ಕಾಂತಾರ ಸಿನಿಮಾ ನೋಡಲು ಹೋದ ಯುವಕರಿಬ್ಬರ ದುರಂತ ಅಂತ್ಯ!

ರಾಯಚೂರು ಜಿಲ್ಲೆಯ ಮಸ್ಕಿ ಪಟ್ಟಣದಲ್ಲಿ ನಡೆದ ಈ ದಾರುಣ ಘಟನೆ ಸ್ಥಳೀಯರಲ್ಲಿ ಆಘಾತ ಮೂಡಿಸಿದೆ. ಕಾಂತಾರ ಚಾಪ್ಟರ್ 1 ಸಿನಿಮಾ ನೋಡಲು ಹೋದ ಇಬ್ಬರು ಯುವಕರು ನೀರಿನಲ್ಲಿ ಜೀವ ಕಳೆದುಕೊಂಡಿದ್ದಾರೆ.

ಮುದಗಲ್‌ನ ನಿವಾಸಿಗಳಾದ ವೆಂಕಟೇಶ (28) ಹಾಗೂ ಯಲ್ಲಾಲಿಂಗ (28) ಶನಿವಾರ ಮಧ್ಯಾಹ್ನ ಮಸ್ಕಿಗೆ ಸಿನಿಮಾವನ್ನು ನೋಡಲು ಬಂದಿದ್ದರು. ಆದರೆ ಮಧ್ಯಾಹ್ನದ ಶೋಗೆ ಟಿಕೆಟ್ ಸಿಗದ ಕಾರಣ, ಅವರು ಸಮಯ ಕಳೆಯಲು ಹತ್ತಿರದ ನಾಲೆಯಲ್ಲಿ ಈಜಲು ನಿರ್ಧರಿಸಿದರು.

ಈಜು ಬಾರದ ಯಲ್ಲಾಲಿಂಗ ನೀರಿನ ಹರಿವಿನಲ್ಲಿ ಕೊಚ್ಚಿಹೋದಾಗ, ಆತನನ್ನು ರಕ್ಷಿಸಲು ಯತ್ನಿಸಿದ ವೆಂಕಟೇಶ ಕೂಡ ನೀರಿನಲ್ಲಿ ಮುಳುಗಿದ. ಇಬ್ಬರೂ ಹೊರಬರದೆ ನೀರುಪಾಲಾದರು ಎಂಬ ಮಾಹಿತಿ ದೊರೆತಿದೆ.

ಸಂಜೆಯ ವೇಳೆಗೆ ಸ್ಥಳೀಯರು ಮತ್ತು ಪೊಲೀಸರು ಶೋಧ ನಡೆಸಿ ಇಬ್ಬರ ಮೃತದೇಹಗಳನ್ನು ಸಿರವಾರದ ಬಳಿ ಪತ್ತೆ ಹಚ್ಚಿದರು. ಈ ಕುರಿತು ಮಸ್ಕಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಚಿತ್ರಮಂದಿರಕ್ಕೆ ಹೋದ ಉತ್ಸಾಹ, ಕೊನೆಗೆ ದುರಂತದಲ್ಲಿ ಅಂತ್ಯ ಕಂಡಿರುವ ಈ ಘಟನೆ ಕುಟುಂಬ ಹಾಗೂ ಸ್ನೇಹಿತರನ್ನು ದುಃಖದ ಮಡುಗಟ್ಟಿಸಿದೆ.

Tragic Death of Two Youths While Going to Watch Kantara Chapter 1