ಬೆಂಗಳೂರು ಥಣಿಸಂದ್ರದಲ್ಲಿ ಹೆತ್ತ ತಾಯಿಯ ಎದುರೇ ರೌಡಿಶೀಟರ್ ಭೀಕರ ಹತ್ಯೆ!
ಥಣಿಸಂದ್ರ ಅಮರಜ್ಯೋತಿ ಲೇಔಟ್ನಲ್ಲಿ ರೌಡಿಶೀಟರ್ ಪವನ್ ಕುಮಾರ್ ಮೇಲೆ ಹೆಲ್ಮೆಟ್ ಧರಿಸಿದ ದುಷ್ಕರ್ಮಿಗಳ ದಾಳಿ; ಹೆತ್ತ ತಾಯಿಯ ಕಣ್ಣೆದುರೇ ಮಾರಕಾಸ್ತ್ರಗಳಿಂದ ಹತ್ಯೆ, ಹಳೆಯ ದ್ವೇಷ ಕೋನದಲ್ಲಿ ಪೊಲೀಸರ ತನಿಖೆ ಮುಂದುವರಿಕೆ.
- ರೌಡಿಶೀಟರ್ ಪವನ್ ಕುಮಾರ್ ಹತ್ಯೆ
- ಹೆಲ್ಮೆಟ್ ಧರಿಸಿದ ದುಷ್ಕರ್ಮಿಗಳಿಂದ ದಾಳಿ
- ಹಳೆಯ ದ್ವೇಷ ಹಿನ್ನೆಲೆ ಅನುಮಾನ
ಬೆಂಗಳೂರು (Bengaluru) ಉತ್ತರ ಭಾಗದ ಥಣಿಸಂದ್ರ ವ್ಯಾಪ್ತಿಯ ಅಮರಜ್ಯೋತಿ ಲೇಔಟ್ನಲ್ಲಿ ಬುಧವಾರ ಸಂಜೆ ನಡೆದ ಘಟನೆ ಸ್ಥಳೀಯರನ್ನು ಬೆಚ್ಚಿಬೀಳಿಸಿದೆ. ಮನೆ ಬಾಗಿಲು ತಲುಪಿದ ಕ್ಷಣದಲ್ಲೇ ರೌಡಿಶೀಟರ್ ಪವನ್ ಕುಮಾರ್ ಮೇಲೆ ದಾಳಿ ನಡೆದಿದ್ದು, ಆತನ ಹೆತ್ತ ತಾಯಿಯ ಕಣ್ಣೆದುರೇ ದುಷ್ಕರ್ಮಿಗಳು ಮನಬಂದಂತೆ ಕೊಚ್ಚಿ ಹತ್ಯೆ ಮಾಡಿದ್ದಾರೆ.
ಮೂರು ಬೈಕ್ಗಳಲ್ಲಿ ಬಂದಿದ್ದ ಆರು ಮಂದಿ, ಹೆಲ್ಮೆಟ್ ಧರಿಸಿ ಮುಖ ಮರೆಮಾಚಿಕೊಂಡೇ ಪವನ್ನನ್ನು ಹಿಂಬಾಲಿಸಿಕೊಂಡು ಬಂದಿದ್ದರು ಎನ್ನಲಾಗಿದೆ. ಮನೆ ಬಳಿ ಬೈಕ್ ನಿಲ್ಲಿಸುತ್ತಿದ್ದಂತೆಯೇ ಹಿಂದಿನಿಂದ ಅಟ್ಯಾಕ್ ನಡೆಸಿ, ಮಾರಕಾಸ್ತ್ರಗಳಿಂದ ಹಲ್ಲೆ ನಡೆಸಿದ್ದಾರೆ. ಮಗನನ್ನು ಉಳಿಸಲು ತಾಯಿ ಮಧ್ಯೆ ಬಿದ್ದರೂ ದುಷ್ಕರ್ಮಿಗಳ ಕ್ರೂರತೆ ಮುಂದೆ ಆಕೆ ಅಸಹಾಯಕರಾಗಿದ್ದರು.
ಹಳೆಯ ಪ್ರಕರಣದ ಸೇಡಾ?
ಪವನ್ ಕುಮಾರ್ ಕೆಲ ವರ್ಷಗಳ ಹಿಂದೆ ನಡೆದ ಕಪಿಲ್ ಕೊಲೆ ಪ್ರಕರಣದಲ್ಲಿ ಆರೋಪಿಯಾಗಿದ್ದನು. ಆ ಪ್ರಕರಣದ ನಂತರ ಜೈಲು ಶಿಕ್ಷೆ ಅನುಭವಿಸಿ ಹೊರಬಂದಿದ್ದ ಪವನ್ಗೆ ಪೋಷಕರು ಬೇಕರಿ ಅಂಗಡಿ ಮಾಡಿಕೊಟ್ಟಿದ್ದರು. ಅಪರಾಧ ಲೋಕದಿಂದ ದೂರವಿದ್ದು ಬದುಕು ಕಟ್ಟಿಕೊಳ್ಳಲು ಯತ್ನಿಸುತ್ತಿದ್ದನೆಂದು ಕುಟುಂಬದವರು ಹೇಳಿಕೊಂಡಿದ್ದಾರೆ.
ಆದರೆ ಮೂರು ವರ್ಷಗಳ ಹಿಂದಿನ ಡಿಜೆ ಹಳ್ಳಿಯ ಕಪಿಲ್ ಕೊಲೆ ಪ್ರಕರಣವೇ ಈ ಹತ್ಯೆಗೆ ಕಾರಣವಾಗಿದೆಯೇ ಎಂಬ ಅನುಮಾನ ವ್ಯಕ್ತವಾಗಿದೆ. ಅದೇ ರೀತಿಯಲ್ಲಿ ಹೆಲ್ಮೆಟ್ ಧರಿಸಿ ಬಂದ ಗುಂಪು ದಾಳಿ ನಡೆಸಿರುವುದು ಸೇಡು ಕೋನವನ್ನು ಬಲಪಡಿಸಿದೆ. ಕಪಿಲ್ ಸಹೋದರ ಸೇರಿದಂತೆ ಕೆಲವರ ಮೇಲೆ ಅನುಮಾನ ವ್ಯಕ್ತವಾಗಿದ್ದು, ಪೊಲೀಸರು ಎಲ್ಲಾ ದಿಕ್ಕುಗಳಲ್ಲಿ ತನಿಖೆ ಮುಂದುವರಿಸಿದ್ದಾರೆ.
ಪೊಲೀಸ್ ಪ್ರತಿಕ್ರಿಯೆ
ಈಶಾನ್ಯ ವಿಭಾಗದ ಡಿಸಿಪಿ ಮಿಥುನ್ ಕುಮಾರ್ ಮಾಧ್ಯಮಗಳಿಗೆ ಪ್ರತಿಕ್ರಿಯೆ ನೀಡಿ, “ಪವನ್ ಮನೆಗೆ ಬರುವ ವೇಳೆ ಕೆಲವರು ಫಾಲೋ ಮಾಡಿರುವುದು ದೃಢವಾಗಿದೆ. ಗುರುತು ಪತ್ತೆಯಾಗಿದೆ. ಹಳೆಯ ದ್ವೇಷವೇ ಕಾರಣ ಎಂದು ಈಗಲೇ ಹೇಳಲು ಸಾಧ್ಯವಿಲ್ಲ. ಆರೋಪಿಗಳ ಬಂಧನಕ್ಕಾಗಿ ವಿಶೇಷ ತಂಡ ರಚಿಸಲಾಗಿದೆ” ಎಂದು ತಿಳಿಸಿದ್ದಾರೆ.
ಸ್ಥಳದಲ್ಲಿ ಉದ್ವಿಗ್ನತೆ ವಾತಾವರಣ ನಿರ್ಮಾಣವಾಗಿದ್ದು, ಹೆಚ್ಚಿನ ಪೊಲೀಸ್ ಬಂದೋಬಸ್ತ್ ನಿಯೋಜಿಸಲಾಗಿದೆ. ಹತ್ಯೆಯ ದೃಶ್ಯ ಸ್ಥಳೀಯರಲ್ಲಿ ಆತಂಕ ಮೂಡಿಸಿದೆ.
