ಚಿತ್ರದುರ್ಗ ಬಸ್ ಬೆಂಕಿ ಅವಘಡ! ಅಪಘಾತಕ್ಕೆ ಕಾರಣ ಏನು? ಅಪಘಾತ ನಡೆದಿದ್ದು ಹೇಗೆ?
ಚಿತ್ರದುರ್ಗ ಜಿಲ್ಲೆ ಹಿರಿಯೂರು ಸಮೀಪ ಹೆದ್ದಾರಿಯಲ್ಲಿ ಖಾಸಗಿ ಟ್ರಾವೆಲ್ಸ್ ಬಸ್ ಟ್ರಕ್ ಡಿಕ್ಕಿಯಿಂದ ಬೆಂಕಿಗಾಹುತಿಯಾಗಿ ಪ್ರಯಾಣಿಕರು ಸಜೀವ ದಹನಗೊಂಡು ಹಲವರು ಗಂಭೀರ ಗಾಯಗೊಂಡ ಭೀಕರ ದುರಂತ ಸಂಭವಿಸಿದೆ
- ಚಿತ್ರದುರ್ಗ ಬಸ್ ದುರಂತದಲ್ಲಿ ಸಜೀವ ದಹನ
- ಟ್ರಕ್ ಡಿಕ್ಕಿಯಿಂದ ಹೊತ್ತಿ ಉರಿದ ಖಾಸಗಿ ಬಸ್
- ಸುಟ್ಟು ಕರಕಲಾದ ದೇಹಗಳ ಗುರುತು ಪತ್ತೆ ಸವಾಲು
ಚಿತ್ರದುರ್ಗ (ಡಿ.25): ನಸುಕಿನ ವೇಳೆ ಭೀಕರ ದುರಂತವೊಂದು ಚಿತ್ರದುರ್ಗ ಜಿಲ್ಲೆಯಲ್ಲಿ ನಡೆದಿದೆ (Chitradurga Accident). ಹಿರಿಯೂರು ಸಮೀಪದ ಹೆದ್ದಾರಿಯಲ್ಲಿ ಕ್ಷಣಾರ್ಧದಲ್ಲೇ ಬಸ್‌ಗೆ ಬೆಂಕಿ (Bus Fire Tragedy) ಹೊತ್ತಿಕೊಂಡಿದೆ.
ಡಿಕ್ಕಿಯ ಹೊಡೆತ ಡೀಸೆಲ್ ಟ್ಯಾಂಕ್ ಭಾಗಕ್ಕೆ ತಗುಲಿದ ಕಾರಣ ಬೆಂಕಿ ಅಟ್ಟಹಾಸವಾಗಿ ವ್ಯಾಪಿಸಿದ್ದು, ಬಸ್ ಹಾಗೂ ಟ್ರಕ್ ಎರಡೂ ಸಂಪೂರ್ಣವಾಗಿ ಸುಟ್ಟು ಭಸ್ಮವಾಗಿವೆ. ಗಾಢ ನಿದ್ರೆಯಲ್ಲಿದ್ದ ಪ್ರಯಾಣಿಕರಲ್ಲಿ ಕನಿಷ್ಠ 13ಕ್ಕೂ ಹೆಚ್ಚು ಮಂದಿ ಸಜೀವ ದಹನಗೊಂಡಿದ್ದು, ಸ್ಥಳದಲ್ಲಿ ಕರುಳು ಕಿತ್ತುಹೋಗುವ ದೃಶ್ಯಗಳು ಕಂಡುಬಂದಿವೆ.
ಅಪಘಾತ ಹೇಗೆ ನಡೆಯಿತು?:
ಪ್ರತ್ಯಕ್ಷ ಸಾಕ್ಷಿಗಳು ಹಾಗೂ ಗಾಯಾಳುಗಳ ಹೇಳಿಕೆ ಪ್ರಕಾರ, ಟ್ರಕ್ ಒಂದು ತಾಂತ್ರಿಕ ದೋಷದಿಂದ ರಸ್ತೆಬದಿಯಲ್ಲಿ ನಿಂತಿತ್ತು. ಹಿಂದಿನಿಂದ ಬರುತ್ತಿದ್ದ ವಾಹನಗಳಿಗೆ ಸೂಚನೆ ನೀಡಲು ಚಾಲಕ ಪ್ರಯತ್ನಿಸುತ್ತಿದ್ದಾಗಲೇ, ಅತಿವೇಗದಲ್ಲಿ ಬಂದ ಬಸ್ ನಿಯಂತ್ರಣ ತಪ್ಪಿ ಟ್ರಕ್‌ಗೆ ಡಿಕ್ಕಿ ಹೊಡೆದಿದೆ.
Horrible accident Near Hiriyur along Bengaluru Hubballi highway, sleeper bus caught fire, 30+ feared dead! .#Busfire #chitradurga #karnataka pic.twitter.com/Fdpe5Tg999
— Naik Kartik (@mekartiknaik) December 24, 2025
ಜೀವ ಉಳಿಸಿಕೊಂಡವರು
ಬೆಂಕಿಯ ನಡುವೆ ಒಬ್ಬ ಯುವಕ ಧೈರ್ಯ ತೋರಿ ಬಸ್ ಕಿಟಕಿಗಳನ್ನು ಒಡೆದು ಕೆಲ ಪ್ರಯಾಣಿಕರನ್ನು ಹೊರತೆಗೆದಿದ್ದಾನೆ. ಈ ಸಾಹಸದಿಂದ 9 ಮಂದಿ ಪ್ರಾಣ ಉಳಿಸಿಕೊಂಡಿದ್ದಾರೆ. ಗಾಯಗೊಂಡವರನ್ನು ಸಿರಾ, ಹಿರಿಯೂರು ಹಾಗೂ ಚಿತ್ರದುರ್ಗದ ಸರ್ಕಾರಿ ಆಸ್ಪತ್ರೆಗಳಿಗೆ ದಾಖಲಿಸಲಾಗಿದೆ. ಕೆಲವರ ಸ್ಥಿತಿ ಇನ್ನೂ ಗಂಭೀರವಾಗಿದೆ.
ರಕ್ಷಣಾ ಕಾರ್ಯಾಚರಣೆ ಮತ್ತು ಸಂಚಾರ ಅಸ್ತವ್ಯಸ್ತ:
ಮಾಹಿತಿ ತಿಳಿದ ತಕ್ಷಣ ಅಗ್ನಿಶಾಮಕ ದಳ ಸ್ಥಳಕ್ಕೆ ಆಗಮಿಸಿ ಬೆಂಕಿ ನಂದಿಸಿದೆ. ಮೃತದೇಹಗಳು ಸಂಪೂರ್ಣವಾಗಿ ಸುಟ್ಟು ಕರಕಲಾಗಿರುವುದರಿಂದ ಗುರುತು ಪತ್ತೆ ಕಷ್ಟಕರವಾಗಿದೆ. ಘಟನೆ ಹಿನ್ನೆಲೆಯಲ್ಲಿ ಹೆದ್ದಾರಿಯಲ್ಲಿ ಭಾರೀ ಟ್ರಾಫಿಕ್ ಜಾಮ್ ಉಂಟಾಗಿ, ಪೊಲೀಸರು ಸಂಚಾರ ಪುನಃಸ್ಥಾಪನೆಗೆ ಕ್ರಮ ಕೈಗೊಂಡಿದ್ದಾರೆ.
