Karnataka Weather: ಕರ್ನಾಟಕ ಹವಾಮಾನ ಟ್ವಿಸ್ಟ್, ಬೆಂಗಳೂರು ಸೇರಿ ಫೆಬ್ರವರಿ 15ರಿಂದ ಬೆಂಕಿ ಬೇಸಿಗೆ ಆರಂಭ

• ಒಣಹವೆ–ಚಳಿ ವಾತಾವರಣ, ಮಳೆ ಸಾಧ್ಯತೆ ಕಡಿಮೆ
• ಫೆಬ್ರವರಿ 15 ಬಳಿಕ ತೀವ್ರ ಬೇಸಿಗೆ, 3–4°C ತಾಪಮಾನ ಏರಿಕೆ
• ಕರಾವಳಿ, ಉತ್ತರ ಕರ್ನಾಟಕಕ್ಕೆ ಶಾಖ ತರಂಗ ಎಚ್ಚರಿಕೆ

ಬೆಂಗಳೂರು (Bengaluru): ಕರ್ನಾಟಕ ಹವಾಮಾನದಲ್ಲಿ (Karnataka Weather) ಒಂದೇ ತಿಂಗಳಲ್ಲಿ ಎರಡು ತೀವ್ರ ಸ್ಥಿತಿಗಳು ಕಾಣಿಸಿಕೊಳ್ಳುತ್ತಿವೆ. ಈಗ ಬೆಳಗ್ಗೆ ಚಳಿ ಮತ್ತು ಒಣಗಾಳಿ ಜನರನ್ನು ಕಂಗೆಡಿಸುತ್ತಿದ್ದರೆ, ಇನ್ನೇನು ಕೆಲವೇ ದಿನಗಳಲ್ಲಿ ಬೇಸಿಗೆ ಉರಿಯ ತಾಪಮಾನ ಜನರನ್ನು ಕಾಡಲಿದೆ ಎಂದು ಹವಾಮಾನ ಇಲಾಖೆ ಮುನ್ನೆಚ್ಚರಿಕೆ ನೀಡಿದೆ.

ಬೆಂಗಳೂರು ಚಳಿ ಹೆಚ್ಚಳ

ರಾಜಧಾನಿ ಬೆಂಗಳೂರಿನಲ್ಲಿ ಬೆಳಗಿನ ಜಾವ ಮತ್ತು ರಾತ್ರಿ ವೇಳೆಯಲ್ಲಿ ಚಳಿ (Cold Wave) ಸ್ಪಷ್ಟವಾಗಿದೆ. ಕನಿಷ್ಠ ತಾಪಮಾನ 15°C ಸುತ್ತಮುತ್ತ ದಾಖಲಾಗುತ್ತಿದ್ದು, ಗರಿಷ್ಠ 27°C ಮಾತ್ರ ಇರಲಿದೆ. ಮಕ್ಕಳು, ವೃದ್ಧರು ಹಾಗೂ ಆರೋಗ್ಯ ಸಮಸ್ಯೆ ಇರುವವರು ಬೆಚ್ಚಗಿನ ಉಡುಪು ಧರಿಸಿ, ಬಿಸಿ ಆಹಾರ ಸೇವಿಸಬೇಕು ಎಂದು ವೈದ್ಯರು ಸಲಹೆ ನೀಡಿದ್ದಾರೆ.

ಕರ್ನಾಟಕ ರಾಜ್ಯವ್ಯಾಪಿ ಒಣಹವೆ

ಮೈಸೂರು, ಶಿವಮೊಗ್ಗ, ಹಾಸನ, ಕೊಡಗು, ತುಮಕೂರು, ಮಂಡ್ಯ, ಚಿಕ್ಕಬಳ್ಳಾಪುರ ಸೇರಿದಂತೆ ದಕ್ಷಿಣ ಒಳನಾಡಿನ ಹಲವು ಜಿಲ್ಲೆಗಳಲ್ಲಿ ಮಳೆ ಲಕ್ಷಣವೇ ಇಲ್ಲ. ಕರಾವಳಿಯ ಉಡುಪಿ, ದಕ್ಷಿಣ ಕನ್ನಡ, ಉತ್ತರ ಕನ್ನಡ ಜಿಲ್ಲೆಗಳಲ್ಲಿಯೂ ತೇವಾಂಶ ಕಡಿಮೆಯಾಗಿದ್ದು ಶುಷ್ಕ ಗಾಳಿ ಬೀಸುತ್ತಿದೆ. ಉತ್ತರ ಕರ್ನಾಟಕದ ಬೆಳಗಾವಿ, ವಿಜಯಪುರ, ಕಲಬುರಗಿ, ರಾಯಚೂರು ಭಾಗಗಳಲ್ಲಿಯೂ ಇದೇ ಪರಿಸ್ಥಿತಿ ಮುಂದುವರಿಯುತ್ತಿದೆ.

ಫೆಬ್ರವರಿ 15ರಿಂದ ಬೇಸಿಗೆ ಅಬ್ಬರ

ಇದಕ್ಕೂ ಮಧ್ಯೆ, ಫೆಬ್ರವರಿ 15ರಿಂದ ತಾಪಮಾನ ಹಂತ ಹಂತವಾಗಿ ಏರಿಕೆಯಾಗಲಿದೆ. ಸಾಮಾನ್ಯಕ್ಕಿಂತ 3 ರಿಂದ 4 ಡಿಗ್ರಿ ಸೆಲ್ಸಿಯಸ್ ಹೆಚ್ಚು ಬಿಸಿಯಾಗುವ ಸಾಧ್ಯತೆ ಇದೆ. ಕರಾವಳಿ ಮತ್ತು ಉತ್ತರ ಕರ್ನಾಟಕದಲ್ಲಿ ಬಿಸಿ ಹಾಗೂ ಆರ್ದ್ರತೆ ಹೆಚ್ಚಾಗಿ ಜನರಿಗೆ ತೊಂದರೆ ಉಂಟಾಗಬಹುದು.

ಕೆಲವು ಜಿಲ್ಲೆಗಳಲ್ಲಿ ತಾಪಮಾನ 37°C ಮೀರಿದರೆ ಶಾಖ ತರಂಗ (Heat Wave) ಪರಿಸ್ಥಿತಿ ನಿರ್ಮಾಣವಾಗಬಹುದು ಎಂದು ಹವಾಮಾನ ಇಲಾಖೆ ಈಗಾಗಲೇ ಎಚ್ಚರಿಕೆ ನೀಡಿದೆ. ರಾಯಚೂರು, ಬಳ್ಳಾರಿ, ಯಾದಗಿರಿ, ಕಲಬುರಗಿ ಭಾಗಗಳಲ್ಲಿ ತೀವ್ರ ಬಿಸಿ ಹೆಚ್ಚು ಕಾಣಿಸಿಕೊಳ್ಳುವ ಸಾಧ್ಯತೆ ಇದೆ.

ತಾಪಮಾನ ವ್ಯತ್ಯಾಸ ಹೆಚ್ಚಾಗುತ್ತಿರುವ ಹಿನ್ನೆಲೆ, ಬೆಳಗ್ಗೆ ಚಳಿಯಿಂದ ರಕ್ಷಿಸಿಕೊಳ್ಳುವಂತೆ ಹಾಗೂ ಮಧ್ಯಾಹ್ನ ಬಿಸಿಲಿನಿಂದ ದೂರವಿರುವಂತೆ ತಜ್ಞರು ಸಲಹೆ ನೀಡಿದ್ದಾರೆ. ನೀರು ಹೆಚ್ಚು ಕುಡಿಯುವುದು, ಹಗುರವಾದ ಆಹಾರ ಸೇವನೆ ಮತ್ತು ಹೊರಗಡೆ ಕೆಲಸ ಮಾಡುವವರು ಜಾಗರೂಕರಾಗಿರಬೇಕು.