Karnataka AQI: ಬೆಂಗಳೂರು ಗಾಳಿಯ ಗುಣಮಟ್ಟ ಕುಸಿತ; ಮಂಗಳೂರು-ಬಳ್ಳಾರಿ ಇನ್ನೂ ಗಂಭೀರ

• ಬೆಂಗಳೂರು ಗಾಳಿಯ ಗುಣಮಟ್ಟ ಕುಸಿತ
• AQI 157, ಇನ್ನೂ ಅನಾರೋಗ್ಯಕರ ಮಟ್ಟ
• ಮಂಗಳೂರು-ಬಳ್ಳಾರಿ ಬೆಂಗಳೂರಿಗಿಂತ ಆತಂಕಕಾರಿ

ಬೆಂಗಳೂರು (Bengaluru): ಇತ್ತೀಚಿನ ದಿನಗಳಲ್ಲಿ ಕರ್ನಾಟಕ ರಾಜ್ಯದ ಬಹುತೇಕ ನಗರಗಳಲ್ಲಿ ವಾಯು ಗುಣಮಟ್ಟ (Karnataka Air Quality) ನಿರಂತರವಾಗಿ ಕುಸಿಯುತ್ತಿದೆ.

ವಿಶೇಷವಾಗಿ ಬೆಂಗಳೂರು AQI ಅಂಕೆಗಳಲ್ಲಿ ಏರುಪೇರು ಕಂಡರೂ, ಒಟ್ಟಾರೆ ಗಾಳಿ ಇನ್ನೂ ಆರೋಗ್ಯಕ್ಕೆ ಹಾನಿಕರ ಮಟ್ಟದಲ್ಲೇ ಉಳಿದಿದೆ. ಕೆಲ ದಿನಗಳ ಹಿಂದೆ 200ರ ಗಡಿ ದಾಟಿದ್ದ ಗಾಳಿಯ ಗುಣಮಟ್ಟ, ಇಂದು 157ಕ್ಕೆ ಇಳಿದಿದೆ.

ಆದರೆ ಪರಿಸ್ಥಿತಿ ಇಷ್ಟಕ್ಕೆ ನಿಲ್ಲದೆ, ಮಂಗಳೂರು ಮತ್ತು ಬಳ್ಳಾರಿ ನಗರಗಳು ಬೆಂಗಳೂರಿಗಿಂತಲೂ ಕಳಪೆ ಗಾಳಿಯನ್ನು ಎದುರಿಸುತ್ತಿವೆ. ಈ ಬೆಳವಣಿಗೆ ನಗರ ನಿವಾಸಿಗಳಲ್ಲಿ ಆತಂಕವನ್ನು ಹೆಚ್ಚಿಸಿದೆ.

ಮಂಗಳೂರು–ಬಳ್ಳಾರಿಯಲ್ಲಿ ಇನ್ನೂ ಗಂಭೀರ ಸ್ಥಿತಿ

ಮಂಗಳೂರಿನಲ್ಲಿ ಇಂದು AQI 177ಕ್ಕೆ ಏರಿಕೆಯಾಗಿದೆ. ಬಳ್ಳಾರಿಯಲ್ಲಿ ಗಾಳಿಯ ಗುಣಮಟ್ಟ 170 ಮಟ್ಟ ತಲುಪಿದ್ದು, ಇದು ‘ಅನಾರೋಗ್ಯಕರ’ ವರ್ಗಕ್ಕೆ ಸೇರುತ್ತದೆ. ಈ ರೀತಿಯ ಸ್ಥಿತಿ ಮುಂದುವರಿದರೆ, ಮುಂದಿನ ದಿನಗಳಲ್ಲಿ ದೆಹಲಿಯಂತಹ ಗಂಭೀರ ವಾಯು ಮಾಲಿನ್ಯ ಪರಿಸ್ಥಿತಿ ಎದುರಾಗುವ ಸಾಧ್ಯತೆ ಇದೆ ಎಂದು ತಜ್ಞರು ಎಚ್ಚರಿಸುತ್ತಿದ್ದಾರೆ.

ಇದೇ ವೇಳೆ ಬೆಂಗಳೂರಿನ AQI 157ರಲ್ಲೇ ನಿಂತಿದ್ದು, ಅಂಕೆಗಳಲ್ಲಿ ಸ್ವಲ್ಪ ಇಳಿಕೆ ಕಂಡರೂ ವಿಶ್ವ ಆರೋಗ್ಯ ಸಂಸ್ಥೆಯ (WHO) ಮಾನದಂಡಗಳ ಪ್ರಕಾರ ಇದು ಇನ್ನೂ ಸುರಕ್ಷಿತವಲ್ಲ.

ಇದನ್ನೂ ಓದಿ: ಕರ್ನಾಟಕ ರಾಜ್ಯಾದ್ಯಂತ ಒಣಹವೆ, ಬೆಂಗಳೂರು ನಗರದಲ್ಲಿ ಮಂಜು ಕವಿದ ವಾತಾವರಣ

PM2.5, PM10 ಕಣಗಳಿಂದ ಆರೋಗ್ಯಕ್ಕೆ ಅಪಾಯ

ಗಾಳಿಯಲ್ಲಿ ಇರುವ PM2.5 ಮತ್ತು PM10 ಎಂಬ ಅತಿ ಸೂಕ್ಷ್ಮ ಧೂಳಿನ ಕಣಗಳೇ ಮುಖ್ಯ ಸಮಸ್ಯೆಯಾಗಿದೆ. PM2.5 ಕಣಗಳು ಮಾನವನ ಕೂದಲಿನ ದಪ್ಪದ ಕೇವಲ 3 ಶೇಕಡಾ ಮಾತ್ರ ಇರುವಷ್ಟು ಸೂಕ್ಷ್ಮವಾಗಿದ್ದು, ಉಸಿರಾಟದ ಮೂಲಕ ನೇರವಾಗಿ ಶ್ವಾಸಕೋಶದೊಳಗೆ ಪ್ರವೇಶಿಸಿ ರಕ್ತ ಪ್ರವಾಹಕ್ಕೂ ಸೇರುತ್ತವೆ.

ಇಂದಿನ ಅಂಕಿಅಂಶಗಳ ಪ್ರಕಾರ PM2.5 ಪ್ರಮಾಣ 84 ಆಗಿದ್ದು, PM10 ಮಟ್ಟ 109ಕ್ಕೆ ಏರಿಕೆಯಾಗಿದೆ. ಈ ಕಣಗಳು ಶ್ವಾಸಕೋಶದ ಕ್ಯಾನ್ಸರ್, ಅಸ್ತಮಾ, ಹೃದಯ ಸಂಬಂಧಿ ಕಾಯಿಲೆಗಳ ಅಪಾಯವನ್ನು ಹೆಚ್ಚಿಸುತ್ತವೆ ಎಂದು ಆರೋಗ್ಯ ತಜ್ಞರು ಎಚ್ಚರಿಸಿದ್ದಾರೆ.

ಯಾರ್ಯಾರು ಹೆಚ್ಚು ಎಚ್ಚರಿಕೆ ವಹಿಸಬೇಕು?

ಮಕ್ಕಳು, ವೃದ್ಧರು ಹಾಗೂ ಉಸಿರಾಟ ಸಮಸ್ಯೆ ಇರುವವರು ಹೊರಗೆ ಹೋಗುವಾಗ ಹೆಚ್ಚಿನ ಎಚ್ಚರಿಕೆ ಅಗತ್ಯ. ಮಾಸ್ಕ್ ಬಳಕೆ, ವಾಹನ ಬಳಕೆಯನ್ನು ಸಾಧ್ಯವಾದಷ್ಟು ಕಡಿಮೆ ಮಾಡುವುದು ಹಾಗೂ ಹಸಿರು ಪ್ರದೇಶಗಳನ್ನು ಹೆಚ್ಚಿಸುವುದು ನಗರಗಳಿಗೆ ಈಗ ಅನಿವಾರ್ಯವಾಗಿದೆ ಎಂದು ತಜ್ಞರು ಸಲಹೆ ನೀಡಿದ್ದಾರೆ.