ಭೀಕರ ಕೊಲೆ.. ಕತ್ತರಿಯಿಂದ ಯುವತಿಯ ಗಂಟಲಿಗೆ ಇರಿದು ಹತ್ಯೆ! ಆರೋಪಿ ಅರೆಸ್ಟ್

ಗುರುಗ್ರಾಮ್: ಕೆಲಸದ ವಿಚಾರದಲ್ಲಿ ಆರಂಭವಾದ ಸಣ್ಣ ಮಾತಿನ ಚಕಮಕಿ ಕೊನೆಗೆ 25 ವರ್ಷದ ಯುವತಿಯೊಬ್ಬಳ ಸಾವಿನಲ್ಲಿ ಅಂತ್ಯಗೊಂಡಿದೆ. ಗುರುಗ್ರಾಮ್‌ನ ಸೆಕ್ಟರ್ 37ರ ಖಾಸಗಿ ಕಂಪನಿಯಲ್ಲಿ ಈ ಘಟನೆ ನಡೆದಿದ್ದು, ಸಹೋದ್ಯೋಗಿಯೊಬ್ಬರ ಮೇಲೆ ಯುವತಿಯ ಹತ್ಯೆ ಆರೋಪ ಕೇಳಿಬಂದಿದೆ.

ಮೃತ ಯುವತಿಯನ್ನು ಶಿವಾನಿ ಎಂದು ಗುರುತಿಸಲಾಗಿದೆ. ಇದೇ ವರ್ಷ ಜುಲೈ 13ರಂದು ಸೆಕ್ಟರ್ 37ರ NDR Auto Components Pvt Ltd ಕಂಪನಿಯಲ್ಲಿ ಅವರು ಕೆಲಸಕ್ಕೆ ಸೇರಿದ್ದರು. ಘಟನೆ ನಡೆದ ದಿನವೂ ಶಿವಾನಿ ಮತ್ತು 35 ವರ್ಷದ ಸಹೋದ್ಯೋಗಿ ಅಸ್ಲಾಂ ಮಿಯಾನ್ (Aslam Miyan) ಕರ್ತವ್ಯದಲ್ಲಿದ್ದರು.

ಕಂಪನಿಯಲ್ಲಿ ಶೀಟ್ ಕವರ್‌ಗಳನ್ನು ಕತ್ತರಿಸುವ ಕೆಲಸಕ್ಕೆ ಸಂಬಂಧಿಸಿದಂತೆ ಇಬ್ಬರ ನಡುವೆ ಮಾತಿನ ಚಕಮಕಿ ನಡೆದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಈ ವೇಳೆ ಶಿವಾನಿ ಅಸ್ಲಾಂಗೆ ಕಪಾಳಮೋಕ್ಷ ಮಾಡಿದ್ದಾಗಿ ತನಿಖೆಯಲ್ಲಿ ತಿಳಿದುಬಂದಿದೆ. ಇದರಿಂದ ಕೋಪಗೊಂಡ ಅಸ್ಲಾಂ ಕತ್ತರಿಯಿಂದ ಶಿವಾನಿ ಮೇಲೆ ದಾಳಿ ನಡೆಸಿದ್ದಾನೆ ಎಂದು ಪೊಲೀಸರು ಆರೋಪಿಸಿದ್ದಾರೆ.

ದಾಳಿಯಲ್ಲಿ ಗಂಭೀರವಾಗಿ ಗಾಯಗೊಂಡ ಶಿವಾನಿಯನ್ನು ಕೂಡಲೇ ಪಟೌಡೀ ರಸ್ತೆಯ ಕದೀಪುರದಲ್ಲಿರುವ ವೈದಿಕ್ ಆಸ್ಪತ್ರೆಗೆ (Hospital) ದಾಖಲಿಸಲಾಯಿತು. ಆದರೆ ಚಿಕಿತ್ಸೆ ಫಲಕಾರಿಯಾಗದೆ ಅವರು ಮೃತಪಟ್ಟಿದ್ದಾರೆ.

ಘಟನೆಯ ಮಾಹಿತಿ ಸಿಗುತ್ತಿದ್ದಂತೆ ಪೊಲೀಸರು ಆಸ್ಪತ್ರೆಗೆ ತೆರಳಿ ಮಾಹಿತಿ ಕಲೆಹಾಕಿದರು. ಬಳಿಕ ಮೃತದೇಹವನ್ನು ಮರಣೋತ್ತರ ಪರೀಕ್ಷೆ (Postmortem)ಗಾಗಿ ಗುರುಗ್ರಾಮ್‌ನ ಮಾರ್ಚುರಿಗೆ ಕಳುಹಿಸಲಾಯಿತು. ಕಂಪನಿ ಆವರಣದಲ್ಲಿಯೂ ಕ್ರೈಂ ತಂಡ ಮತ್ತು ಬೆರಳಚ್ಚು ತಜ್ಞರು ಪರಿಶೀಲನೆ ನಡೆಸಿದರು.

ತನಿಖೆಯ ಭಾಗವಾಗಿ ಪೊಲೀಸರು ಕಂಪನಿಯ ಸಿಸಿಟಿವಿ ದೃಶ್ಯಾವಳಿಗಳನ್ನು (CCTV Footage) ಪರಿಶೀಲಿಸುತ್ತಿದ್ದಾರೆ. ಘಟನೆಗೆ ಸಂಬಂಧಿಸಿದ ಇತರೆ ಸಾಕ್ಷ್ಯಗಳನ್ನೂ ಸಂಗ್ರಹಿಸಲಾಗಿದ್ದು, ಫೋರೆನ್ಸಿಕ್ (Forensic) ತಂಡದ ನೆರವಿನಿಂದ ತನಿಖೆ ಮುಂದುವರಿದಿದೆ.

ಇತ್ತ ಶಿವಾನಿಯ ತಂದೆ ಭಾನುವಾರ ಪೊಲೀಸರಿಗೆ ದೂರು ನೀಡಿದ್ದಾರೆ. ಕಂಪನಿಯಲ್ಲಿ ಅಸ್ಲಾಂ ಜೊತೆ ನಡೆದ ಜಗಳದ ವೇಳೆ ತಮ್ಮ ಮಗಳಿಗೆ ಗಾಯವಾಗಿದ್ದು, ನಂತರ ಚಿಕಿತ್ಸೆ ಪಡೆಯುತ್ತಿದ್ದಾಗ ಮೃತಪಟ್ಟಿದ್ದಾರೆ ಎಂದು ದೂರಿನಲ್ಲಿ ತಿಳಿಸಿದ್ದಾರೆ. ಈ ಹಿನ್ನೆಲೆಯಲ್ಲಿ ಸೆಕ್ಟರ್ 37 ಪೊಲೀಸ್ ಠಾಣೆಯಲ್ಲಿ ಕೊಲೆ ಪ್ರಕರಣ (Murder Case) ದಾಖಲಿಸಲಾಗಿದೆ.

ದೂರಿನ ಆಧಾರದ ಮೇಲೆ ತನಿಖೆ ಚುರುಕುಗೊಳಿಸಿದ ಪೊಲೀಸರು ಅಸ್ಲಾಂ ಮಿಯಾನ್‌ನನ್ನು ಭಾನುವಾರ ಸೆಕ್ಟರ್ 37ರಲ್ಲಿ ಬಂಧಿಸಿದ್ದಾರೆ. ಆತ ಬಿಹಾರದ ಪೂರ್ವ ಚಂಪಾರಣ್ ಜಿಲ್ಲೆಯವನು ಎಂದು ಪೊಲೀಸರು ತಿಳಿಸಿದ್ದಾರೆ.

ಆರೋಪಿಯ ಮಾಹಿತಿ ಆಧರಿಸಿ ಘಟನೆಗೆ ಬಳಸಲಾಗಿದೆ ಎಂದು ಶಂಕಿಸಲಾದ ಕತ್ತರಿಯನ್ನೂ ಪೊಲೀಸರು ವಶಕ್ಕೆ ಪಡೆದಿದ್ದಾರೆ. ಕೆಲಸದ ವಿಚಾರದಲ್ಲಿನ ವಿವಾದವೇ ಜಗಳಕ್ಕೆ ಕಾರಣವಾಯಿತು ಎಂದು ವಿಚಾರಣೆ ವೇಳೆ ಅಸ್ಲಾಂ ತಿಳಿಸಿದ್ದಾನೆ ಎಂದು ಪೊಲೀಸರು ಹೇಳಿದ್ದಾರೆ.

ಆದರೆ ಘಟನೆಗೆ ನಿಖರವಾಗಿ ಕಾರಣವೇನು, ಜಗಳ ಯಾವ ರೀತಿಯಲ್ಲಿ ವಿಕೋಪಕ್ಕೆ ತಿರುಗಿತು ಎಂಬುದನ್ನು ಖಚಿತಪಡಿಸಿಕೊಳ್ಳಲು ಸಿಸಿಟಿವಿ ದೃಶ್ಯಗಳು, ಫೋರೆನ್ಸಿಕ್ ಸಾಕ್ಷ್ಯಗಳು ಹಾಗೂ ಇತರ ಮಾಹಿತಿಗಳನ್ನು ಪೊಲೀಸರು ಪರಿಶೀಲಿಸುತ್ತಿದ್ದಾರೆ. ಪ್ರಕರಣದ ಮುಂದಿನ ತನಿಖೆ ಮುಂದುವರಿದಿದೆ.

English Summary▼

A 25-year-old woman named Shivani died after an alleged attack by her 35-year-old co-worker following a workplace dispute at a private company in Gurugram’s Sector 37.

Police have arrested the accused, Aslam Miyan, and recovered the suspected weapon. CCTV footage, forensic evidence and other material are being examined as the investigation continues.