಳುವ ಭಕ್ತರಿಗೆ ಈ ಬಾರಿ ಹೊಸ ಸೌಲಭ್ಯ ಸಿಗಲಿದೆ. ಅರವಣ ಪಾಯಸ, ಅಪ್ಪಂ ಸೇರಿದಂತೆ ದೇವರ ಪ್ರಸಾದವನ್ನು ಇಂಡಿಯಾ ಪೋಸ್ಟ್ ಮೂಲಕ ದೇಶದ ಯಾವುದೇ ವಿಳಾಸಕ್ಕೆ ಮನೆ ಬಾಗಿಲಿಗೇ ತರಿಸಿಕೊಳ್ಳಬಹುದು.
ಶಬರಿಮಲೆ (Sabarimala) ಯಾತ್ರೆಗೆ ತೆರಳುವ ಅಯ್ಯಪ್ಪ ಭಕ್ತರು ಇನ್ನು ಮುಂದೆ ಪ್ರಸಾದದ ಪ್ಯಾಕೆಟ್‌ಗಳನ್ನು ಹೊತ್ತುಕೊಂಡು ಮನೆಗೆ ಬರಬೇಕಾದ ಅಗತ್ಯವಿಲ್ಲ. ದೇವರ ಪ್ರಸಾದವನ್ನು ನೇರವಾಗಿ ಮನೆಗೆ ತಲುಪಿಸುವ ವ್ಯವಸ್ಥೆಯನ್ನು ಅಂಚೆ ಇಲಾಖೆ (India Post) ಕಲ್ಪಿಸುತ್ತಿದೆ.
ನವೆಂಬರ್ 17ರಿಂದ ಆರಂಭವಾಗುವ 41 ದಿನಗಳ ಮಂಡಲ-ಮಕರವಿಳಕ್ಕು ಯಾತ್ರೆಯ ಹಿನ್ನೆಲೆಯಲ್ಲಿ ಈ ಸೌಲಭ್ಯ ಜಾರಿಗೆ ಬರಲಿದೆ. ಇದಕ್ಕಾಗಿ ಶಬರಿಮಲೆ ಸನ್ನಿಧಾನದಲ್ಲಿ ವಿಶೇಷ ಪಾರ್ಸೆಲ್ ಬುಕಿಂಗ್ ಕೌಂಟರ್ ತೆರೆಯಲಾಗುತ್ತಿದೆ. ದೇವಸ್ವಂ ಮಂಡಳಿಯ ಅರವಣ ಮತ್ತು ಅಪ್ಪಂ ವಿತರಣಾ ಕೇಂದ್ರಗಳ ಸಮೀಪದಲ್ಲೇ ಈ ಕೌಂಟರ್ ಕಾರ್ಯನಿರ್ವಹಿಸಲಿದೆ.
ಭಕ್ತರು ತಮ್ಮ ಯಾತ್ರೆಯ ಸಂದರ್ಭದಲ್ಲಿ ಪ್ರಸಾದವನ್ನು ಖರೀದಿಸಿ, ಅಲ್ಲಿಯೇ ಮನೆ ವಿಳಾಸ ನೀಡಿ ಪಾರ್ಸೆಲ್ ಬುಕ್ ಮಾಡಬಹುದು. ಸ್ಪೀಡ್ ಪೋಸ್ಟ್ (Speed Post) ಮೂಲಕ ಸುರಕ್ಷಿತವಾಗಿ ಪ್ಯಾಕ್ ಮಾಡಿ ದೇಶದ ವಿವಿಧ ಭಾಗಗಳಿಗೆ ತಲುಪಿಸಲಾಗುತ್ತದೆ. ಈ ಸೇವೆ ದಿನದ 24 ಗಂಟೆಯೂ ಲಭ್ಯವಿರಲಿದೆ.
ಯಾತ್ರೆಯ ವೇಳೆ ಜನದಟ್ಟಣೆ ಮತ್ತು ಪ್ರಯಾಣದ ಕಿರಿಕಿರಿ ಇರುವುದರಿಂದ ಹೆಚ್ಚಿನ ಪ್ರಮಾಣದ ಪ್ರಸಾದವನ್ನು ಕೊಂಡೊಯ್ಯುವುದು ಕೆಲವರಿಗೆ ಕಷ್ಟವಾಗುತ್ತದೆ. ಇಂತಹ ಸಮಸ್ಯೆ ತಪ್ಪಿಸುವ ಉದ್ದೇಶದಿಂದ ಈ ವ್ಯವಸ್ಥೆ ರೂಪಿಸಲಾಗಿದೆ. ಭಕ್ತರು ಮನೆಗೆ ತಲುಪುವ ವೇಳೆಗೆ ಪ್ರಸಾದವೂ ಅವರ ವಿಳಾಸಕ್ಕೆ ತಲುಪುವಂತೆ ಸೇವೆ ಒದಗಿಸುವ ಯೋಜನೆಯಿದೆ.
ಇದರ ಜೊತೆಗೆ ದೇಶದ ಯಾವುದೇ ಭಾಗದಲ್ಲಿರುವ ಭಕ್ತರು ತಮ್ಮ ಸಮೀಪದ ಅಂಚೆ ಕಚೇರಿಗಳಿಂದಲೂ ಶಬರಿಮಲೆ ಪ್ರಸಾದವನ್ನು ಬುಕ್ ಮಾಡಬಹುದು. ಈ ಮೂಲಕ ಸನ್ನಿಧಾನಕ್ಕೆ ಭೇಟಿ ನೀಡಲು ಸಾಧ್ಯವಾಗದವರಿಗೂ ಪ್ರಸಾದ ತರಿಸಿಕೊಳ್ಳಲು ಅವಕಾಶ ಸಿಗಲಿದೆ.
ಟ್ರಾವೆಂಕೋರ್ ದೇವಸ್ವಂ ಮಂಡಳಿ (TDB) ಅಧ್ಯಕ್ಷ ಕೆ. ಜಯಕುಮಾರ್ ಮತ್ತು ಕೇರಳ ಅಂಚೆ ವೃತ್ತದ ಮುಖ್ಯ ಪೋಸ್ಟ್ ಮಾಸ್ಟರ್ ಜನರಲ್ ಅಮಿತಾಭ್ ಸಿಂಗ್ ಈ ಕುರಿತು ಜಂಟಿ ಪ್ರಕಟಣೆ ನೀಡಿದ್ದಾರೆ. ಸುಲಭ ಬುಕ್ಕಿಂಗ್, ಸುರಕ್ಷಿತ ಪ್ಯಾಕಿಂಗ್ ಹಾಗೂ ವಿಶ್ವಾಸಾರ್ಹ ವಿತರಣೆಗೆ ಆದ್ಯತೆ ನೀಡಲಾಗುವುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಕರ್ನಾಟಕ ರಾಜ್ಯದ ಮೂಲೆಮೂಲೆಗಳ ಕನ್ನಡ ಸುದ್ದಿಗಳ ಜೊತೆಗೆ ದಿನದ ಪ್ರಮುಖ ಬೆಳವಣಿಗೆಗಳನ್ನು Kannada News Today ಮೂಲಕ ತಿಳಿಯಿರಿ.
