ಬರಿ 10 ನಿಮಿಷ ಚಾರ್ಜ್‌ನಲ್ಲಿ 900 ಕಿಮೀ ಓಡುವ ಎಲೆಕ್ಟ್ರಿಕ್ ಕಾರು ಮಾರುಕಟ್ಟೆಗೆ ಎಂಟ್ರಿ!

BMW i3 Electric Car: ಇತ್ತೀಚಿನ ವರ್ಷಗಳಲ್ಲಿ ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆ ಏರಿಕೆಯಿಂದ ಎಲೆಕ್ಟ್ರಿಕ್ ವಾಹನಗಳತ್ತ ಜನರ ಆಸಕ್ತಿ ಹೆಚ್ಚುತ್ತಿದೆ. ಇದೇ ಹಿನ್ನೆಲೆಯಲ್ಲಿ ಜರ್ಮನಿಯ ಪ್ರಮುಖ ವಾಹನ ತಯಾರಿಕಾ ಕಂಪನಿ BMW ತನ್ನ ಹೊಸ i3 ಎಲೆಕ್ಟ್ರಿಕ್ ಸೆಡಾನ್ ಅನ್ನು ಅನಾವರಣಗೊಳಿಸಿದೆ. ಈ ಕಾರು ಕಂಪನಿಯ ಹೊಸ Neue Klasse ಪ್ಲಾಟ್‌ಫಾರ್ಮ್ ಮೇಲೆ ನಿರ್ಮಿತವಾಗಿದ್ದು, ಭವಿಷ್ಯದ BMW 3 ಸೀರೀಸ್ ವಿನ್ಯಾಸದ ದಿಕ್ಕನ್ನೂ ಸೂಚಿಸುತ್ತದೆ.

ಕಂಪನಿಯ ಪ್ರಕಾರ ಈ ಹೊಸ ಕಾರು ಸಂಪೂರ್ಣವಾಗಿ ಹೊಸ ವಿನ್ಯಾಸದಲ್ಲಿ ಅಭಿವೃದ್ಧಿಪಡಿಸಲ್ಪಟ್ಟಿದ್ದು, ಹಳೆಯ i3 ಹ್ಯಾಚ್‌ಬ್ಯಾಕ್ ಮಾದರಿಯೊಂದಿಗೆ ಯಾವುದೇ ಸಂಬಂಧ ಇಲ್ಲ. ಈ ಎಲೆಕ್ಟ್ರಿಕ್ ಕಾರನ್ನು ಮೊದಲಿನಿಂದಲೇ ಶುದ್ಧ ವಿದ್ಯುತ್ ವಾಹನವಾಗಿ ರೂಪಿಸಲಾಗಿದೆ.

ಬ್ಯಾಟರಿ, ರೇಂಜ್ ಮತ್ತು ಚಾರ್ಜಿಂಗ್

BMW ಬಿಡುಗಡೆ ಮಾಡಿದ i3 50 xDrive ವೇರಿಯಂಟ್‌ನಲ್ಲಿ 800 ವೋಲ್ಟ್ ವ್ಯವಸ್ಥೆ ಬಳಸಲಾಗಿದೆ. ಬ್ಯಾಟರಿ ಸಾಮರ್ಥ್ಯದ ಬಗ್ಗೆ ಕಂಪನಿ ಇನ್ನೂ ಅಧಿಕೃತ ಮಾಹಿತಿ ನೀಡಿಲ್ಲ. ಆದರೆ ಇದು iX3 ಮಾದರಿಯಂತೆಯೇ ಸುಮಾರು 108.7 kWh ಬ್ಯಾಟರಿ ಸಾಮರ್ಥ್ಯ ಹೊಂದಿರಬಹುದು ಎಂದು ಅಂದಾಜಿಸಲಾಗಿದೆ.

ಈ ಕಾರು ಸುಮಾರು 469 ಹಾರ್ಸ್‌ಪವರ್ ಶಕ್ತಿ ಮತ್ತು 645 Nm ಟಾರ್ಕ್ ಉತ್ಪಾದಿಸಬಲ್ಲದು. ಕಂಪನಿಯ ಪ್ರಕಾರ ಒಂದು ಪೂರ್ಣ ಚಾರ್ಜ್ ಮಾಡಿದರೆ ಸುಮಾರು 900 ಕಿಲೋಮೀಟರ್ ವರೆಗೆ ಪ್ರಯಾಣ ಮಾಡಬಹುದು.

ಇದಲ್ಲದೆ 22 kW ಫಾಸ್ಟ್ AC ಚಾರ್ಜರ್ ಬಳಸಿ ಕೇವಲ 10 ನಿಮಿಷಗಳಲ್ಲಿ ಸುಮಾರು 400 ಕಿಮೀ ರೇಂಜ್ ಪಡೆಯಬಹುದೆಂದು ಕಂಪನಿ ಹೇಳಿದೆ. ಇದು ಎಲೆಕ್ಟ್ರಿಕ್ ವಾಹನ ಕ್ಷೇತ್ರದಲ್ಲಿ ದೊಡ್ಡ ತಾಂತ್ರಿಕ ಮುನ್ನಡೆಯಾಗಿ ಪರಿಗಣಿಸಲಾಗುತ್ತಿದೆ.

ವಿನ್ಯಾಸ ಹೇಗಿದೆ?

ಹೊಸ BMW i3 ಕಾರು ಕಂಪನಿಯ ಸಿಗ್ನೇಚರ್ ಶೈಲಿಯನ್ನು ಪ್ರತಿಬಿಂಬಿಸುವಂತೆ ವಿನ್ಯಾಸಗೊಳಿಸಲಾಗಿದೆ. ಮುಂದೆ ಸ್ಲಿಮ್ ಹೆಡ್‌ಲ್ಯಾಂಪ್‌ಗಳು, ಏರೋಡೈನಾಮಿಕ್ ಬಂಪರ್ ಹಾಗೂ ಉಬ್ಬಿದ ಹೂಡ್ ಕಾರಿಗೆ ಸ್ಪೋರ್ಟಿ ಲುಕ್ ನೀಡುತ್ತವೆ.

ಪಕ್ಕದಿಂದ ನೋಡಿದಾಗ ಕಾರಿನ ಶೋಲ್ಡರ್ ಲೈನ್ ಹಾಗೂ BMWಗೆ ವಿಶೇಷವಾದ ಹಾಫ್‌ಮೈಸ್ಟರ್ ಕರ್ವ್ ಗಮನ ಸೆಳೆಯುತ್ತದೆ. ಹಿಂಭಾಗದಲ್ಲಿ ಫ್ಲಾಟ್ ಡಿಸೈನ್ ಹಾಗೂ ಸಣ್ಣ ಟೈಲ್ ಲ್ಯಾಂಪ್‌ಗಳು ಇದನ್ನು ಇನ್ನಷ್ಟು ಆಕರ್ಷಕವಾಗಿಸುತ್ತವೆ.

ಒಳಭಾಗದ ಫೀಚರ್‌ಗಳು

ಕಾರು ಒಳಭಾಗವನ್ನು ಕಂಪನಿ ಸಂಪೂರ್ಣ ಹೊಸ ರೀತಿಯಲ್ಲಿ ವಿನ್ಯಾಸಗೊಳಿಸಿದೆ. ಡ್ಯಾಶ್‌ಬೋರ್ಡ್ ಮೇಲ್ಭಾಗದಲ್ಲಿ ದೊಡ್ಡ ಡಿಜಿಟಲ್ ಡಿಸ್ಪ್ಲೇ ನೀಡಲಾಗಿದ್ದು, ಅದರಲ್ಲಿ ಸ್ಪೀಡೋಮೀಟರ್, ಇನ್ಫೋಟೈನ್‌ಮೆಂಟ್ ಹಾಗೂ ಪ್ರಯಾಣಿಕರಿಗೆ ಸಂಬಂಧಿಸಿದ ಮಾಹಿತಿ ಕಾಣಿಸುತ್ತದೆ.

ಅದರ ಕೆಳಭಾಗದಲ್ಲಿ ಪ್ರತ್ಯೇಕ ಟಚ್‌ಸ್ಕ್ರೀನ್ ನಿಯಂತ್ರಣ ವ್ಯವಸ್ಥೆ ಇದೆ. ಹೊಸ ವಿನ್ಯಾಸದ ಸ್ಟೀರಿಂಗ್ ವೀಲ್ ಮತ್ತು ಮಿನಿಮಲಿಸ್ಟ್ ಕ್ಯಾಬಿನ್ ಈ ಕಾರಿಗೆ ಆಧುನಿಕ ಲುಕ್ ನೀಡುತ್ತವೆ.

ಉತ್ಪಾದನೆ ಯಾವಾಗ ಆರಂಭ?

BMW ಕಂಪನಿ ತಿಳಿಸಿದಂತೆ ಈ ಕಾರಿನ ಉತ್ಪಾದನೆ ಜರ್ಮನಿಯ ಮ್ಯೂನಿಕ್ ಘಟಕದಲ್ಲಿ 2026 ಆಗಸ್ಟ್‌ನಲ್ಲಿ ಆರಂಭವಾಗಲಿದೆ. ಯುಕೆಯಲ್ಲಿ 2026 ಕೊನೆಯಲ್ಲಿ ಡೆಲಿವರಿ ಪ್ರಾರಂಭವಾಗುವ ಸಾಧ್ಯತೆ ಇದೆ. ಅಮೆರಿಕಾದಲ್ಲಿ 2027ರಲ್ಲಿ ಮಾರಾಟ ಆರಂಭವಾಗಬಹುದು.

ಭಾರತಕ್ಕೆ ಮೊದಲು iX3 ಮಾದರಿ ಬರುವ ಸಾಧ್ಯತೆ ಇದ್ದು, ನಂತರ i3 ಎಲೆಕ್ಟ್ರಿಕ್ ಕಾರು ಮಾರುಕಟ್ಟೆಗೆ ಬರಬಹುದು ಎಂದು ಅಂದಾಜಿಸಲಾಗಿದೆ.