Union Budget 2026: ಬಜೆಟ್ 2026ನಲ್ಲಿ ಮಹಿಳಾ ಸಬಲೀಕರಣಕ್ಕೆ ಪ್ರಮುಖ ಸ್ಥಾನ, ಹೊಸ ಯೋಜನೆಗಳಿವು
Union Budget 2026: ಕೇಂದ್ರ ಬಜೆಟ್ 2026ರಲ್ಲಿ ಮಹಿಳಾ ಸಬಲೀಕರಣಕ್ಕೆ ಆದ್ಯತೆ ನೀಡಿ, ಶೀ ಮಾರ್ಟ್, ಬಾಲಕಿಯರ ಹಾಸ್ಟೆಲ್, ಕ್ರಿಯೇಟರ್ ಲ್ಯಾಬ್, ಶಿಕ್ಷಣ ಮತ್ತು ಉದ್ಯೋಗಕ್ಕೆ ನೆರವಾಗುವ ಹಲವು ವಿಶೇಷ ಯೋಜನೆಗಳನ್ನು ಸರ್ಕಾರ ಘೋಷಿಸಿದೆ
- ಬಜೆಟ್ 2026ನಲ್ಲಿ ಮಹಿಳಾ ಸಬಲೀಕರಣಕ್ಕೆ ಪ್ರಮುಖ ಸ್ಥಾನ
- ಮಹಿಳಾ ಯೋಜನೆಗಳು: ಶೀ ಮಾರ್ಟ್, ಬಾಲಕಿಯರ ಹಾಸ್ಟೆಲ್ ಘೋಷಣೆ
- ಶಿಕ್ಷಣ–ಉದ್ಯೋಗ: ಕ್ರಿಯೇಟರ್ ಲ್ಯಾಬ್ ಮತ್ತು ಕೌಶಲ್ಯಾಭಿವೃದ್ಧಿ
Union Budget 2026: ಕೇಂದ್ರ ಸರ್ಕಾರದ ಬಜೆಟ್ 2026 ಮಹಿಳೆಯರು ಮತ್ತು ಬಾಲಕಿಯರ ಭವಿಷ್ಯವನ್ನು ದೃಢಗೊಳಿಸುವ ಉದ್ದೇಶದೊಂದಿಗೆ ಮಂಡನೆಯಾಗಿದೆ. ಈ ಬಾರಿ ಬಜೆಟ್‌ನಲ್ಲಿ ಮಹಿಳಾ ಸಬಲೀಕರಣ ಕೇವಲ ಘೋಷಣೆಯಲ್ಲ, ನೇರ ಅನುಷ್ಠಾನಕ್ಕೆ ದಾರಿ ಮಾಡಿಕೊಡುವ ಹಲವು ಯೋಜನೆಗಳು ಸೇರಿವೆ ಎಂಬುದು ವಿಶೇಷ.
ಶೀ ಮಾರ್ಟ್‌ಗಳಿಗೆ ಗ್ರೀನ್ ಸಿಗ್ನಲ್
ದೇಶದಾದ್ಯಂತ ಮಹಿಳಾ ಸ್ವಸಹಾಯ ಸಂಘಗಳಿಗಾಗಿ ಶೀ ಮಾರ್ಟ್‌ಗಳನ್ನು ಸ್ಥಾಪಿಸಲು ಸರ್ಕಾರ ನಿರ್ಧರಿಸಿದೆ. ಇವು ಸಮುದಾಯ ಆಧಾರಿತ ರಿಟೇಲ್ ಕೇಂದ್ರಗಳಾಗಿದ್ದು, ಮಹಿಳಾ ಉದ್ಯಮಿಗಳಿಗೆ ಮಾರುಕಟ್ಟೆ ಪ್ರವೇಶ, ಕ್ರೆಡಿಟ್ ಲಿಂಕ್ ಉತ್ಪನ್ನಗಳು ಮತ್ತು ಹೊಸ ಹಣಕಾಸು ಸಾಧನಗಳನ್ನು ಪಡೆಯಲು ನೆರವಾಗಲಿವೆ. ಗ್ರಾಮೀಣ ಹಾಗೂ ನಗರ ಮಹಿಳೆಯರಿಗೆ ಇದು ಸ್ವಾವಲಂಬನೆಯ ದೊಡ್ಡ ಅವಕಾಶವೆಂದು ಅರ್ಥಶಾಸ್ತ್ರಜ್ಞರು ಹೇಳುತ್ತಾರೆ.
ಪ್ರತಿ ಜಿಲ್ಲೆಗೆ ಒಂದು ಬಾಲಕಿಯರ ಹಾಸ್ಟೆಲ್
ಶಿಕ್ಷಣದಿಂದ ಯಾವುದೇ ಬಾಲಕಿ ವಂಚಿತಳಾಗಬಾರದು ಎಂಬ ಉದ್ದೇಶದಿಂದ, ಪ್ರತಿ ಜಿಲ್ಲೆಯಲ್ಲಿ ಒಂದು ಬಾಲಕಿಯರ ಹಾಸ್ಟೆಲ್ ಸ್ಥಾಪಿಸುವುದಾಗಿ ಬಜೆಟ್‌ನಲ್ಲಿ ಘೋಷಿಸಲಾಗಿದೆ. ಬಡ ಮತ್ತು ಮಧ್ಯಮ ವರ್ಗದ ಕುಟುಂಬಗಳ ಬಾಲಕಿಯರಿಗೆ ಇದು ಸುರಕ್ಷಿತ ವಸತಿ ಹಾಗೂ ವಿದ್ಯಾಭ್ಯಾಸದ ನಿರಂತರತೆಯನ್ನು ಒದಗಿಸಲಿದೆ.
ಸ್ಕೂಲ್–ಕಾಲೇಜುಗಳಲ್ಲಿ ಕ್ರಿಯೇಟರ್ ಲ್ಯಾಬ್
ಭವಿಷ್ಯದ ಉದ್ಯೋಗಾವಕಾಶಗಳನ್ನು ಗಮನದಲ್ಲಿಟ್ಟುಕೊಂಡು, 1500 ಶಾಲೆಗಳು ಮತ್ತು 500 ಕಾಲೇಜುಗಳಲ್ಲಿ ಕಂಟೆಂಟ್ ಕ್ರಿಯೇಟರ್ ಲ್ಯಾಬ್‌ಗಳು ಸ್ಥಾಪನೆಯಾಗಲಿವೆ. ಅನಿಮೇಷನ್, ವಿಸುಯಲ್ ಎಫೆಕ್ಟ್ಸ್, ಗೇಮಿಂಗ್, ಕಾಮಿಕ್ಸ್ ಮೊದಲಾದ ಕ್ಷೇತ್ರಗಳಲ್ಲಿ ವಿದ್ಯಾರ್ಥಿಗಳಿಗೆ ಪ್ರಾಯೋಗಿಕ ತರಬೇತಿ ನೀಡಲಾಗುತ್ತದೆ. ಈ ಲ್ಯಾಬ್‌ಗಳ ಸುತ್ತಮುತ್ತ ಐದು ಯೂನಿವರ್ಸಿಟಿ ಟೌನ್‌ಶಿಪ್‌ಗಳೂ ಅಭಿವೃದ್ಧಿಯಾಗಲಿವೆ.
ಇತರೆ ಪ್ರಮುಖ ಘೋಷಣೆಗಳು
2026–27ನೇ ಸಾಲಿನಲ್ಲಿ ರಾಜ್ಯಗಳಿಗೆ ರೂ.1.4 ಲಕ್ಷ ಕೋಟಿ ಹಣಕಾಸು ಆಯೋಗ ಅನುದಾನ ನೀಡಲು ನಿರ್ಧರಿಸಲಾಗಿದೆ. ಜೊತೆಗೆ ವೈದ್ಯಕೀಯ ಪ್ರವಾಸೋದ್ಯಮ ಉತ್ತೇಜನಕ್ಕೆ ಐದು ಪ್ರಾದೇಶಿಕ ಕೇಂದ್ರಗಳು, ಕೊಬ್ಬರಿ ಉತ್ಪಾದನೆಗೆ ವಿಶೇಷ ಯೋಜನೆ ಹಾಗೂ ದೇಶದ 15 ಪುರಾತತ್ವ ತಾಣಗಳ ಅಭಿವೃದ್ಧಿ ಘೋಷಿಸಲಾಗಿದೆ.
ಖೇಲೋ ಇಂಡಿಯಾ ಮತ್ತು ಪ್ರವಾಸೋದ್ಯಮ ಬೆಂಬಲ
ಈ ಬಜೆಟ್‌ನಲ್ಲಿ ಖೇಲೋ ಇಂಡಿಯಾ ಮಿಷನ್ಗೂ ಪುನರ್‌ಬಲ ನೀಡಲಾಗಿದೆ. ಪ್ರವಾಸೋದ್ಯಮ ಕ್ಷೇತ್ರದಲ್ಲಿ ಉದ್ಯೋಗ ಸೃಷ್ಟಿಗೆ, 10 ಸಾವಿರ ಪ್ರವಾಸಿ ಮಾರ್ಗದರ್ಶಿಗಳಿಗೆ ತರಬೇತಿ ನೀಡುವ ಯೋಜನೆ ಪ್ರಕಟವಾಗಿದೆ. ವಿದೇಶಿ ಪ್ರವಾಸ ಪ್ಯಾಕೇಜ್‌ಗಳ ಮೇಲಿನ TCS ದರವನ್ನು 5% ಮತ್ತು 20%ರಿಂದ 2%ಕ್ಕೆ ಇಳಿಸುವ ವ್ಯವಸ್ಥೆಯೂ ಬಜೆಟ್‌ನಲ್ಲಿ ಸೇರಿದೆ.
ಒಟ್ಟಾರೆ, ಬಜೆಟ್ 2026 ಮಹಿಳೆಯರನ್ನು ಆರ್ಥಿಕವಾಗಿ ಮತ್ತು ಸಾಮಾಜಿಕವಾಗಿ ಶಕ್ತಿಮಾಡುವ ಸ್ಪಷ್ಟ ದಿಕ್ಕು ತೋರಿಸಿದೆ ಎಂಬ ಅಭಿಪ್ರಾಯ ವ್ಯಕ್ತವಾಗಿದೆ.
