PM Kusum: ರೈತರಿಗೆ ಕೇಂದ್ರದಿಂದ ಭರ್ಜರಿ ಸಿಹಿ ಸುದ್ದಿ, ಮತ್ತೊಂದು ಹೊಸ ಯೋಜನೆ ಘೋಷಣೆ
ಫೆಬ್ರವರಿ 1ರಂದು ಮಂಡನೆಯಾಗುವ ಕೇಂದ್ರ ಬಜೆಟ್‌ನಲ್ಲಿ ರೈತರಿಗೆ ಅನುಕೂಲವಾಗುವಂತೆ ಪಿಎಂ ಕುಸುಮ್ 2.0 ಯೋಜನೆ ಘೋಷಣೆಯಾಗುವ ಸಾಧ್ಯತೆ ಇದೆ. ಸೌರಶಕ್ತಿ, ಕಡಿಮೆ ವೆಚ್ಚ, ಹೆಚ್ಚುವರಿ ಆದಾಯವೇ ಮುಖ್ಯ ಉದ್ದೇಶ.
- ಪಿಎಂ ಕುಸುಮ್ 2.0 ಮೂಲಕ ರೈತರಿಗೆ ಸೌರಶಕ್ತಿ ಲಾಭ
- ಸೌರ ಪಂಪ್ ಹಾಗೂ ವಿದ್ಯುತ್ ಕಡಿಮೆ ದರದಲ್ಲಿ ಲಭ್ಯ
- ಆದಾಯ ಹೆಚ್ಚಿಸಿ ಡೀಸೆಲ್ ಅವಲಂಬನೆ ಕಡಿಮೆ ಗುರಿ
ಕೇಂದ್ರ ಸರ್ಕಾರ ಫೆಬ್ರವರಿ 1ರಂದು ಮಂಡಿಸಲಿರುವ ಬಜೆಟ್ (Union Budget) ಮೇಲೆ ದೇಶದಾದ್ಯಂತ ಕುತೂಹಲ ಹೆಚ್ಚಾಗಿದೆ. ಆರ್ಥಿಕ ಸಚಿವೆ ನಿರ್ಮಲಾ ಸೀತಾರಾಮನ್ ಮಂಡಿಸುವ ಈ ಬಜೆಟ್‌ನಲ್ಲಿ ರೈತ ಸಮುದಾಯಕ್ಕೆ ನೇರವಾಗಿ ಲಾಭವಾಗುವ ಘೋಷಣೆಗಳು ಇರಲಿವೆ ಎಂಬ ನಿರೀಕ್ಷೆ ಗಟ್ಟಿಯಾಗಿದೆ. ವಿಶೇಷವಾಗಿ ಕೃಷಿ ಕ್ಷೇತ್ರಕ್ಕೆ ಶಾಶ್ವತ ಪರಿಹಾರ ನೀಡುವ ಯೋಜನೆಗಳಿಗೆ ಆದ್ಯತೆ ನೀಡಲಾಗುತ್ತಿದೆ.
ಪಿಎಂ ಕುಸುಮ್ 2.0ಗೆ ಬಜೆಟ್ ಸಿದ್ಧತೆ
ಈಗಾಗಲೇ ಜಾರಿಯಲ್ಲಿರುವ ಪ್ರಧಾನಮಂತ್ರಿ ಕುಸುಮ್ ಯೋಜನೆಯ ಮುಂದುವರಿದ ರೂಪವಾಗಿ ‘ಪಿಎಂ ಕುಸುಮ್ 2.0’ (PM KUSUM 2.0) ಅನ್ನು ಪರಿಚಯಿಸುವ ಸಾಧ್ಯತೆ ಇದೆ. ಈ ಯೋಜನೆಯ ಮೂಲಕ ರೈತರಿಗೆ ಅಗ್ಗದ ದರದಲ್ಲಿ ಸೌರ ವಿದ್ಯುತ್ (Solar Energy), ಸೌರ ಪಂಪ್‌ಗಳು (Solar Pump) ಹಾಗೂ ಶುದ್ಧ ಇಂಧನ ಲಭ್ಯವಾಗಲಿದೆ. ಕೃಷಿ ಚಟುವಟಿಕೆಗಳಿಗೆ ವಿದ್ಯುತ್ ಸಮಸ್ಯೆ ಶಾಶ್ವತವಾಗಿ ಪರಿಹಾರವಾಗಲಿ ಎಂಬುದೇ ಇದರ ಉದ್ದೇಶ.
ಡೀಸೆಲ್‌ಗೆ ಬ್ರೇಕ್, ಪರಿಸರಕ್ಕೆ ರಕ್ಷಣೆ
ಸೌರಶಕ್ತಿಯ ಬಳಕೆಯಿಂದ ರೈತರು ಡೀಸೆಲ್ ಅವಲಂಬನೆಯನ್ನು ಕಡಿಮೆ ಮಾಡಿಕೊಳ್ಳಬಹುದು. ಇದರಿಂದ ವೆಚ್ಚವೂ ಇಳಿಯುತ್ತದೆ, ಪರಿಸರವೂ ರಕ್ಷಿತವಾಗುತ್ತದೆ. ಗ್ರಾಮೀಣ ಪ್ರದೇಶಗಳಲ್ಲಿ ಸೌರ ವಿದ್ಯುತ್ ಬಳಕೆ ಹೆಚ್ಚಿಸುವ ಮೂಲಕ ಕೃಷಿ ಉತ್ಪಾದನೆಗೂ ಉತ್ತೇಜನ ಸಿಗಲಿದೆ.
ಹೊಸ ಯೋಜನೆ, ಹೊಸ ಹೂಡಿಕೆ
ಪ್ರಸ್ತುತ ಪಿಎಂ ಕುಸುಮ್ ಯೋಜನೆಯ ಅವಧಿ ಮಾರ್ಚ್ 2026ಕ್ಕೆ ಮುಕ್ತಾಯವಾಗಲಿದೆ. ಈ ಹಿನ್ನೆಲೆಯಲ್ಲಿ ಹೊಸ ರೂಪದಲ್ಲಿ 2.0 ಯೋಜನೆ ತರಲು ಇಂಧನ ಸಚಿವಾಲಯವು ಹಣಕಾಸು ಸಚಿವಾಲಯಕ್ಕೆ ಪ್ರಸ್ತಾವನೆ ಸಲ್ಲಿಸಿದೆ ಎನ್ನಲಾಗಿದೆ. ಈ ಯೋಜನೆಗೆ ಸುಮಾರು 50 ಸಾವಿರ ಕೋಟಿ ರೂಪಾಯಿ ವರೆಗೆ ಅನುದಾನ ಮೀಸಲಿಡುವ ಸಾಧ್ಯತೆ ಇದೆ ಎಂದು ಮೂಲಗಳು ತಿಳಿಸಿವೆ.
ರೈತರಿಗೆ ಎರಡು ಪ್ರಮುಖ ಪ್ರಯೋಜನ
ಪಿಎಂ ಕುಸುಮ್ 2.0 ಯೋಜನೆಯಲ್ಲಿ ಬ್ಯಾಟರಿ ಸಂಗ್ರಹ ತಂತ್ರಜ್ಞಾನಕ್ಕೂ ಮಹತ್ವ ನೀಡಲಾಗುತ್ತಿದೆ. ಇದರಿಂದ ರೈತರಿಗೆ ಹಗಲು ಮಾತ್ರವಲ್ಲದೆ ರಾತ್ರಿ ವೇಳೆಯಲ್ಲೂ ವಿದ್ಯುತ್ ಲಭ್ಯವಾಗಲಿದೆ. ಜೊತೆಗೆ ನೀರಾವರಿ ವ್ಯವಸ್ಥೆ ಸುಧಾರಣೆಯಾಗಿ ಕೃಷಿ ಉತ್ಪಾದನೆ ಹೆಚ್ಚಾಗುವ ನಿರೀಕ್ಷೆ ಇದೆ.
