ಬೆಂಗಳೂರು ಟ್ರಾಫಿಕ್ ಸಮಸ್ಯೆಗೆ ಬ್ರೇಕ್, 380 ಕೋಟಿ ಮೇಲ್ಸೇತುವೆ ಯೋಜನೆ

ಬೆಂಗಳೂರು (Bengaluru): ಬೆಂಗಳೂರಿನಲ್ಲಿ ಟ್ರಾಫಿಕ್ ಅಂದರೆ ಮೊದಲೇ ನೆನಪಾಗುವ ಕೆಲವು ಹಾಟ್‌ಸ್ಪಾಟ್‌ಗಳಿವೆ. ಅವುಗಳಲ್ಲಿ ಮಾರುತಿ ಸೇವಾನಗರ ಪ್ರಮುಖ. ಬಾಣಸವಾಡಿಯಿಂದ ಔಟರ್ ರಿಂಗ್ ರೋಡ್ ಕಡೆಗೆ ಸಾಗುವ ಈ ಮಾರ್ಗದಲ್ಲಿ ಪ್ರತಿದಿನವೂ ವಾಹನ ದಟ್ಟಣೆ ಕಿರಿಕಿರಿ ಉಂಟುಮಾಡುತ್ತಿದೆ. ಕೆಲಸಕ್ಕೆ ಹೊರಡುವವರು, ಶಾಲಾ ಮಕ್ಕಳ ಪೋಷಕರು, ಆಂಬ್ಯುಲೆನ್ಸ್‌ಗಳಿಗೂ ಕೂಡ ಇಲ್ಲಿ ಸಿಲುಕುವ ಪರಿಸ್ಥಿತಿ.

“ಐಒಸಿ ಜಂಕ್ಷನ್ ಬಳಿ ಐದು ನಿಮಿಷದ ದಾರಿ ಅರ್ಧ ಗಂಟೆ ಹಿಡಿಯುತ್ತಿದೆ” ಎಂದು ಸ್ಥಳೀಯರು ಬೇಸರ ವ್ಯಕ್ತಪಡಿಸುತ್ತಿದ್ದಾರೆ.

380 ಕೋಟಿ ಎಲಿವೇಟೆಡ್ ರೋಟರಿ ಯೋಜನೆ

ಈ ಹಿನ್ನೆಲೆ ಗ್ರೇಟರ್ ಬೆಂಗಳೂರು ಪ್ರಾಧಿಕಾರವು (ಜಿಬಿಎ) ಐಒಸಿ ಜಂಕ್ಷನ್‌ನಲ್ಲಿ ಎಲಿವೇಟೆಡ್ ರೋಟರಿ ಮೇಲ್ಸೇತುವೆ ನಿರ್ಮಾಣದ ಯೋಜನೆಯನ್ನು ಪುನಃ ಚರ್ಚೆಗೆ ತಂದಿದೆ. ಅಂದಾಜು 380 ಕೋಟಿ ರೂಪಾಯಿ ವೆಚ್ಚದಲ್ಲಿ 3–4 ಕಿಲೋಮೀಟರ್ ಉದ್ದದ ಸೇತುವೆ ನಿರ್ಮಿಸಲು ಪ್ರಸ್ತಾವಿಸಲಾಗಿದೆ.

ಜಿಬಿಎ ಮುಖ್ಯ ಆಯುಕ್ತರು ಹಾಗೂ ಸಂಬಂಧಿತ ಅಧಿಕಾರಿಗಳು ಸ್ಥಳ ಪರಿಶೀಲನೆ ನಡೆಸಿ ತಾಂತ್ರಿಕ ಆಯ್ಕೆಗಳ ಕುರಿತು ಚರ್ಚಿಸಿದ್ದಾರೆ. ಯೋಜನೆ ಜಾರಿಯಾದರೆ ಬಾಣಸವಾಡಿ, ಕಮ್ಮನಹಳ್ಳಿ, ಬೈಯ್ಯಪ್ಪನಹಳ್ಳಿ ಸುತ್ತಮುತ್ತ ಸಂಚಾರಕ್ಕೆ ದೊಡ್ಡ ಬದಲಾವಣೆ ಆಗಲಿದೆ ಎಂದು ನಿರೀಕ್ಷೆ.

ಬೈಯ್ಯಪ್ಪನಹಳ್ಳಿ ಭಾಗಕ್ಕೂ ಹೊಸ ಯೋಜನೆ

ಮಾರುತಿ ಸೇವಾನಗರದ ಟ್ರಾಫಿಕ್ ಸಮಸ್ಯೆ ಮಾತ್ರವಲ್ಲ, ಬೈಯ್ಯಪ್ಪನಹಳ್ಳಿ ರೈಲ್ವೆ ಲೆವೆಲ್ ಕ್ರಾಸಿಂಗ್ ಬಳಿಯೂ ದಟ್ಟಣೆ ಹೆಚ್ಚಾಗಿದೆ. ಇಲ್ಲಿ ಹೆಚ್ಚುವರಿ 2-ಲೇನ್ ರೈಲ್ವೆ ಮೇಲ್ಸೇತುವೆ ನಿರ್ಮಾಣದ ಸಾಧ್ಯತೆ ಕುರಿತು ಕೆ-ರೈಡ್ ಹಾಗೂ ಬಿ-ಸ್ಮೈಲ್ ಅಧಿಕಾರಿಗಳು ಚರ್ಚೆ ನಡೆಸಿದ್ದಾರೆ.

ಇದರಿಂದ ರೈಲು ಗೇಟ್ ಮುಚ್ಚಿದಾಗ ಉಂಟಾಗುವ ದೀರ್ಘ ಸಾಲು ಕಡಿಮೆಯಾಗುವ ನಿರೀಕ್ಷೆ ಇದೆ.

ಜನರ ನಿರೀಕ್ಷೆ ಏನು?

ಈ ಭಾಗದ ಹಳೆಯ ಮೇಲ್ಸೇತುವೆ ಕಿರಿದಾಗಿದ್ದು, ವೈಜ್ಞಾನಿಕ ಯೋಜನೆ ಇಲ್ಲದ ಕಾರಣ ಸಮಸ್ಯೆ ಹೆಚ್ಚಾಗಿದೆ ಎಂಬುದು ಸ್ಥಳೀಯರ ಅಭಿಪ್ರಾಯ. ಹೊಸ ಎಲಿವೇಟೆಡ್ ಸೇತುವೆ ನಿರ್ಮಾಣ ಶೀಘ್ರ ಆರಂಭವಾಗಲಿ ಎಂದು ಸಾರ್ವಜನಿಕರು ಒತ್ತಾಯಿಸುತ್ತಿದ್ದಾರೆ.

ಯೋಜನೆ ವೇಗ ಪಡೆದುಕೊಂಡರೆ, ಸಾವಿರಾರು ವಾಹನ ಸವಾರರಿಗೆ ನಿಜವಾದ ‘ಸಿಹಿಸುದ್ದಿ’ ಆಗಲಿದೆ.