49 ಕೋಟಿ ಲಾಟರಿ ಗೆದ್ದ ಕನ್ನಡ ಯುವಕ! ವಿದೇಶದಲ್ಲಿ ಕರ್ನಾಟಕ ಯುವಕನಿಗೆ ಅದೃಷ್ಟದ ಜಾಕ್‌ಪಾಟ್
ಓಮನ್‌ನಲ್ಲಿ ಉದ್ಯೋಗದಲ್ಲಿರುವ ಉಡುಪಿಯ ಶಂತನು ಶೆಟ್ಟಿಗಾರ್ ಅಬುಧಾಬಿಯ ಬಿಗ್ ಟಿಕೆಟ್ ಡ್ರಾದಲ್ಲಿ 20 ಮಿಲಿಯನ್ ದಿರ್ಹಂ ಲಾಟರಿ ಗೆದ್ದು, ಸ್ನೇಹಿತನೊಂದಿಗೆ ಬಹುಮಾನ ಹಂಚಿಕೊಳ್ಳಲು ನಿರ್ಧರಿಸಿದ್ದಾರೆ
- ಅಬುಧಾಬಿ ಬಿಗ್ ಟಿಕೆಟ್ ಲಾಟರಿಯಲ್ಲಿ 49 ಕೋಟಿ ಗೆಲುವು
- ಉಡುಪಿ ಮೂಲದ ಯುವಕ ಶಂತನುಗೆ ಅದೃಷ್ಟದ ಜಾಕ್‌ಪಾಟ್
- ಸ್ನೇಹಿತನೊಂದಿಗೆ ಬಹುಮಾನ ಹಂಚಿಕೆ ನಿರ್ಧಾರ
ವಿದೇಶದಲ್ಲಿ ದುಡಿಯುತ್ತಿದ್ದ ಕನ್ನಡ ಯುವಕನ ಜೀವನ ಒಂದೇ ದಿನದಲ್ಲಿ ತಿರುವು ಪಡೆದಿದೆ. ಅಬುಧಾಬಿಯಲ್ಲಿ (Abu Dhabi) ನಡೆದ ಪ್ರತಿಷ್ಠಿತ ‘ಬಿಗ್ ಟಿಕೆಟ್’ ಲಕ್ಕಿ ಡ್ರಾದಲ್ಲಿ ಉಡುಪಿ ಮೂಲದ ಶಂತನು ಶೆಟ್ಟಿಗಾರ್ ಅವರಿಗೆ ಭರ್ಜರಿ 49 ಕೋಟಿ ರೂಪಾಯಿ ಲಾಟರಿ ದೊರೆತಿದೆ (Wins 49 Crore Lottery). ಈ ಸುದ್ದಿ ತಿಳಿದ ಕೂಡಲೇ ಅವರ ಕುಟುಂಬ ಹಾಗೂ ಊರಿನಲ್ಲಿ ಹರ್ಷದ ವಾತಾವರಣ ಕಂಡುಬಂದಿದೆ.
33 ವರ್ಷದ ಶಂತನು, ಓಮನ್‌ನಲ್ಲಿ ರಿಟೇಲ್ ಕ್ಷೇತ್ರದ ಸೇಲ್ಸ್ ವಿಭಾಗದಲ್ಲಿ ಕೆಲಸ ಮಾಡುತ್ತಿದ್ದರು. ಸಾಮಾನ್ಯ ಉದ್ಯೋಗ ಜೀವನ ನಡೆಸುತ್ತಿದ್ದ ಅವರು, ಜನವರಿ 20ರಂದು ಲಾಟರಿ ಟಿಕೆಟ್ ಖರೀದಿಸಿದ್ದರು. ಫೆಬ್ರವರಿ 3ರಂದು ನಡೆದ ಡ್ರಾದಲ್ಲಿ ಅವರ ಟಿಕೆಟ್ ಸಂಖ್ಯೆ ಅದೃಷ್ಟದ ಸಂಕೇತವಾಗಿ ಹೊರಹೊಮ್ಮಿತು.
ಸ್ನೇಹಿತನೊಂದಿಗೆ ಜಂಟಿ ಪ್ರಯತ್ನ
ಈ ಟಿಕೆಟ್‌ನ್ನು ಶಂತನು ತನ್ನ ಸ್ನೇಹಿತರೊಬ್ಬರೊಂದಿಗೆ ಸೇರಿ ಖರೀದಿಸಿದ್ದರು. ಹೀಗಾಗಿ ಬಂದ ಬಹುಮಾನ ಮೊತ್ತವನ್ನು ಇಬ್ಬರೂ ಸಮವಾಗಿ ಹಂಚಿಕೊಳ್ಳಲು ತೀರ್ಮಾನಿಸಿದ್ದಾರೆ. ತಲಾ ಸುಮಾರು 24.5 ಕೋಟಿ ರೂಪಾಯಿ ಪಾಲಾಗಲಿದೆ ಎಂದು ಶಂತನು ತಿಳಿಸಿದ್ದಾರೆ.
‘ಇದು ಸಂಪೂರ್ಣ ಅನಿರೀಕ್ಷಿತ ಗೆಲುವು. ಹಲವು ವರ್ಷಗಳಿಂದ ಟಿಕೆಟ್ ತೆಗೆದುಕೊಳ್ಳುತ್ತಿದ್ದೆ. ಕೊನೆಗೂ ಅದೃಷ್ಟ ಕರೆದಿದೆ’ ಎಂದು ಅವರು ಸಂತಸ ವ್ಯಕ್ತಪಡಿಸಿದ್ದಾರೆ. ಹಣವನ್ನು ಹೇಗೆ ಬಳಸಬೇಕು ಎಂಬುದನ್ನು ಇನ್ನೂ ನಿರ್ಧರಿಸಿಲ್ಲ ಎಂದೂ ಹೇಳಿದ್ದಾರೆ.
ಊರಲ್ಲಿ ಸಂಭ್ರಮ
ಶಂತನು ಅವರ ಗೆಲುವಿನ ಸುದ್ದಿ ಉದ್ಯಾವರ ಸೇರಿದಂತೆ ಸುತ್ತಮುತ್ತಲ ಪ್ರದೇಶಗಳಲ್ಲಿ ಸಂಭ್ರಮ ಮೂಡಿಸಿದೆ. ಸ್ನೇಹಿತರು, ಬಂಧುಗಳು ಮತ್ತು ಗ್ರಾಮಸ್ಥರು ಅಭಿನಂದನೆಗಳ ಸುರಿಮಳೆಯನ್ನೇ ಸುರಿಸಿದ್ದಾರೆ. ವಿದೇಶದಲ್ಲಿ ದುಡಿಯುವ ಕನ್ನಡಿಗರಿಗೆ ಈ ಸುದ್ದಿ ಮತ್ತಷ್ಟು ಪ್ರೇರಣೆ ನೀಡಿದೆ.
1992ರಲ್ಲಿ ಆರಂಭವಾದ ‘ಬಿಗ್ ಟಿಕೆಟ್’ ಲಾಟರಿ ಇಂದು ವಿಶ್ವದ ಗಮನ ಸೆಳೆಯುವ ಮಟ್ಟಕ್ಕೆ ಬೆಳೆದಿದ್ದು, ಇದೀಗ ಅದೃಷ್ಟ ಕರ್ನಾಟಕ ಯುವಕನನ್ನು ಹುಡುಕಿಕೊಂಡು ಬಂದಿದೆ.
