2025ರಲ್ಲಿ ಸರಣಿ ಬಸ್ ಅಪಘಾತಗಳು: ದೇಶವನ್ನೇ ಕಾಡಿದ ಸಾವುಗಳ ನೆರಳು
2025ರಲ್ಲಿ ದೇಶದ ವಿವಿಧ ರಾಜ್ಯಗಳಲ್ಲಿ ಸಂಭವಿಸಿದ ಸರಣಿ ಬಸ್ ಅಪಘಾತಗಳು ನೂರಾರು ಕುಟುಂಬಗಳನ್ನು ಶೋಕದಲ್ಲಿ ಮುಳುಗಿಸಿವೆ. ಬೆಂಕಿ, ಢಿಕ್ಕಿ, ಹೈವೇ ಅಪಘಾತಗಳು ಪ್ರಯಾಣಿಕರ ಭದ್ರತೆ ಕುರಿತು ಗಂಭೀರ ಪ್ರಶ್ನೆ ಎತ್ತಿವೆ.
- ಬಸ್ ಅಪಘಾತಗಳು 2025ರಲ್ಲಿ ನೂರಾರು ಸಾವುಗಳಿಗೆ ಕಾರಣ
- ಸರಣಿ ಬಸ್ ದುರಂತಗಳು ಪ್ರಯಾಣಿಕರಲ್ಲಿ ಭಯ ಮೂಡಿಸಿದವು
- ಬಸ್ ಬೆಂಕಿ, ಹೈವೇ ಅಪಘಾತಗಳು ದೇಶಾದ್ಯಂತ ಆತಂಕ
2025ನೇ ವರ್ಷ ದೇಶದ ಸಾರಿಗೆ ಇತಿಹಾಸದಲ್ಲಿ ದುಃಖದ ಅಧ್ಯಾಯವಾಗಿ ಉಳಿಯುವ ಸಾಧ್ಯತೆ ಇದೆ. ವರ್ಷಪೂರ್ತಿ ದೇಶದ ವಿವಿಧ ಭಾಗಗಳಲ್ಲಿ ಸಂಭವಿಸಿದ ಸರಣಿ ಬಸ್ ಅಪಘಾತಗಳು ಸಾರ್ವಜನಿಕರನ್ನು ಬೆಚ್ಚಿಬೀಳುವಂತೆ ಮಾಡಿವೆ. ದೀರ್ಘ ಪ್ರಯಾಣಕ್ಕೆ ನಂಬಿಕೆಯ ಸಾರಿಗೆಯೆಂದು ಭಾವಿಸಲಾದ ಬಸ್‌ಗಳೇ ಹಲವರ ಪಾಲಿಗೆ ಮರಣದ ಬಾಗಿಲಾಗಿ ಪರಿಣಮಿಸಿದವು.
ಸಾಮಾನ್ಯವಾಗಿ ಕಾರುಗಳು ಅಥವಾ ದ್ವಿಚಕ್ರ ವಾಹನಗಳಿಗಿಂತ ಬಸ್ ಪ್ರಯಾಣ ಹೆಚ್ಚು ಸುರಕ್ಷಿತ ಎನ್ನುವ ನಂಬಿಕೆ ಇದೆ. ಆದರೆ 2025ರಲ್ಲಿ ನಡೆದ ಅನೇಕ ಅಪಘಾತಗಳು ಈ ನಂಬಿಕೆಗೆ ಬಲವಾದ ಆಘಾತ ನೀಡಿವೆ.
ವಿಶೇಷವಾಗಿ ಬಸ್‌ಗಳಲ್ಲಿ ಸಂಭವಿಸಿದ ಅಗ್ನಿ ಅಪಘಾತಗಳು ಪ್ರಯಾಣಿಕರಿಗೆ ಪಾರಾಗುವ ಅವಕಾಶವನ್ನೇ ನೀಡದೆ, ಕೆಲವೇ ಕ್ಷಣಗಳಲ್ಲಿ ಭೀಕರ ದುರಂತಕ್ಕೆ ಕಾರಣವಾದವು.
ಈ ವರ್ಷದ ಪ್ರಮುಖ ಬಸ್ ಅಪಘಾತಗಳು
ಸೆಪ್ಟೆಂಬರ್ 14ರಂದು ರಾಜಸ್ಥಾನದಲ್ಲಿ ಜೈಸಲ್ಮೇರ್‌ನಿಂದ ಜೋಧಪುರ ಕಡೆಗೆ ತೆರಳುತ್ತಿದ್ದ ಖಾಸಗಿ ಟ್ರಾವೆಲ್ಸ್ ಬಸ್ನಲ್ಲಿ ಭಾರೀ ಬೆಂಕಿ ಹೊತ್ತಿಕೊಂಡಿತು. ಹಿಂಭಾಗದಿಂದ ಹರಡಿದ ಬೆಂಕಿ ಕ್ಷಣಾರ್ಧದಲ್ಲಿ ಬಸ್‌ನ್ನೇ ಆವರಿಸಿ, ಸುಮಾರು 20 ಮಂದಿ ಸಜೀವ ದಹನಕ್ಕೊಳಗಾದರು. ಅಪಘಾತದ ವೇಳೆ ಬಸ್ನಲ್ಲಿ 57 ಪ್ರಯಾಣಿಕರು ಇದ್ದರು.
ಸೆಪ್ಟೆಂಬರ್ 23ರಂದು ತಿರುಪತಿ ಜಿಲ್ಲೆಯ ಪೆಳ್ಳಕೂರು ಸಮೀಪ ಮದುವೆ ತಂಡದ ಬಸ್‌ಗೆ ಬೆಂಕಿ ತಗುಲಿತು. ಅಪಾಯ ಅರಿತ ಪ್ರಯಾಣಿಕರು ತಕ್ಷಣ ಕೆಳಗಿಳಿದ ಕಾರಣ ದೊಡ್ಡ ಪ್ರಾಣಾಪಾಯ ತಪ್ಪಿತು.
ಸೆಪ್ಟೆಂಬರ್ 26ರಂದು ಹೈದರಾಬಾದ್‌ನಲ್ಲಿ ಖಾಸಗಿ ಟ್ರಾವೆಲ್ಸ್ ಬಸ್‌ನ ಏಸಿ ಘಟಕದಿಂದ ಬೆಂಕಿ ಕಾಣಿಸಿಕೊಂಡು, ಪ್ರಯಾಣಿಕರಲ್ಲಿ ಗೊಂದಲ ಉಂಟಾಯಿತು.
ಅಕ್ಟೋಬರ್ 24ರಂದು ಕರ್ನೂಲಿನಲ್ಲಿ ಮಧ್ಯರಾತ್ರಿ ಬಸ್–ಬೈಕ್ ಢಿಕ್ಕಿಯಲ್ಲಿ 19 ಮಂದಿ ಪ್ರಾಣ ಕಳೆದುಕೊಂಡರು.
ಅಕ್ಟೋಬರ್ 26ರಂದು ಉತ್ತರ ಪ್ರದೇಶದ ಸ್ಲೀಪರ್ ಬಸ್ನಲ್ಲಿ ಬೆಂಕಿ, ಅಕ್ಟೋಬರ್ 29ರಂದು ಮಹಾರಾಷ್ಟ್ರದ ಸಮೃದ್ಧಿ ಹೆದ್ದಾರಿಯಲ್ಲಿ ಬಸ್ ಅಗ್ನಿ ಅವಘಡ ಸಂಭವಿಸಿತು.
ನವೆಂಬರ್ 3ರಂದು ಚೆವೆಳ್ಳದಲ್ಲಿ ನಡೆದ ಅಪಘಾತದಲ್ಲಿ 19 ಮಂದಿ ದುರ್ಮರಣಕ್ಕೊಳಗಾದರು.
ಡಿಸೆಂಬರ್ 12ರಂದು ಮಾರೇಡುಮಿಲ್ಲಿ ಬಳಿ ಕಣಿವೆಗೆ ಉರುಳಿದ ಖಾಸಗಿ ಬಸ್ ಅಪಘಾತದಲ್ಲಿ 9 ಮಂದಿ ಮೃತರು, ಹಲವರಿಗೆ ಗಾಯಗಳು ಸಂಭವಿಸಿದವು.
ಇದೇ ತಿಂಗಳು 16ರಂದು ಮಥುರಾ ಎಕ್ಸ್‌ಪ್ರೆಸ್ ಹೈವೇನಲ್ಲಿ ದಟ್ಟ ಮಂಜಿನಿಂದಾಗಿ ಬಸ್‌ಗಳು ಹಾಗೂ ಕಾರುಗಳು ಢಿಕ್ಕಿ ಹೊಡೆದು, ಬೆಂಕಿ ಕಾಣಿಸಿಕೊಂಡ ಪರಿಣಾಮ 13 ಮಂದಿ ಸಾವನ್ನಪ್ಪಿ, ಸುಮಾರು 60 ಜನರಿಗೆ ಗಾಯಗಳಾದವು.
ಡಿಸೆಂಬರ್ 24ರಂದು ತಮಿಳುನಾಡಿನಲ್ಲಿ ಎರಡು ಕಾರುಗಳಿಗೆ ಬಸ್ ಢಿಕ್ಕಿ ಹೊಡೆದು 9 ಮಂದಿ ಮೃತರಾದರು.
ಇಂದು (ಡಿಸೆಂಬರ್ 25) ಕರ್ನಾಟಕದಲ್ಲಿ ಸಂಭವಿಸಿದ ಮತ್ತೊಂದು ಬಸ್ ಅಪಘಾತದಲ್ಲಿ ಸುಮಾರು 13 ಮಂದಿ ಜೀವ ಕಳೆದುಕೊಂಡಿದ್ದಾರೆ, ಹಲವರು ಚಿಕಿತ್ಸೆ ಪಡೆಯುತ್ತಿದ್ದಾರೆ.
ಪ್ರಯಾಣಿಕರ ಸುರಕ್ಷತೆಗೆ ಎಚ್ಚರಿಕೆ ಅಗತ್ಯ
ಈ ಸರಣಿ ದುರಂತಗಳು ರಸ್ತೆ ಸುರಕ್ಷತೆ, ಬಸ್‌ಗಳ ತಾಂತ್ರಿಕ ಪರಿಶೀಲನೆ, ಚಾಲಕರ ಜಾಗ್ರತೆ ಮತ್ತು ತುರ್ತು ನಿರ್ವಹಣಾ ವ್ಯವಸ್ಥೆಗಳ ಕುರಿತು ಗಂಭೀರ ಚರ್ಚೆಗೆ ಕಾರಣವಾಗಿವೆ. ಪ್ರಯಾಣಿಕರ ಜೀವ ರಕ್ಷಣೆಗಾಗಿ ಕಟ್ಟುನಿಟ್ಟಿನ ಕ್ರಮಗಳು ಕೈಗೊಳ್ಳಬೇಕೆಂಬ ಒತ್ತಾಯ ಮತ್ತಷ್ಟು ಬಲವಾಗುತ್ತಿದೆ.
