ಆಧಾರ್ ಕಾರ್ಡ್ ಹೊಸ ಡಿಸೈನ್ ಬರ್ತಿದೆ! QR ಕೋಡ್ ಆಧಾರಿತ ವ್ಯವಸ್ಥೆ ಶೀಘ್ರದಲ್ಲೇ ಜಾರಿ

Aadhaar Card: ಭಾರತದಲ್ಲಿ ಅತ್ಯಂತ ಪ್ರಮುಖ ಗುರುತಿನ ಚೀಟಿ ಎನ್ನಿಸಿಕೊಂಡಿರುವ ಆಧಾರ್ ಕಾರ್ಡ್‌ ಕುರಿತಾಗಿ ಮಹತ್ವದ ಬದಲಾವಣೆ ನಡೆಯಲಿರುವುದು ತಿಳಿದುಬಂದಿದೆ. ಕೇಂದ್ರ ಸರ್ಕಾರದ ಅಧೀನದಲ್ಲಿರುವ UIDAI ಸಂಸ್ಥೆ, ಬಳಕೆದಾರರ ಮಾಹಿತಿಯನ್ನು ಸುರಕ್ಷಿತವಾಗಿಡಲು ಆಧಾರ್ ಕಾರ್ಡ್‌ ಡಿಸೈನ್‌ ಸಂಪೂರ್ಣವಾಗಿ ಪರಿಷ್ಕರಿಸಲು ಮುಂದಾಗಿದೆ.

ಇತ್ತೀಚಿನ ದಿನಗಳಲ್ಲಿ ಸಿಮ್ ಕಾರ್ಡ್ ಮೋಸ, ಅನಧಿಕೃತ ಸಾಲಗಳು, ಮತ್ತು ಆಧಾರ್ ಆಧಾರಿತ ಹಣ ತೆಗೆಯುವ ದುರೋಪಯೋಗ ಪ್ರಕರಣಗಳು ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ. ಭೌತಿಕ ಕಾರ್ಡ್‌ನಲ್ಲಿರುವ ವಿವರಗಳನ್ನು ದುರುಪಯೋಗಪಡಿಸಿಕೊಳ್ಳುವ ಸಾಧ್ಯತೆ ಕಡಿಮೆ ಮಾಡಲು ಹೊಸ ವಿನ್ಯಾಸದಲ್ಲಿ ಸಂವೇದನಶೀಲ ಮಾಹಿತಿಯನ್ನು ಮರೆಮಾಡಲಾಗುತ್ತದೆ.

ಹೊಸ ಡಿಸೈನ್‌ನ ಆಧಾರ್ ಕಾರ್ಡ್‌ನಲ್ಲಿ ಬಳಕೆದಾರರ ಫೋಟೋ ಹಾಗೂ QR ಕೋಡ್ ಮಾತ್ರ ಪ್ರಮುಖವಾಗಿ ಕಾಣಿಸಿಕೊಳ್ಳಲಿದೆ. ಹೆಸರು, ವಿಳಾಸ, ಜನ್ಮ ದಿನಾಂಕ, 12 ಅಂಕಿಯ ಆಧಾರ್ ಸಂಖ್ಯೆ ಮುಂತಾದ ವಿವರಗಳು ಕಾರ್ಡ್ ಮೇಲ್ಮೈಯಲ್ಲಿ ಇರಲಾರವು. QR ಕೋಡ್ ಸ್ಕ್ಯಾನ್ ಮಾಡಿದಾಗ ಮಾತ್ರ ಅಗತ್ಯ ಮಾಹಿತಿಯನ್ನು ಡಿಜಿಟಲ್ ವಿಧಾನದಲ್ಲಿ ಪರಿಶೀಲಿಸಬಹುದಾಗಿದೆ.

ಇದರ ಜೊತೆಗೆ, UIDAI ಇತ್ತೀಚೆಗೆ ಹೊಸ ಆಧಾರ್ ಮೊಬೈಲ್ ಆಪ್ ಬಿಡುಗಡೆ ಮಾಡಿದ್ದು, ಡಿಜಿಟಲ್ ಪರಿಶೀಲನೆ, ಪೇಪರ್ ಲೆಸ್ ಶೇರ್ ಆಯ್ಕೆ, ಹಾಗೂ ಆಯ್ಕೆ ಮಾಡಿದ ಮಾಹಿತಿಯನ್ನು ಮಾತ್ರ ಹಂಚಿಕೊಳ್ಳುವ ಸೌಲಭ್ಯ ನೀಡಲಾಗಿದೆ. ವಿಳಾಸ ಮತ್ತು ಮೊಬೈಲ್ ನಂಬರ್ ಅಪ್ಡೇಟ್ ಮಾಡುವುದನ್ನೂ ಆಪ್ ಮೂಲಕ ಸುಲಭಗೊಳಿಸಲಾಗಿದೆ.

ಪ್ರಸ್ತುತ ಬಳಕೆಯಲ್ಲಿರುವ ಆಧಾರ್ ಕಾರ್ಡ್‌ಗಳು ಮುಂದುವರೆಯುತ್ತವೆ. ಆದರೆ ಹೊಸದಾಗಿ ಆಧಾರ್ ಪಡೆಯುವವರು ಅಥವಾ ತಿದ್ದುಪಡಿ ಮಾಡಿಸುವವರು ಹೊಸ ವಿನ್ಯಾಸದ ಕಾರ್ಡ್ ಪಡೆಯುವ ಸಾಧ್ಯತೆ ಇದೆ. ಭದ್ರತೆ ಹೆಚ್ಚಿಸುವ ದಿಟ್ಟ ಹೆಜ್ಜೆಯಾಗಿ ಈ ಬದಲಾವಣೆಗಳನ್ನು ನೋಡಲಾಗುತ್ತಿದೆ.