ಐ ಲವ್ ಯು, ಯು ಲವ್ ಮಿ ಅಂತ ಬೆಂಗಳೂರು ಪೊಲೀಸ್ ಇನ್ಸ್‌ಪೆಕ್ಟರ್‌ಗೆ ಮಹಿಳೆ ಕಿರುಕುಳ
ಬೆಂಗಳೂರು ರಾಮಮೂರ್ತಿನಗರ ಪೊಲೀಸ್ ಠಾಣೆಯ ಇನ್ಸ್‌ಪೆಕ್ಟರ್‌ಗೆ ಮಹಿಳೆಯೊಬ್ಬಳು ಪ್ರೇಮದ ಹೆಸರಿನಲ್ಲಿ ನಿರಂತರ ಕಿರುಕುಳ ನೀಡಿ, ಉದ್ಯೋಗ ಹಾಳು ಮಾಡುವುದಾಗಿ ಬೆದರಿಕೆ ಹಾಕಿದ ಪ್ರಕರಣ ರಾಜ್ಯಾದ್ಯಂತ ಚರ್ಚೆಗೆ ಕಾರಣವಾಗಿದೆ.
- ಬೆಂಗಳೂರು ರಾಮಮೂರ್ತಿನಗರ ಇನ್ಸ್‌ಪೆಕ್ಟರ್‌ಗೆ ಮಹಿಳೆ ಕಿರುಕುಳ
- ಪ್ರಭಾವಿ ನಾಯಕರ ಹೆಸರು ಹೇಳಿ ಬೆದರಿಕೆ
- ಪೊಲೀಸ್ ಠಾಣೆಯಲ್ಲೇ ಆತ್ಮಹತ್ಯೆ ಬೆದರಿಕೆ, ಮಹಿಳೆ ವಿರುದ್ಧ ಪ್ರಕರಣ
ಬೆಂಗಳೂರು (Bengaluru): ಅಕ್ಟೋಬರ್‌ 30, 2024ರಂದು ಬೆಂಗಳೂರು ರಾಮಮೂರ್ತಿನಗರ (Ramamurthy Nagar) ಪೊಲೀಸ್ ಠಾಣೆಯಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದ 45 ವರ್ಷದ ಇನ್ಸ್‌ಪೆಕ್ಟರ್‌ಗೆ ಅಪರಿಚಿತ ಸಂಖ್ಯೆಯಿಂದ ಕರೆ ಬಂದಿತ್ತು. ಮೊದಲಿಗೆ ಅದನ್ನು ಸಾಮಾನ್ಯ ದೂರು ಎಂದು ಭಾವಿಸಿದ ಅವರು, ನಂತರದ ದಿನಗಳಲ್ಲಿ ವಿಷಯ ಗಂಭೀರವಾಗುವುದನ್ನು ಊಹಿಸಿರಲಿಲ್ಲ.
ಪ್ರೇಮದ ಹೆಸರಿನಲ್ಲಿ ಬೆದರಿಕೆ
ಆ ಮಹಿಳೆ ಪದೇಪದೇ ಕರೆ ಮಾಡಿ, ತಾನು ಮುಖ್ಯಮಂತ್ರಿ, ಉಪಮುಖ್ಯಮಂತ್ರಿ ಹಾಗೂ ಗೃಹ ಸಚಿವರೊಂದಿಗೆ ನಿಕಟ ಸಂಪರ್ಕ ಹೊಂದಿದ್ದೇನೆ ಎಂದು ಹೇಳತೊಡಗಿದರು. ವಾಟ್ಸಾಪ್ ಮೂಲಕ ಕೆಲವು ಫೋಟೋಗಳನ್ನು ಕಳುಹಿಸಿ, ತನ್ನ ಪ್ರೇಮವನ್ನು ಒಪ್ಪಿಕೊಳ್ಳುವಂತೆ ಒತ್ತಡ ಹೇರಿದರು. “ನನ್ನ ಪ್ರೀತಿಯನ್ನು ತಿರಸ್ಕರಿಸಿದರೆ ನಿಮ್ಮ ಉದ್ಯೋಗವನ್ನೇ ನಾಶಮಾಡುತ್ತೇನೆ” ಎಂಬ ಬೆದರಿಕೆಗಳು ಇನ್ಸ್‌ಪೆಕ್ಟರ್‌ರನ್ನು ತೀವ್ರ ಮಾನಸಿಕ ಒತ್ತಡಕ್ಕೆ ತಳ್ಳಿದವು.
ರಕ್ತದಿಂದ ಬರೆದ ಪತ್ರ
ನವೆಂಬರ್‌ 7ರಂದು ಪ್ರಕರಣ ಮತ್ತಷ್ಟು ಆತಂಕಕಾರಿ ತಿರುವು ಪಡೆದುಕೊಂಡಿತು. ಮಹಿಳೆ ನೇರವಾಗಿ ಇನ್ಸ್ಪೆಕ್ಟರ್ ಕಚೇರಿಗೆ ಬಂದು ಒಂದು ಕವರ್ ನೀಡಿದರು. ಅದರೊಳಗೆ ಕೆಲವು ಮಾತ್ರೆಗಳು ಹಾಗೂ ಅತ್ಯಂತ ಭಾವನಾತ್ಮಕ ಪತ್ರಗಳು ಇದ್ದವು. ಆ ಪತ್ರಗಳನ್ನು ತನ್ನ ರಕ್ತದಿಂದಲೇ ಬರೆದಿದ್ದಾಗಿ ಮಹಿಳೆ ಹೇಳಿದ್ದು, ಅಧಿಕಾರಿಗಳನ್ನು ಬೆಚ್ಚಿಬೀಳುವಂತೆ ಮಾಡಿತು.
ಇದನ್ನೂ ಓದಿ: ಮಾನವೀಯತೆ ಮರೆತ ಬೆಂಗಳೂರು ಜನ: ರಸ್ತೆಯಲ್ಲೇ ಕೊನೆಯುಸಿರೆಳೆದ ವ್ಯಕ್ತಿ! ಜೀವಕ್ಕಿಲ್ವಾ ಬೆಲೆ
ಠಾಣೆಯಲ್ಲೇ ಆತ್ಮಹತ್ಯೆ ಬೆದರಿಕೆ
ಡಿಸೆಂಬರ್‌ 12ರಂದು ಮಹಿಳೆ ಪೊಲೀಸ್ ಠಾಣೆಗೆ ಬಂದು, ಎಲ್ಲರ ಮುಂದೆಯೇ ಗದ್ದಲ ಸೃಷ್ಟಿಸಿದ್ದಾಳೆ. “ನನ್ನ ಪ್ರೇಮವನ್ನು ಒಪ್ಪಿಕೊಳ್ಳದಿದ್ದರೆ ಇಲ್ಲಿಯೇ ಆತ್ಮಹತ್ಯೆ ಮಾಡಿಕೊಳ್ಳುತ್ತೇನೆ. ನಿನ್ನ ಕರಿಯರ್ ನಾಶ ಮಾಡುತ್ತೇನೆ” ಎಂದು ಕೂಗಿದರು. ಈ ಘಟನೆ ಠಾಣೆಯ ಸಿಬ್ಬಂದಿಯನ್ನೂ ಆತಂಕಕ್ಕೆ ಒಳಪಡಿಸಿತು.
ಪ್ರಕರಣ ದಾಖಲು, ತನಿಖೆ ಮುಂದುವರಿಕೆ
ನಿರಂತರ ಕಿರುಕುಳ ಹಾಗೂ ಕರ್ತವ್ಯಕ್ಕೆ ಅಡ್ಡಿಯಾಗುತ್ತಿರುವ ಹಿನ್ನೆಲೆಯಲ್ಲಿ, ಇನ್ಸ್ಪೆಕ್ಟರ್ ಅಧಿಕೃತ ದೂರು ದಾಖಲಿಸಿದರು. ದೂರಿನ ಮೇರೆಗೆ ಮಹಿಳೆ ವಿರುದ್ಧ ಭಾರತೀಯ ನ್ಯಾಯ ಸಂಹಿತೆಯ ಸೆಕ್ಷನ್‌ಗಳು 132, 221 ಮತ್ತು 351(2) ಅಡಿಯಲ್ಲಿ ಪ್ರಕರಣ ದಾಖಲಾಗಿದೆ. ಮಹಿಳೆ ಈ ಹಿಂದೆ ಕೂಡ ಇತರ ಸರ್ಕಾರಿ ಅಧಿಕಾರಿಗಳಿಗೆ ಇದೇ ರೀತಿ ಕಿರುಕುಳ ನೀಡಿದ್ದಾಳೆ ಎಂಬ ಅಂಶ ತನಿಖೆಯಲ್ಲಿ ಬೆಳಕಿಗೆ ಬಂದಿದೆ.
