Karnataka Weather: ಕರ್ನಾಟಕ ಹವಾಮಾನ; ರಾಜ್ಯದಲ್ಲಿ ಚಳಿ ಜೋರಾಗಿದೆ, ಬೆಂಗಳೂರು ತಾಪಮಾನ ಏಕಾಏಕಿ ಇಳಿಕೆ
Karnataka Weather: ಕಳೆದ ಕೆಲವು ದಿನಗಳ ವಿರಾಮದ ಬಳಿಕ ರಾಜ್ಯಾದ್ಯಂತ ಮತ್ತೆ ಚಳಿ ತೀವ್ರಗೊಂಡಿದ್ದು, ಬೆಂಗಳೂರಿನಲ್ಲಿ ಮಂಜು ವಾತಾವರಣ ಕಂಡುಬಂದಿದೆ. ಉತ್ತರ ಹಾಗೂ ದಕ್ಷಿಣ ಒಳನಾಡಿನಲ್ಲಿ ಶುಷ್ಕ ಹವಾಮಾನ ಮುಂದುವರಿಯಲಿದೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ.
- ಕರ್ನಾಟಕ ಹವಾಮಾನ, ಚಳಿ ಮತ್ತೆ ಹೆಚ್ಚಳ
- ಬೆಂಗಳೂರು ತಾಪಮಾನ ಧಿಡೀರ್ ಕುಸಿತ
- ರಾಜ್ಯಾದ್ಯಂತ ಮಳೆಯ ಸಾಧ್ಯತೆ ಇಲ್ಲ
ಬೆಂಗಳೂರು (Bengaluru): ಕಳೆದ ವಾರ ಸ್ವಲ್ಪ ತಗ್ಗಿದ್ದ ಚಳಿ, ಈ ವಾರ ಮತ್ತೆ ರಾಜ್ಯದ ಹಲವು ಜಿಲ್ಲೆಗಳಲ್ಲಿ (Karnataka Weather) ತೀವ್ರವಾಗಿ ಅನುಭವವಾಗುತ್ತಿದೆ. ಬೆಳಗ್ಗಿನ ಜಾವ ಮತ್ತು ರಾತ್ರಿ ಸಮಯದಲ್ಲಿ ತಾಪಮಾನ ಏಕಾಏಕಿ ಇಳಿಕೆಯಾಗುತ್ತಿದ್ದು, ಚಳಿಗಾಳಿ (Cold Wave) ಜನರ ದಿನಚರಿಯನ್ನೇ ಬದಲಾಯಿಸುತ್ತಿದೆ.
ಬೆಂಗಳೂರಿನಲ್ಲಿ ಮಂಜು ವಾತಾವರಣ
ರಾಜಧಾನಿ ಬೆಂಗಳೂರಿನಲ್ಲಿ ಇಂದು ಮಂಜು ಕವಿದ (Bengaluru Dense Fog) ವಾತಾವರಣ ಕಂಡುಬರುವ ಸಾಧ್ಯತೆ ಇದೆ. ಹವಾಮಾನ ಇಲಾಖೆಯ ಪ್ರಕಾರ, ನಗರದಲ್ಲಿ ಕನಿಷ್ಠ ತಾಪಮಾನವು ಇಳಿಯುವ ನಿರೀಕ್ಷೆ ಇದೆ. ಮಳೆಯ ಯಾವುದೇ ಮುನ್ಸೂಚನೆ ಇಲ್ಲದಿದ್ದರೂ, ಶೀತಗಾಳಿ ಮತ್ತು ಚಳಿ ಮುಂದುವರಿಯಲಿದೆ.
ಒಳನಾಡು ಜಿಲ್ಲೆಗಳಲ್ಲಿ ಒಣಗಾಳಿ
ಉತ್ತರ ಮತ್ತು ದಕ್ಷಿಣ ಒಳನಾಡಿನ ಬಹುತೇಕ ಜಿಲ್ಲೆಗಳಲ್ಲಿ ಶುಷ್ಕ ಹವಾಮಾನ ಮುಂದುವರಿದಿದೆ. ಬೆಳಗಾವಿ, ಬೀದರ್, ವಿಜಯಪುರ, ಬಾಗಲಕೋಟೆ, ಹಾವೇರಿ, ಗದಗ ಮತ್ತು ಧಾರವಾಡ ಭಾಗಗಳಲ್ಲಿ ಬಿಸಿಲಿನೊಂದಿಗೆ ಒಣಗಾಳಿ ಬೀಸುವ ಸಾಧ್ಯತೆ ಇದೆ. ಚಿಕ್ಕಬಳ್ಳಾಪುರ ಜಿಲ್ಲೆಯಲ್ಲಿ ತಾಪಮಾನ 13 ಡಿಗ್ರಿ ಸೆಲ್ಸಿಯಸ್‌ಗೆ ಇಳಿದಿದ್ದು, ಚಳಿ ಹೆಚ್ಚು ಕಾಡುತ್ತಿದೆ.
ಕರಾವಳಿಯಲ್ಲಿ ಮಳೆ ಇಲ್ಲ
ಕರಾವಳಿ ಕರ್ನಾಟಕದ ಉಡುಪಿ, ದಕ್ಷಿಣ ಕನ್ನಡ ಮತ್ತು ಉತ್ತರ ಕನ್ನಡ ಜಿಲ್ಲೆಗಳಲ್ಲಿ ಸದ್ಯ ಯಾವುದೇ ಚಂಡಮಾರುತ ಅಥವಾ ಮಳೆಯ ಸೂಚನೆ (Rain Update) ಇಲ್ಲ. ಮುಂದಿನ ಕೆಲವು ದಿನಗಳು ರಾಜ್ಯಾದ್ಯಂತ ಹವಾಮಾನ ಸಂಪೂರ್ಣವಾಗಿ ಒಣಗಿರಲಿದೆ ಎಂದು ಇಲಾಖೆ ತಿಳಿಸಿದೆ.
ಇಂದಿನ ಕರ್ನಾಟಕ ಹವಾಮಾನ ಸ್ಥಿತಿ
ಒಟ್ಟಿನಲ್ಲಿ, ಕರ್ನಾಟಕದ ಬಹುತೇಕ ಭಾಗಗಳಲ್ಲಿ ಚಳಿ ಮತ್ತು ಶುಷ್ಕ ವಾತಾವರಣವೇ ಪ್ರಧಾನವಾಗಿದ್ದು, ಬೆಳಿಗ್ಗೆ ಹಾಗೂ ಸಂಜೆ ವೇಳೆಗೆ ಮಂಜು ಹೆಚ್ಚಾಗುವ ಸಾಧ್ಯತೆ ಇದೆ. ಸಾರ್ವಜನಿಕರು ಚಳಿಯಿಂದ ಆರೋಗ್ಯ ಕಾಪಾಡಿಕೊಳ್ಳಲು ಎಚ್ಚರ ವಹಿಸುವಂತೆ ಸಲಹೆ ನೀಡಲಾಗಿದೆ.
